Ebre 11 - Labib An Kreol Seselwa

Lafwa

¹ Lafwa i larealite sa ki nou pe espere, sertitid dan keksoz ki nou pa war.

² Akoz zot lafwa, ki nou bann zanset ti resevwar en bon temwannyaz.

³ Par lafwa, nou konpran ki liniver ti ganny kree par Parol Bondye. Pour sa rezon, sa ki nou war la, in ganny fer avek sa ki nou pa war.

⁴ Par lafwa, Abel ti ofer en meyer sakrifis ki sakrifis Kaen. Akoz lafwa Abel, Bondye ti deklar li zis. Pour sa rezon, i ti aprouv son lofrann. Par son lafwa, Abel pe kontinyen koze menm si i'n mor.

⁵ Par lafwa, Henok ti ganny anleve pour li pa pas par lanmor. Personn pa ti revwar li, akoz Bondye ti'n pran li. Avan sa, i ti'n ganny rekonnet koman enn ki ti fer plezir Bondye.

⁶ San lafwa, personn pa kapab fer plezir Bondye. Annefe, sa enn ki apros kot Bondye i devre krwar ki Bondye i egziste e ki i rekonpans tou dimoun ki rod li.

⁷ Par lafwa, Noe ti ekout bann lavertisman ki Bondye ti donn li konsernan keksoz ki ziska prezan personn pa ti'n ankor war. Noe ti obei e konstri en bato pour sov son fanmir. Konmsa, i ti kondann lemonn, e gras a son lafwa, Bondye ti rekonnet li koman en zonm zis.

⁸ Par lafwa, Abrahanm ti obei, kan Bondye ti apel li: I ti al dan en pei ki i ti pou resevwar koman son posesyon. I ti kit son prop pei san konnen kote i ti pe ale.

⁹ Par lafwa, i ti viv koman en etranze dan sa pei ki i ti'n ganny promet. I ti reste anba latant avek Izaak ek Zakob, bann zeritye menm promes.

¹⁰ Annefe, Abrahanm ti pe esper sa lavil ki annan fondasyon solid, sa enn ki Bondye i li menm arsitek e konstrikter.

¹¹ Par lafwa, Sara osi, menm si i ti byen aze, ti ganny pouvwar fer zanfan, akoz i ti krwar ki Bondye ki'n fer sa promes, pou osi realiz li.

¹² Pour sa rezon, par zis en zonm, menm si i ti pre pour mor, Bondye in fer sorti en kantite desandans parey zetwal dan lesyel e parey gren disab lo bor lanmer.

¹³ Zot tou, zot in mor dan lafwa, san ki zot ti'n resevwar sa ki zot ti'n ganny promet. Me zot in war li dan lwen e zot in rezoui. Zot ti deklare ki zot ti bann etranze e bann egzile lo later.

¹⁴ Sa bann ki ti koz konmsa, ti montre klerman ki zot ti pe rod en patri.

¹⁵ Si zot ti'n kontinyen mazin sa pei ki zot ti'n kite, zot ti ava'n ganny letan retourn laba.

¹⁶ An realite, zot ti pe esper enn pli meyer, setadir, lesyel menm. Pour sa rezon, Bondye pa onte pour ganny apele zot Bondye, akoz i'n prepar en lavil pour zot.

¹⁷ Par lafwa, kan Bondye ti teste li, Abrahanm ti ofer Izaak an sakrifis. I ti pare pour ofer son sel garson an sakrifis, alor ki i ti'n resevwar en promes.

¹⁸ Pourtan, i ti'n ganny dir: Se par Izaak ki ou pou ganny en desandans.

¹⁹ I ti mazinen dan li menm ki Bondye i menm annan sa pouvwar pour resisit en dimoun ki'n mor. Pour sa rezon, Abrahanm ti reganny son garson. Sa levennman i annan en valer senbolik.

²⁰ Par lafwa, Izaak ti donn Zakob ek Ezai en benediksyon ki ti konsern zot lavenir.

²¹ Par lafwa, zis avan i mor, Zakob ti beni sak garson Zozef. I ti apiy lo son baton e ador Bondye.

²² Par lafwa, ver lafen son lavi, Zozef ti anonse ki bann Izraelit pou kit Lezip. I ti dir ki fodre fer avek son lezo.

²³ Par lafwa, bann paran Moiz ti kasyet li pandan trwa mwan apre son nesans. Zot ti war ki i ti en zoli zanfan e zot pa ti per dezobei lord lerwa.

²⁴ Par lafwa, kan i ti'n gran, Moiz, ti refize ganny apele garson fiy Faraon.

²⁵ I ti prefere ganny maltrete ansanm avek pep Bondye, plito ki zouir plezir pese pandan en pti pe letan.

²⁶ I ti aksepte ganny meprize parey Kris, ki i ti konsider koman en larises pli gran valer ki bann trezor Lezip. Annefe, son regar ti fikse lo rekonpans fitir.

²⁷ Par lafwa, Moiz ti kit Lezip, san ki i ti per lakoler lerwa. I ti persevere konmsi i ti pe war sa enn ki envizib.

²⁸ Par lafwa, i ti selebre Pak e donn lord pour asperz disan lo laport bann lakaz, pour ki lanz ki donn lanmor, pa touy bann premye ne parmi pep Izrael.

²⁹ Par lafwa, pep Izrael ti travers lanmer Rouz konmsi ti later sek. Me kan bann Ezipsyen ti esey fer parey, zot tou, zot ti noye.

³⁰ Par lafwa, miray Zeriko ti tonbe, apre ki pep Izrael ti'n fer letour pandan set zour.

³¹ Par lafwa, Rahab, sa prostitye, pa ti ganny detri avek bann lennmi Bondye, akoz i ti'n byen akeyir bann espyon.

³² Ki mon devre dir ankor? Napa ase letan pour mwan koz lo Zedeon, Barak, Sanmson, Zefte, David, Samyel, ek bann profet.

³³ Par lafwa, zot ti ganny laviktwar lo bann rwayonm; zot ti etabli lazistis e ganny sa ki Bondye ti'n promet: I ti ferm lagel bann lyon,

³⁴ tenny dife vyolan, evite ganny masakre par lepe. Menm si zot ti feb, zot ti repran lafors. Zot ti vayan dan konba e bat bann larme etranze.

³⁵ Par lafwa, bann fanm ti resevwar vivan, zot fanmir ki ti'n mor. Lezot ti ganny tortire ziska lanmor. Zot ti refize ganny delivre pour zot kapab resisite pour en lavi meyer.

³⁶ Lezot ankor, ti siport bann mokri, ganny fwete. Serten ti ganny ansennen e met dan prizon.

³⁷ Serten ti ganny touye a koud ros; lezot ti ganny sye an de, oubyen ganny masakre par lepe. Zot ti eran, sorti dan en landrwa pour al dan en lot, kouver zis avek en lapo mouton oubyen lapo kabri, pov, persekite, e maltrete.

³⁸ Lemonn ti napa okenn valer pour zot. Zot ti eran dan dezer e dan montanny. Zot ti viv dan kavern ros, e bann trou dan later.

³⁹ Tou sa bann dimoun in ganny rekonnet par Bondye akoz zot lafwa. Pourtan, zot pa'n resevwar sa ki zot ti'n ganny promet.

⁴⁰ Annefe, Bondye ti annan en meyer plan pour nou, pour ki zot ariv dan perfeksyon ansanm avek nou.