Efezyen 4 - Labib An Kreol Seselwa

Linite Lekor

¹ Mwan ki prizonnyen, akoz mon dan servis Senyer, mon sipliy zot: Viv zot lavi dapre sa lapel ki Bondye in fer zot.

² Viv touzour dan limilite, ladouser ek pasyans. Siport kanmarad dan lanmour.

³ Fer tou pour prezerv linite ki Lespri i donnen par lape ki ini zot.

⁴ I annan en sel lekor ek en sel Lespri, parey ki i annan en sel lesperans ver lekel Bondye in apel zot.

⁵ I annan en sel Senyer, en sel lafwa, en sel batenm.

⁶ I annan en sel Bondye e Papa tou dimoun, ki renny lo tou, ki azir par tou e ki reste dan tou.

⁷ Sepandan, sakenn parmi nou in resevwar en don spesyal dapre sa ki Kris in donnen.

⁸ Parey Lekritir i deklare: Kan i ti mont lao, i ti anmenn avek li bann prizonnyen. I ti ofer zonm kado lo later.

⁹ Alor ki savedir: I ti monte? Savedir ki dabor i ti desann dan profonder later.

¹⁰ Sa enn ki'n desann, li menm ki'n mont par lao dan lesyel, landrwa pli o pour ranpli tou liniver avek son prezans.

¹¹ Li menm ki'n etabli serten koman zapot, ouswa koman profet; serten pour anons Bonn Nouvel, serten koman paster, oubyen serten koman ansennyan.

¹² Konmsa ki i'n prepar pep Bondye pour akonpli son servis e fer grandir lekor Kris.

¹³ Konmsa, ansanm nou pou kapab ariv dan linite nou lafwa e dan konnesans Garson Bondye; nou ava vin adilt, devlope pour vin parfe parey Kris.

¹⁴ Alor, nou pou nepli parey bann zanfan ki ganny trennen par laroul, e pouse partou par nenport ki divan lansennyman ki dimoun rize i fannen pour antrenn lezot dan lerer.

¹⁵ O kontrer, kan nou dir laverite avek lanmour, nou ava grandi dan tou fason ver Kris, nou sef.

¹⁶ Kontrole par li, tou bann diferan parti lekor i byen rasanble ansanm, e lekor antye i tenir ansanm par bann zwentir. Alor, kan sak parti i travay koman i fodre, lekor antye i grandi e i devlop dan lanmour.

Nouvo Lavi avek Kris

¹⁷ Mon sipliy zot lo non Senyer: Aret viv koman sa bann ki pa konn Bondye. Zot mannyer reflesir pa vo nanryen.

¹⁸ Zot lespri i dan fernwanr. Zot napa okenn par dan sa nouvo lavi ki Bondye i donnen, akoz zot konpletman inyoran e zot refize ekoute.

¹⁹ Zot in perdi tou pider, zot in abandonn zot lekor dan toudsort vis e move aksyon san okenn kontrol.

²⁰ Pa sa, ki zot in aprann lo size Kris.

²¹ Annefe, zot in antann koz lo li, e zot in ganny ansennyen, anliny avek laverite ki dan Zezi.

²² Zot devre alor debaras zot avek zot vye natir, ki ti zot fason viv otrefwa, ki ti anmenn larin par son bann dezir tronper.

²³ Sanz zot leker ek zot lespri konpletman.

²⁴ Vin en dimoun konpletman nouvo, kree dan resanblans Bondye. Dimoun ava war ki zot pe viv dan en fason zis e sen ki laverite i prodwir.

²⁵ Pour sa rezon, rezet tou mansonz! Sakenn i devre dir laverite avek son prosen, akoz nou tou, nou manm en menm lekor.

²⁶ Si zot pran lakoler, fer atansyon pour zot pa tonm dan pese, e fer atansyon pa les zot lakoler dire ziska aswar.

²⁷ Pa donn dyab lokazyon pran lavantaz lo zot.

²⁸ Sa enn ki abitye vole, fodre i aret vole e travay pour ganny son lavi onnetman, e ganny dekwa pour ed bann pov.

²⁹ Pa les bann move parol sorti dan zot labous; me koz zis bann parol itil ki kapab ed lezot pour progrese dan lafwa e kan i neseser, pour fer dibyen sa enn ki ekout ou.

³⁰ Pa rann tris Lespri Sen ki Bondye in donn nou. Li menm garanti ki zour kan Bondye ava vin delivre nou konpletman pou vini.

³¹ Debaras zot avek tou move santiman, iritasyon e lakoler. Fer disparet tou kriye ek lensilt. Pa bezwen annan okenn santiman mesanste.

³² O kontrer, viv bon, ranpli avek lafeksyon anver kanmarad; pardonn kanmarad, parey Bondye in pardonn zot par Kris.