Egzod 15 - Labib An Kreol Seselwa

Kantik Moiz

¹ Alor, Moiz avek pep Izrael ti sante an loner SENYER: Mon pou sant pour SENYER; in montre son grander dan en tre gran laviktwar. I'n zet seval ek son kavalye dan lanmer.

² SENYER i mon lafors ek mon pwisans. Li menm mon sover. Li menm mon Bondye, mon pou loue li. Li menm Bondye mon zanset; mon pou loue li.

³ SENYER i en gerye, Son non i SENYER.

⁴ I'n zet dan lanmer, kales lager Faraon ek son larme. Son bann vayan kavalye in anfons dan lanmer Rouz.

⁵ Fon lanmer ti kouver zot. Zot ti koul apik dan profonder parey en ros.

⁶ Ou lanmen drwat SENYER, i gran par son pwisans. Ou lanmen drwat SENYER, in kraz lennmi.

⁷ Dan grander ou mazeste, ou detri ou lennmi. Ou anvoy ou lakoler e zot ganny brile parey lapay.

⁸ Ou soufle, e lanmer i rasanble; laroul ti monte parey en baraz; profonder lanmer ti vin solid.

⁹ Lennmi ti dir: Mon pou pourswiv zot, mon pou ganny zot. Mon pou ganny en par dan piyaz lager e mon pou rasazye. Mon pou tir mon lepe e mon pour detri zot.

¹⁰ Ou ti fer soufle ou divan e lanmer ti kouver zot. Zot ti koule parey diplon dan en lanmer formidab.

¹¹ Lekel parmi bann bondye ki parey ou, SENYER? Lekel ki parey ou, e briye avek sentete, e ki fer bann mervey?

¹² Ou ti lev ou lanmen drwat e later ti anval zot.

¹³ Dan ou fidelite, ou ti kondwir sa pep ki ou ti sove. Par ou lafors, ou ti gid zot ver ou demer sen.

¹⁴ Bann pep in tande, zot tranble; douler lakousman in sezi bann Filisten.

¹⁵ Bann sef Edonm i boulverse. Bann dirizan Moab i tranble. Tou zabitan Kanaan in perdi kouraz.

¹⁶ Lafreyer ek laper in tonm lo zot. Par lafors ou lebra, zot perdi laparol, parey en ros, ziska ki ou pep SENYER, in fini pase, ziska ki sa pep SENYER, ki ou'n sove, in fini pase.

¹⁷ Ou pou anmenn zot e etabli zot lo montanny ou posesyon, en landrwa ki ou'n prepare pour ou reste, SENYER, dan sa sanktyer ki ou lanmen in prepare, SENYER.

¹⁸ SENYER i lerwa pour touzour!

¹⁹ Bann seval Faraon, son bann kales lager ek son bann kavalye ti koule dan lanmer. SENYER ti fer lanmer retourn lo zot, me pep Izrael ti mars lo later ferm atraver lanmer.

Kantik Mirianm

²⁰ Mirianm, en profetes, ser Aaron, ti pran en tanbouren. Tou bann fanm ti sorti e swiv li. Zot ti zwe tanbouren e zot ti danse.

²¹ Mirianm ti sant avek zot: Sant pour SENYER akoz in ganny laviktwar: Seval ek kavalye in ganny zete dan lanmer.

Delo Anmer

²² Apre, Moiz ti fer pep Izrael kit lanmer Rouz; zot ti al dan direksyon dezer Sour. Zot ti mars pandan trwa zour dan dezer e zot pa ti war okenn delo.

²³ Zot ti ariv Mara kot zot pa ti kapab bwar sa delo akoz i ti anmer. Alor, zot ti apel sa landrwa Mara, savedir anmer.

²⁴ Pep Izrael ti mirmire kont Moiz. Zot ti dir, “Ki nou pou bwar?”

²⁵ Moiz ti kriy ver SENYER e SENYER ti montre li en pye dibwa. I ti zet en morso dan delo ki ti vin delo dou. La ki SENYER ti donn lepep en lalwa ek en regleman; la osi ki i ti teste zot.

²⁶ I ti dir, “Si ou vreman ekout SENYER, ou Bondye, si ou fer sa ki byen devan li, si ou port atansyon son bann komannman e gard tou son bann lalwa, mon pa pou fer ou sibir sa bann maladi ki mon ti anvoy lo Lezip: Mwan SENYER, ki geri ou.”

²⁷ Zot ti ariv Elim kot ti annan 12 sours delo e 70 pye palm. Zot ti kanp la, obor delo.