Egzod 16 - Labib An Kreol Seselwa

Lamann ek Zwazo

¹ Apre ki zot ti'n kit Lezip, pep Izrael ti sorti Elim e ariv dezer Sin, ki ant Elim ek Sinai, kenzyenm zour dan dezyenm mwan.

² Dan dezer, pep Izrael antye ti mirmire kont Moiz ek Aaron.

³ Pep Izrael ti dir zot, “Plito SENYER ti'n touy nou depi Lezip kot nou ti asiz devan bann marmit lavyann, kot nou ti manz dipen nou vant plen. Ou'n anmenn sa pep antye dan dezer pour li mor lafen.”

⁴ SENYER ti dir Moiz, “Mon pou fer dipen tonbe sorti dan lesyel pour zot. Tou le zour, lepep ava sorti e ranmas kantite neseser pour sak zour. Konmsa, mon pou teste zot pour war si zot pe obeir mon lalwa ou non.

⁵ Sizyenm zour, ler zot ava'n prepar sa ki zot ava ranmase, zot porsyon tou le zour ava double.”

⁶ Alor, Moiz ek Aaron ti dir pep Izrael, “Tanto, zot pou konnen ki SENYER ki ti fer zot sorti Lezip,

⁷ e demen bomaten, zot pou war laglwar SENYER, akoz in antann zot pe mirmire kont li. Ki nou ete, pour zot mirmire kont nou?”

⁸ Moiz ti dir, “SENYER pou donn zot lavyann pour manze tanto e demen bomaten i pou donn zot dipen, akoz i'n antann zot mirmire kont li. Pa kont nou ki zot pe konplent e mirmire, me kont SENYER.”

⁹ Moiz ti dir Aaron, “Dir avek pep Izrael: Prezant zot devan SENYER akoz in antann zot pe mirmire.”

¹⁰ Pandan ki Aaron ti pe koz avek pep Izrael antye, zot ti get ver dezer e zot ti war laglwar SENYER aparet dan nyaz.

¹¹ SENYER ti dir Moiz,

¹² “Mon'n antann bann Izraelit mirmire. Dir zot: Soley kouse, zot pou manz lavyann e demen bomaten, zot pou rasazye dipen. Alor, zot ava konnen ki mwan menm SENYER zot Bondye.”

¹³ Aswar, bann zwazo ki apel kay, ti monte e kouver kan.

¹⁴ Lannmen bomaten ti annan en kous laroze otour kan. Ler sa kous laroze ti'n sek, dezer ti kouver avek en sibstans anfarin, parey biskwi.

¹⁵ Pep Izrael ti gete e zot ti dir antre zot, “Kisisa sa?” Annefe, zot pa ti konnen kwa sa. Moiz ti dir zot, “Sanmenm dipen ki SENYER in donn zot pour manze.

¹⁶ La lord ki SENYER in donnen: Sakenn ava anmas lakantite ki i bezwen. Zot ava anmas anviron de lit par personn, dapre lakantite dimoun dan zot latant.”

¹⁷ Pep Izrael ti fer parey Moiz ti'n dir zot. Serten ti anmas an plis, serten an mwens.

¹⁸ Kan zot ti mezire, bann ki ti'n anmas an plis, ti remarke ki ti napa an plis e bann ki ti'n anmas mwens, ti remarke ki ti annan zis sa ki ti neseser. Sakenn ti anmas sa ki i ti bezwen.

¹⁹ Moiz ti dir zot, “Fodre pa ki personn i gard lamann ziska bomaten.”

²⁰ Me serten pa ti ekout Moiz: Ti annan ki ti gard en pe pour lannmen, me i ti ganny lever ladan e ti santi pouri. Alor Moiz ti ankoler kont zot.

²¹ Tou le bomaten, sakenn ti anmas sa ki ti neseser. Ler soley ti monte, sa ki ti reste ti fonn avek lasaler.

²² Sizyenm zour, zot ti anmas doub: Anviron kat lit par personn. Bann responsab dan kominote ti raport avek Moiz

²³ ki ti dir zot, “SENYER in donn lord: Demen i saba, en zour repo konsakre pour SENYER. Zot ava kwi sa ki fodre kwi e bwi sa ki fodre bwi. Tou sa ki reste, gard li pour lannmen bomaten.”

²⁴ Alor, zot ti gard tou ziska lannmen bomaten, parey Moiz ti'n ordonn zot. Nanryen pa ti gate ni ganny lever.

²⁵ Moiz ti dir, “Manz li ozordi, akoz ozordi i en zour saba pour SENYER. Ozordi, zot pa pou war okenn manze deor.

²⁶ Pandan sis zour zot ava anmase; me setyenm zour, i zour saba; pou napa nanryen.”

²⁷ Setyenm zour, serten ti sorti pour anmas lamann, me ti napa nanryen.

²⁸ SENYER ti dir Moiz, “Ziska kan eski zot pou refize gard mon bann komannman ek mon bann lalwa?

²⁹ Gete! SENYER in donn zot saba; sizyenm zour in donn zot dekwa manze pour de zour. Setyenm zour, sakenn ava reste se li; personn pa devre sorti.”

³⁰ Alor lepep ti repoze setyenm zour.

³¹ Pep Izrael ti apel sa manze lamann. I ti parey lagrenn koriyann; i ti blan e i ti annan gou biskwi fer avek dimyel.

³² Moiz ti dir, “SENYER in donn sa lord: Gard en pe lamann, anviron de lit dan en resipyan pour ki atraver bann zenerasyon, zot ava kapab war sa dipen ki mon'n fer zot manze dan dezer, ler mon ti fer zot sorti Lezip.”

³³ Moiz ti dir Aaron, “Pran en po e met de lit lamann ladan. Plas li devan SENYER pour prezerv li atraver bann zenerasyon.”

³⁴ Parey SENYER ti'n ordonnen avek Moiz, Aaron ti plas sa po lamann devan bann plak Temwannyaz pour ki i ganny konserve.

³⁵ Pep Izrael ti manz lamann pandan 40 an ziska ki zot ti ariv dan en pei abite. Zot ti manz lamann ziska ki zot ti ariv pre avek Kanaan.

³⁶ Mezir ki zot ti servi ti apel omer, anviron de lit.