Deterononm 8 - Labib An Kreol Seselwa

Ledikasyon Pep Izrael dan Dezer

¹ Ou ava gard tou bann komannman ki mon ordonn ou ozordi. Konmsa, ou ava viv e vin nonbre. Ou ava antre e pran posesyon sa pei ki SENYER ti'n promet par en serman avek ou bann zanset.

² Ou ava rapel sa long semen kot SENYER, ou Bondye in akonpanny ou pandan 40 an dan dezer, pour li imilye ou, teste ou; pour li konnen ki ou annan dan ou leker, si ou pou gard son bann komannman oubyen non.

³ In imilye ou; in fer ou konn lafen pour li apre nouri ou avek lamann ki ni ou, ni ou bann zanset pa ti konnen. I ti fer sa pour ou konpran ki zonm pa viv zis lo dipen, me lo tou parol ki sorti dan labous SENYER.

⁴ Pandan sa 40 an, ou lenz pa ti ize lo ou, ni ou lipye pa ti anfle.

⁵ Rekonnet alor dan ou leker, ki, parey en paran i disiplin son zanfan, SENYER, ou Bondye i disiplin ou.

⁶ Alor, obzerv bann komannman SENYER, ou Bondye. Mars parey i oule e dan respe anver li.

⁷ SENYER, ou Bondye pe fer ou antre dan en bon pei, en pei kot i annan bann larivyer, bann sours delo ek bann sours souteren ki vin koul dan bann vale e dan bann kolin.

⁸ I en pei kot i annan bokou dible avek lorz, plantasyon rezen, pye fig ek pye grenad; en pei kot i annan bokou pye zoliv avek dimyel.

⁹ I en pei kot ou ava kapab manze san bezwen priv ou, laba, kot ou pa pou mank nanryen. Dan sa pei, i annan bokou fer dan bann ros e ou ava kapab tir kwiv dan son bann kolin.

¹⁰ Ou ava manze ziska ki ou ava rasazye; ou ava alor, beni SENYER, ou Bondye pour sa pei ki i'n donn ou.

¹¹ Fer atansyon ou pa oubliy SENYER, ou Bondye e neglize obzerv son bann komannman, lalwa ek regleman ki mon pe ordonn ou ozordi.

¹² Zot ava manze zot vant plen; zot ava konstri bann zoli lakaz kot zot ava viv.

¹³ Zot bann troupo ava ogmante; ou kantite larzan, ou lor ek tou sa ki ou annan ava double.

¹⁴ Fer atansyon alor, ki ou pa oubliy SENYER, ou Bondye ki'n fer ou sorti Lezip kot ou ti lesklav.

¹⁵ I ti gid ou atraver gran dezer ki fer per ek en later ranpli avek serpan anpwazonnen, skorpyon. Kot ti napa okenn delo, i ti fer delo sorti dan ros granit pour ou.

¹⁶ Dan dezer ki ou bann zanset pa ti konnen, i ti donn ou lamann pour manze, pour li imilye ou e teste ou, e alafen, pour ou prop dibyen.

¹⁷ Fer atansyon! Pa dir dan ou menm: Mon'n ganny mon larises par mon lafors ek mon pwisans.

¹⁸ Rapel byen SENYER, ou Bondye akoz ou lafors ek ou larises i sorti kot li. Konmsa, i ava etabli son lalyans ki i ti fer par en serman avek ou bann zanset; sa ki i pe fer ozordi.

¹⁹ Si ou oubliy SENYER, ou Bondye pour swiv lezot bondye, servi zot e ador zot, mon pe averti ou solannelman ozordi ki ou pou disparet.

²⁰ Zot pou disparet parey bann nasyon ki SENYER pou detri devan ou, akoz zot pa'n obei lavwa SENYER, ou Bondye.