Egzod 12 - Labib An Kreol Seselwa

Lafet Pak

¹ Dan pei Lezip, SENYER ti dir Moiz ek Aaron:

² Sa mwan, ava pour zot konmansman lannen. I ava pour zot premye parmi bann mwan dan lannen.

³ Dir avek pep Izrael antye: Dizyenm zour sa mwan, zot devre pran en zenn mouton oubyen en kabri par fanmir, en zannimo pour sak lakaz.

⁴ Si en fanmir i tro pti pour manz en zenn mouton, i ava zwenn avek vwazen pli pros, baze dapre lakantite dimoun ki i annan pour manze.

⁵ Sa zenn mouton i devret san defo e aze enn an. Ou ava kapab pran li parmi bann mouton oubyen bann kabri.

⁶ Zot ava gard li ziska katorzyenm zour sa mwan kan pep Izrael antye ava rasanble pour egorz li soley kouse.

⁷ Zot ava pran en pe disan e met lo de poto laport ek lo lento laport lakaz kot zot pou manze.

⁸ Sa menm swar, zot ava manz sa lavyann; zot ava manz lavyann roti lo dife avek bann dipen san lelven ek zerb anmer.

⁹ Pa manz sa lavyann kri oubyen bwi dan delo, me roti lo dife, avek son latet, lapat ek trip.

¹⁰ Zot pa pou les nanryen reste ziska bomaten. Sa ki ava reste bomaten, i devre ganny brile.

¹¹ La ki mannyer zot pou manz li: Zot ava met zot sentir dan leren, sandal dan lipye e baton dan lanmen. Zot ava manz an vites. Sa i Pak SENYER.

¹² Sa swar, mon pou travers Lezip e mon pou touy tou premye ne dan Lezip, dimoun koman zannimo. Mon pou egzekit zizman lo bann bondye Ezipsyen: Mwan menm SENYER.

¹³ Sa disan ava en siny lo bann lakaz pou montre kot zot ete. Ler mon pou war sa disan, mon pou pas par lao zot e sa fleo pa pou detri zot kan mon pou pini Lezip.

¹⁴ Sa zour ava pour zot en memoryal. Zot ava selebre sa zour koman en lafet pour SENYER. Zot ava obzerv li koman en zour lafet pour touzour, pour tou zot bann zenerasyon.

Lafet Dipen san Lelven

¹⁵ Pandan set zour, zot pou manz dipen san lelven. Depi premye zour, zot devre tir tou lelven dan zot lakaz. Si en dimoun i manz dipen kwi avek lelven ant premye zour ek setyenm zour, i pou ganny sase parmi pep Izrael.

¹⁶ Premye zour, i ava annan en lasanble sakre; setyenm zour, i ava annan en lasanble sakre pour zot. Personn pa devre fer okenn travay pandan sa bann zour, eksepte pour prepar zot manze.

¹⁷ Zot ava obzerv lafet Dipen san lelven, akoz sa zour, mon ti fer sorti zot pep dan Lezip. Alor, zot ava obzerv sa zour koman en lalwa pour touzour pour tou bann zenerasyon.

¹⁸ Zot ava manz dipen san lelven aswar depi katorzyenm zour, premye mwan, ziska ventyenm zour, aswar.

¹⁹ Pandan set zour pa devre annan okenn lelven dan zot lakaz. Si okenn dimoun i manz keksoz avek lelven, ki i en etranze oubyen en sitwayen, i ava ganny sase parmi pep Izrael.

²⁰ Zot pa devre manz nanryen ki'n kwi avek lelven. Partou dan zot lakaz, zot devre manz dipen san lelven.

Premye Lafet Pak

²¹ Moiz ti rasanble tou bann ansyen dan Izrael. I ti dir zot, “Al swazir bann zenn mouton pour zot fanmir e egorz zot koman zot sakrifis Pak.

²² Pran en brans izop, tranp li dan disan ki dan en bol e frot li lo lento e lo de poto laport son lakaz. Personn pa devre sorti dan son lakaz ziska bomaten.

²³ SENYER pou pase pour touy bann Ezipsyen. Kan i ava war sa disan lo lento e lo poto laport, SENYER pou sot sa lakaz; i pa pou les sa fleo antre kot zot.

²⁴ Zot devre obzerv sa rityel koman en regleman pour ou ek ou bann zanfan pour touzour.

²⁵ Kan zot ava'n antre dan sa pei ki SENYER pou donn zot, parey i ti dir, zot ava obzerv sa seremoni.

