Ebre 7 - Labib An Kreol Seselwa

Melkisedek, Lerwa e Pret

¹ Sa Melkisedek, ti lerwa Salenm, pret Bondye Treo. I ti al zwenn Abrahanm ki ti sorti lager kont bann lerwa lo ki i ti'n ganny laviktwar e i ti beni li.

² Abrahanm ti donn li en dizyenm lo tou bann depouy lager. Sa non Melkisedek, i vedir: Lerwa lazistis. I osi lerwa Salenm, savedir: Lerwa lape.

³ Personn pa konn ni son papa, ni son manman, ni son zanset; e son lavi napa ni konmansman, ni lafen. Parey Garson Bondye, i reste pret pour touzour.

⁴ Remarke koman sa personnaz i enportan! Patriars Abrahanm ti donn li ladim lo tou sa ki i ti'n kaptire.

⁵ Bann desandan Levi, ki ti vin pret dapre lalwa, zot annan drwa pran ladim pep Izrael, savedir avek zot bann prop frer, ki pourtan ti osi desandan Abrahanm.

⁶ Melkisedek pa ti sorti dan desandan Levi. Pourtan i ti resevwar ladim avek Abrahanm. Melkisedek ti beni sa enn ki ti'n resevwar promes Bondye.

⁷ Nou napa okenn dout ki sa enn ki beni i siperyer ki sa enn ki ganny beni.

⁸ Dan sa ka, ladim i ganny resevwar par bann zonm mortel; me dan ka Melkisedek, par enn ki'n ganny ateste ki i touzour vivan.

⁹ Anfen, nou kapab dir ki Levi li menm, malgre ki i ti annan drwa resevwar ladim, ti pey ladim atraver Abrahanm,

¹⁰ akoz i ti ankor dan lekor son zanset Abrahanm, kan rankont avek Melkisedek ti ganny fer.

¹¹ Dapre Lalwa pep Izrael, bann pret i devre ganny swazir parmi bann garson tribi Levi. Zot ti pret dapre lord Aaron. Me zot saserdos pa ti parfe, sinon, akfer annan en lot pret dapre lord Melkisedek? Sa pa ti pou neseser.

¹² Me si i annan en sanzman dan saserdos, i osi neseser ki i annan en sanzman dan lalwa saserdos.

¹³ Sa enn anver ki sa bann parol i aplike, i sorti dan en tribi kot personn pa'n deza servi devan lotel.

¹⁴ Nou tou nou konnen ki nou Senyer ti sorti dan tribi Zida, e Moiz pa'n mansyonn nanryen lo sa tribi kan i ti koz lo bann pret.

En Lot Pret parey Melkisedek

¹⁵ Sa i vin pli kler ankor kan en lot pret parey Melkisedek i aparet.

¹⁶ En pret, ki pa'n ganny etabli dapre bann relasyon avek desandans imen. In vin pret par pwisans en lavi ki eternel.

¹⁷ Annefe, la sa ki Lekritir i deklare lo li: Ou en pret pour touzour dapre lord Melkisedek.

¹⁸ Sa i fer ki en vye regleman i'n ganny met de kote. Akoz i pa parfe, i'n vin initil.

¹⁹ Annefe, Lalwa Moiz pa ti kapab rann nanryen parfe. Aprezan, nou'n ganny en lesperans meyer ki permet nou apros kot Bondye.

²⁰ An plis, i annan en serman. Lezot ti vin pret san en tel serman.

²¹ Me Zezi ti ganny etabli pret par serman kan Bondye ti deklare: Senyer in fer sa serman, e i pa pou zanmen sanz son lide: Ou pret pour touzour.

²² Donk, par sa parol, Zezi i garanti nou en meyer lalyans.

²³ I annan ankor en lot diferans: In egziste en kantite pret, akoz lanmor ti anpes zot kontinyen reste pret pour touzour.

²⁴ Me akoz Zezi i vivan pour leternite, son saserdos osi i pour touzour.

²⁵ Pour sa rezon ki i kapab sov pour leternite, dimoun ki apros kot Bondye atraver li, akoz i touzour vivan pour pled dan zot faver.

²⁶ Zezi i sa Gran-Pret ki nou ti bezwen: I sen, inosan, san pese, separe avek tou bann peser e plase pli o ki lesyel.

²⁷ I pa bezwen ofer sakrifis tou le zour, parey lezot Gran-Pret, dabor pour son prop pese, answit pour pese lepep. I'n ofer son lekor an sakrifis en sel fwa pour tou.

²⁸ Annefe, Lalwa Moiz ti etabli koman Gran-Pret, bann zonm ki pa ti parfe. Me parol serman ki'n vin apre lalwa, i etabli en Garson ki'n vin parfe pour leternite.