Egzod 18 - Labib An Kreol Seselwa

Zetro I Vizit Moiz

¹ Zetro, pret Madyann, e boper Moiz, ti antann tou sa ki Bondye ti'n fer pour Moiz e pour son pep Izrael: Ki mannyer SENYER ti fer Izrael sorti Lezip.

² Zetro, boper Moiz, ti anmenn avek li Sefora, fanm Moiz ki i ti'n kit deryer

³ avek son de garson. Enn ti apel Gersonn, savedir: Mon en refizye dan pei etranze;

⁴ lot ti apel Eliezer, savedir: Bondye mon papa i mon sekour, e i'n delivre mwan kont lepe Faraon.

⁵ Avek bann garson e fanm Moiz, Zetro, boper Moiz, ti al war li dan dezer kot i ti pe kanpe kot montanny Bondye.

⁶ I ti fer dir Moiz, “Mwan Zetro ou boper, mon'n vin kot ou avek ou fanm ek ou de garson.”

⁷ Moiz ti sorti deswit pour al zwenn son boper. I ti prostern devan li e anbras li. Zot ti demann nouvel kanmarad; apre zot ti antre dan latant.

⁸ Moiz ti rakont son boper tou sa ki SENYER ti fer avek Faraon ek bann Ezipsyen akoz pep Izrael. I ti rakont li osi tou bann difikilte ki i ti'n pas ladan dan semen e ki mannyer SENYER ti'n delivre zot.

⁹ Zetro ti rezouir pour tou sa dibyen ki SENYER ti'n fer pour Izrael e dan lafason ki i ti'n delivre zot dan lanmen bann Ezipsyen.

¹⁰ Zetro ti dir, “Loue SENYER ki'n delivre zot kont bann Ezipsyen e dan lanmen Faraon.

¹¹ Aprezan, mon konnen ki SENYER i pli gran ki tou bann bondye, akoz in delivre son pep dan lanmen bann Ezipsyen ki ti pe maltret zot avek larogans.”

¹² Apre sa, Zetro, boper Moiz ti ofer en sakrifis konplet e lezot sakrifis anver Bondye. Aaron, ansanm avek bann ansyen dan Izrael ti vin manz dipen avek boper Moiz, dan prezans Bondye.

Moiz I Swazir bann Ziz

¹³ Son lannmen, Moiz ti asiz pour ziz lepep. Zot ti reste debout devan Moiz depi bomaten ziska aswar.

¹⁴ Kan boper Moiz ti war tou sa ki i ti pe fer pour son pep, i ti dir li, “Ki ou pe fer la pour lepep? Akoz ou asiz tousel, tandis ki lepep antye i reste debout devan ou, bomaten ziska aswar?”

¹⁵ Moiz ti dir son boper, “Lepep ki vin kot mwan pour konsilte Bondye.

¹⁶ Kan zot annan en dispit, zot vin kot mwan pour rezoud. Mon ziz sa zafer ant sa de parti, e mon fer konn bann regleman Bondye ek son bann lalwa.”

¹⁷ Boper Moiz ti dir li, “Ou fason fer, pa bon.

¹⁸ Ou avek ou pep, zot pou fatige: Sa latas i tro lour pour ou; ou pa pou kapab fer li ou tousel.

¹⁹ Aprezan, ekout mwan; les mwan donn ou en konsey, e Bondye ava avek ou. Ou ava vin reprezantan lepep devan Bondye e ou menm, ou ava anmenn zot ka devan Bondye.

²⁰ Ansenny zot bann regleman ek bann lalwa; fer zot konn semen ki zot bezwen swiv, e sa ki zot devre fer.

²¹ Ou ava swazir bann zonm kapab parmi lepep, bann zonm ki annan respe pour Bondye, bann zonm ki ou kapab fer konfyans e ki pa malonnet. Plas zot koman sef group 1,000, 100, 50 ek group 10.

²² Zot ava ziz lepep toultan. Zot ava anmenn bann ka grav devan ou, me pour lezot, zot ava kapab pran desizyon zot menm. I ava fer fasil pour ou e zot ava partaz ou fardo.

²³ Si ou fer konmsa, e ki Bondye i donn ou son bann lord, ou ava kapab siporte e lepep ava retourn se zot anpe.”

²⁴ Moiz ti ekout son boper; i ti fer tou sa ki i ti'n dir li.

²⁵ Moiz ti swazir bann dimoun kapab parmi pep Izrael. I ti met zot ansarz son pep. Ti annan sef group 1,000, sef 100, sef 50 ek sef 10.

²⁶ Zot ti ziz lepep toultan. Zot ti anmenn bann ka difisil devan Moiz e bann ka mwen enportan, zot ti ziz zot menm.

²⁷ Apre, Moiz ti les son boper ale e retourn dan son pei.