²⁶ Kan zot zanfan ava demann zot: Ki savedir sa seremoni?

²⁷ Zot ava reponn: Sa i sakrifis Pak pour SENYER. I ti pas par lao lakaz bann Izraelit dan Lezip; i ti touy bann Ezipsyen, me i ti eparny nou bann lakaz.” Lepep ti prosternen e adore.

²⁸ Apre, bann Izraelit ti ale. Zot ti fer egzakteman parey SENYER ti'n komann Moiz ek Aaron.

Lanmor bann Premye Ne

²⁹ Minwi, SENYER ti touy tou bann premye ne dan Lezip, depi premye ne Faraon ki asiz lo son tronn, ziska premye ne sa prizonnyen dan son kaso, e premye ne bann zannimo.

³⁰ Faraon avek tou bann serviter ek tou bann Ezipsyen ti leve dan lannwit. Ti annan en gran leokri dan Lezip, akoz ti annan lanmor dan tou lakaz.

³¹ Faraon ti fer apel Moiz ek Aaron aswar menm. I ti dir zot, “Sorti parmi mon pep, ou avek bann Izraelit. Al servi SENYER parey zot in dir.

³² Pran zot troupo bef, mouton, kabri parey zot in dir. Ale e donn mwan osi en benediksyon.”

³³ Bann Ezipsyen ti fer bann Izraelit degaze pour kit pei pli vit posib, akoz zot ti pe dir: Nou tou nou pou mor.

³⁴ Alor, lepep ti pran zot lapat dipen avan ki i ti monte. Zot ti anvlop zot petren dan zot lenz e met lo zot zepol.

³⁵ Pep Izrael ti'n fer parey Moiz ti'n dir zot: Zot ti'n demann bann Ezipsyen bann lobze annarzan, annor ek lenz.

³⁶ SENYER ti fer ki bann Ezipsyen ti donn zot tou sa ki zot ti demande. Dan sa fason ki zot ti depouy larises bann Ezipsyen.

Bann Izraelit I Kit Lezip

³⁷ Bann Izraelit ti kit lavil Ranmses e zot ti al ver Soukot. Ti annan anviron 600,000 zonm apye, san kont bann zanfan.

³⁸ En kantite etranze ti osi mont avek zot. Zot ti anmenn osi zot troupo mouton ek kabri.

³⁹ Zot ti kwi galet san lelven avek lapat ki zot ti'n anmennen sorti Lezip e ki pa ti'n monte. Annefe, zot ti'n ganny sase Lezip, san ki zot ti kapab fer okenn provizyon pour zot menm.

⁴⁰ Pep Izrael ti'n reste Lezip pour 430 an.

⁴¹ Apre sa 430 an, zour pour zour, pep SENYER antye ti kit Lezip.

⁴² SENYER ti vey lo zot sa swar antye, pour tir zot Lezip. Pour pep Izrael antye, e pour tou bann zenerasyon fitir, sa i en lannwit kan zot veye an loner SENYER.

Regleman pour Selebrasyon Pak

⁴³ SENYER ti dir Moiz ek Aaron, “La regleman pour selebre Pak: Okenn etranze pa devre manz repa Pak.

⁴⁴ Tou lesklav ki'n ganny aste e ki'n ganny sirkonsi, ava kapab manz repa Pak.

⁴⁵ Okenn etranze, ni travayer salarye pou napa drwa partisipe.

⁴⁶ Sa lafet i devre ganny selebre dan en lakaz. Ou pa devre anmenn okenn lavyann an deor lakaz e okenn lezo sa zannimo pa devre ganny kase.

⁴⁷ Pep Izrael antye i devre selebre sa lafet.

⁴⁸ Si en etranze ki pe reste kot ou i anvi obzerv Pak pour SENYER, fodre ki bann mal ki kot li i ganny sirkonsi. Alor, i ava kapab aprose pour partisipe; i ava ganny konsidere koman en sitwayen. Me tou sa ki pa'n ganny sirkonsi, pa pou kapab manz sa zannimo.

⁴⁹ I ava annan en menm lalwa pour bann sitwayen e pour bann etranze ki reste parmi zot.”

⁵⁰ Pep Izrael antye ti fer tou sa ki SENYER ti'n ordonn Moiz ek Aaron.

⁵¹ Sa menm zour, SENYER ti delivre pep Izrael Lezip, organize an group koman en larme.