Ebre 10 - Labib An Kreol Seselwa

¹ Annefe, Lalwa Moiz pa reprezant egzakteman bann realite. I zis en reprezantasyon bann realite ki pou ganny manifeste plitar. I pa pou zanmen kapab, par sa bann sakrifis ki reste parey toulezan, rann parfe bann dimoun ki apros devan Bondye.

² Si dimoun ki ofer en tel kilt anver Bondye, ti'n ganny pirifye en fwa pour tou, pour zot pese, zot pa ti pou kontinyen santi zot koupab. Pa ti pou bezwen ofer sakrifis ankor.

³ An realite, sa bann sakrifis i rapel dimoun zot pese lannen apre lannen,

⁴ akoz i enposib fer disparet pese par disan toro ek bouk.

⁵ Se pour sa rezon, kan Kris ti pe vin dan lemonn, i ti dir Bondye: Ou pa oule ni sakrifis, ni lofrann, me ou'n prepar en lekor pour mwan.

⁶ Ou pa aksepte ni zannimo brile lo lotel, ni sakrifis pour pardon pese.

⁷ Alor, mon ti dir: Mon Bondye! La mon la. Parey i'n ekri lo mon size dan Lekritir, Mon vin fer ou lavolonte.

⁸ Dabor Zezi ti deklare: Ou pa'n oule e ou pa'n aksepte ni sakrifis, ni lofrann, ni zannimo brile lo lotel, ni sakrifis pour pardon pese. Pourtan, sa i bann lofrann ki Lalwa Moiz i ordonnen.

⁹ Answit i ti azoute: La mon pe vini pour fer ou lavolonte. Donk, i aboli bann ansyen sakrifis ki i ranplas par sa enn ki pour li.

¹⁰ Zezi-Kri in fer lavolonte Bondye. I'n ofer li menm en fwa pour tou. Konmsa ki nou pese in ganny pardonnen.

¹¹ Tou pret i ranpli son servis tou le zour. Toultan, i prezant menm sakrifis ki pa zanmen kapab fer disparet pese.

¹² Kris par kont, apre ki i'n ofer en sel sakrifis pour pardon tou pese en fwa pour tou, in asiz lo kote drwat Bondye pour touzour.

¹³ Aprezan, i pe espere ki Bondye i soumet son bann lennmi anba son lipye.

¹⁴ Ensi, par en sel lofrann, in rann parfe pour touzour, tou dimoun ki'n ganny pirifye.

¹⁵ Lespri Sen osi i ateste sa pour nou, apre ki i ti deklare:

¹⁶ Sa i lalyans ki mon pou fer avek zot apre sa bann zour, Senyer i deklare: Mon pou met mon bann lalwa dan zot leker, e mon pou ekri zot dan zot lespri.

¹⁷ I ti azoute: Mon pa pou rapel ankor zot pese ek bann fot ki zot in komet.

¹⁸ Alor, kan pese in ganny pardonnen, lofrann pour pardon pese pa neseser.

Annou Vin Pli Pre avek Bondye

¹⁹ Mon bann frer! Dezormen, nou annan konfyans ki, par disan Zezi ki'n ganny verse, nou ava kapab antre libreman dan sanktyer.

²⁰ I'n ouver pour nou en nouvo semen vivan atraver rido, setadir par son prop lekor.

²¹ Nou annan aprezan, en Gran-Pret ki'n pran ansarz lakaz Bondye.

²² Alor, annou apros ver Bondye avek en leker senser, ranpli avek konfyans, avek en leker pirifye avek tou sa ki donn en move konsyans e en lekor lave avek en delo pir.

²³ Annou tenir ferm nou lesperans, akoz sa enn ki'n fer sa promes i fidel.

²⁴ Annou rode koman nou pou kapab ankouraz kanmarad pour annan lanmour e fer sa ki byen.

²⁵ Annou pa abandonn nou lasanble parey serten parmi zot i abitye fer, me ankouraz kanmarad, sirtou la ki sa Zour Senyer pe aprose.

²⁶ Si nou kontinyen fer pese volonterman, apre ki nou'n konn laverite, pou nepli annan sakrifis ki kapab fer disparet nou pese.

²⁷ I reste zis pour espere dan lafreyer, Zizman Bondye ek sa dife feros ki pou devor tou son bann lennmi.

²⁸ Kan en dimoun i dezobei Lalwa Moiz, i ganny touye san pitye, apre ki i'n ganny trouve koupab lo levidans de, oubyen trwa temwen.

²⁹ Alor, mazinen ki pou arive, avek sa enn ki mepriz Garson Bondye, ki konsider disan lalyans Bondye ki'n pirifye li, koman en keksoz san valer, e ki ensilte Lespri ki donn lagras! Pinisyon ki i merite pou sertennman pli sever.

³⁰ Annefe, nou konn sa enn ki ti deklare: Mwan ki pou fer vanzans, mwan ki pou donn lapey an retour. I'n osi dir: Senyer pou ziz son pep.

³¹ I terib pour tonm dan lanmen Bondye ki vivan.

³² Rapel zot sa ki ti arive avek zot apre ki zot ti'n resevwar lalimyer Bondye: Zot in bokou soufer e zot in bezwen siport en gro konba.

³³ Parfwa, zot ti ganny ensilte e maltrete piblikman. Parfwa, zot ti solider avek bann ki ti pe ganny maltrete.

³⁴ Zot ti annan konpasyon pour bann prizonnyen; kan zot byen ti ganny sezi, zot ti aksepte sa avek lazwa, akoz zot ti konnen ki zot ti posed bann byen bokou meyer ki dire pour touzour.

³⁵ Alor, pa perdi konfyans e zot ava ganny en gran rekonpans.

³⁶ Zot bezwen persevere pour akonpli lavolonte Bondye e resevwar sa ki i'n promet zot.

³⁷ Parey Lekritir i deklare: Ankor en pti pe letan, en pti pe menm, sa enn ki pe vini pou arive, i pa pou tarde.

³⁸ Me sa enn ki zis, pou viv par lafwa. Mon pa pran plezir avek sa enn ki retourn annaryer.

³⁹ Nou, nou pa parmi sa bann dimoun ki retourn annaryer e ki ganny detri. Okontrer, nou parmi bann ki annan lafwa e ki pou ganny sove.