Ebre 8 - Labib An Kreol Seselwa

Zezi, Nou Gran-Pret

¹ Aprezan, la pwen pli enportan lo sa ki nou pe dir: Nou annan en tel Gran-Pret, enn ki'n asiz lo kote drwat tronn Bondye Toupwisan dan lesyel.

² I servi koman Gran-Pret dan sanktyer e vre latant ki'n ganny etabli non pa par zonm, me par Senyer.

³ Annefe, tou Gran-Pret i ganny etabli pour prezant bann lofrann ek bann sakrifis. Alor, i neseser ki li osi, i annan keksoz pour ofer.

⁴ Si i ti lo later, i pa ti pou menm en pret, akoz lo later, i annan lezot pret ki prezant bann lofrann dapre Lalwa Moiz.

⁵ Sa bann pret, fonksyon ki zot pe egzerse, i zis en kopi, en lonbraz sanktyer ki dan lesyel, akoz kan Moiz ti pe etabli sa latant, Bondye ti donn li sa lord: Ou ava fer tou parey sa model ki ou'n ganny montre lo montanny.

⁶ An realite, Kris in ganny etabli dan en servis bokou pli siperyer ki pour lezot pret. Annefe, i lentermedyer dan en meyer lalyans, akoz i'n ganny fonde lo bann pli gran promes.

⁷ Annefe, si sa premye lalyans ti san defo, i pa ti pou neseser annan en dezyenm.

⁸ Me Bondye ti trouv defo avek son pep kan i ti deklare: Sa bann zour pe vini, Senyer i deklare, kan mon pou etabli en nouvo lalyans avek pep Izrael e avek pep Zida.

⁹ I pa pou parey sa lalyans ki mon ti fer avek zot zanset, zour ki mon ti atrap zot lanmen, e fer zot sorti dan pei Lezip. Akoz zot pa ti fidel anver mon lalyans, mon pa ti pran ka avek zot, Senyer i deklare.

¹⁰ Aprezan, la lalyans ki mon pou fer avek pep Izrael: Apre sa bann zour, Senyer ti deklare, Mon pou met mon bann lalwa dan zot lespri. Mon pou ekri li dan zot leker, mon pou vin zot Bondye, e zot ava vin mon pep.

¹¹ Personn pa pou ansenny kanmarad. Personn pa pou ansenny son frer an dizan: Konn Senyer. Annefe, zot tou, zot pou konn mwan, depi pli pti ziska pli gran.

¹² Annefe, mon pou pardonn zot, zot bann fot. Mon pa pou zanmen mazin ankor zot bann pese.

¹³ Kan Bondye ti koz lo en nouvo lalyans, i ti fer sa enn premye vin ansyen. Alor, sa enn ki ansyen e ki'n vyeyi, i pre pou disparet.