Ebre 12 - Labib An Kreol Seselwa

Bondye Nou Papa

¹ Nou osi, nou'n ganny antoure par en tel gran lafoul temwen. Annou debaras nou avek tou fardo ki ralanti nou lamars, partikilyerman avek tou pese ki anserkle nou si fasilman. Annou, avek determinasyon, fer sa lakours ki nou'n ganny propoze.

² Annou gard nou regar fikse lo Zezi ki lorizin nou lafwa, ki anmenn li ziska perfeksyon. Olye lazwa ki i ti merite, i'n aksepte lanmor lo lakrwa, san okenn laont. Aprezan i'n asiz lo kote drwat tronn Bondye.

³ Mazin en pe ki mannyer i'n siport otan lopozisyon delapar bann peser. Pa les ou ganny dekouraze, ni dezespere.

⁴ Annefe, dan zot konba kont pese, zot pa'n ankor deza lite ziska versman disan.

⁵ Pa oubliy sa bann parol lankourazman ki Bondye i adres zot koman son bann garson: Mon garson! Pa per koreksyon Senyer. Pa dekouraze kan i repros ou.

⁶ Annefe, Senyer i koriz bann ki i kontan. I pini tou zanfan ki i rekonnet koman son garson.

⁷ Siport ou soufrans koman en koreksyon. Bondye pe tret zot koman son bann garson. Lekel sa garson ki son papa pa korize?

⁸ Si zot pa ganny korize parey tou zanfan, alor, zot pa bann vre zanfan, me bann zanfan ilezitim.

⁹ Pa oubliye ki sakenn nou, nou ti annan en papa lo sa later; i'n koriz nou e nou'n annan respe pour li. Sa i donn nou plis rezon pour nou soumet nou avek nou Papa ki dan lesyel pour nou resevwar lavi.

¹⁰ Nou bann zanset ti koriz nou pour en pti pe letan, dapre mannyer ki zot ti war bon. Me Bondye, i koriz nou pour nou prop byen, pour ki nou partisip dan son sentete.

¹¹ O konmansman, tou koreksyon pa sanble donn lazwa, me latristes. Me plitar, pour tou bann ki ganny disiplinen, i prodwi lape ek lazistis.

Rekomandasyon ek Lavertisman

¹² Pour sa rezon, lev zot lanmen fatige e fortifye zot zenou ki pe tranble.

¹³ Fer bann santye byen drwat pour zot lipye, pour ki sa enn ki bwete pa deranz son lipye, me plito ki i geri.

¹⁴ Fer tou zefor posib pour rod lape avek tou dimoun. Viv en lavi sen, sankwa personn pa pou war Senyer.

¹⁵ Fer atansyon ki personn pa mepriz lagras Bondye. Pa les okenn rasin anmer pouse e koz problenm ki afekte kominote.

¹⁶ Fer atansyon ki personn pa anmenn en lavi imoral. Pa mank respe pour sa ki sakre, parey Ezai ki, pour en sel repa, ti vann son drwa koman lene garson.

¹⁷ Zot konnen ki plitar i ti oule resevwar benediksyon son papa, me i ti ganny rezete. I pa ti trouv okenn fason repanti, menm si i ti rod sa benediksyon avek larm.

¹⁸ Zot pa ti apros keksoz ki zot ti kapab touse kan zot ti al ver montanny Sinai avek son dife feros, fernwanr, teneb, loraz.

¹⁹ Zot pa ti antann son en tronpet ek tapaz en lavwa. Kan bann Izraelit ti antann sa lavwa, zot ti dir pa koz avek zot ankor.

²⁰ Annefe, zot pa ti kapab siporte antann sa lord: Menm si en zannimo i tous sa montanny, i devre ganny saboule akoud ros.

²¹ Sa spektak ti sitan terib, ki Moiz ti dir: Mon tranble avek lafreyer.

²² Me zot, o kontrer, zot in apros montanny Siyon, lavil Bondye ki vivan, Zerizalenm ki dan lesyel, avek son bann mil milyon lanz dan rasanbleman lafet.

²³ Zot, zot in vin dan lasanble bann garson premye ne ki'n ganny anrezistre dan lesyel. Zot in apros Bondye ki ziz tou dimoun, e avek lespri bann zonm zis, ki'n ariv ziska perfeksyon.

²⁴ Zot in apros avek Zezi, medyater nouvo lalyans, e avek son disan verse, ki koz dan en mannyer pli favorab ki disan Abel.

²⁵ Alor, veye ki zot pa refize ekout sa enn ki pe koz avek zot. Bann ki ti refize ekout sa enn ki ti delivre zot lavertisman lo later, pa ti sap pinisyon. I annan plis rezon pour krwar ki nou pa pou kapab sap pinisyon, si nou rezet sa enn ki anons mesaz sorti dan lesyel.

²⁶ Otrefwa, son lavwa ti fer tranble later; me aprezan, i'n promet nou: Mon pou fer tranble ankor en fwa, non selman later, me osi lesyel.

²⁷ Sa parol: Ankor en fwa, i montre klerman ki bann keksoz ki'n ganny kree, pou ganny sekwe e disparet pour ki zis sa ki solid ki reste.

²⁸ Alor, akoz nou pe resevwar en rwayonm ki pa kapab ganny sekwe, annou an rekonesans, servi Bondye dan en mannyer ki fer li plezir, avek soumisyon e avek respe.

²⁹ Annefe, nou Bondye i en dife ki devor tou.