Deterononm 6 - Labib An Kreol Seselwa

Pli Gran Komannman

¹ La bann komannman, regleman ek lalwa ki SENYER, zot Bondye i ordonn mwan pour ansenny zot, e ki zot ava obzerv dan sa pei ki zot pe al traverse pour pran posesyon.

² Konmsa, zot, zot bann zanfan ek zot bann pti zanfan, ava annan respe pour SENYER, zot Bondye tou le zour zot lavi. Zot ava gard tou son bann regleman ek son bann komannman ki mon pe donn zot, pour ki zot viv lontan.

³ Izrael! Ekoute alor, e obzerv byen sa bann komannman. Konmsa, zot ava viv ere e zot ava ganny bokou zanfan dan sa pei kot dile ek dimyel i koule annabondans, parey SENYER, Bondye ou bann zanset in promet zot.

⁴ Izrael! Ekoute. SENYER, nou Bondye i sel SENYER.

⁵ Ou ava kontan SENYER, ou Bondye avek tou ou leker, avek ou et antye e avek tou ou lafors.

⁶ Gard dan ou leker, tou sa bann komannman ki mon pe donn ou ozordi.

⁷ Ou ava ansenny zot avek ou bann zanfan. Ou ava koz lo zot ler ou dan lakour, ler ou pe marse lo semen, ler ou pe al dormi e ler ou reveye.

⁸ Atas zot avek ou pwannyen koman en siny. Fikse zot koman en mark lo ou fron.

⁹ Ekri zot lo bann lento laport ou lakaz e lo laport ou bann lavil.

Lavertisman kont Dezobeisans

¹⁰ Kan SENYER, ou Bondye ava'n fer ou antre dan sa pei ki i'n promet avek ou bann zanset, Abrahanm, Izaak ek Zakob, pour li donn ou avek bann gran, zoli lavil ki ou pa ti konstri;

¹¹ bann lakaz ranpli avek en kantite bon keksoz ki ou pa'n anmennen; bann pwi ki ou pa'n fouye, bann plantasyon rezen ek pye zoliv ki ou pa'n plante. Ler ou ava'n manze e rasazye,

¹² fer atansyon ou pa oubliy SENYER ki ti fer ou sorti dan pei Lezip kot ou ti dan lesklavaz.

¹³ Ou ava annan respe pour SENYER, ou Bondye e ou ava servi li; ou ava pret serman zis lo son non.

¹⁴ Zot pa pou swiv lezot bondye ki parmi sa bann pep ki viv otour zot,

¹⁵ akoz SENYER, ou Bondye ki viv parmi ou, i en Bondye zalou. Lakoler SENYER, ou Bondye i kapab anflanmen kont ou e detri ou lo later.

¹⁶ Zot pa pou teste SENYER, zot Bondye, parey zot ti fer Massa.

¹⁷ Gard byen bann komannman SENYER, zot Bondye, bann lalwa e bann regleman ki i'n donn zot.

¹⁸ Fer sa ki drwat e sa ki byen devan SENYER, pour ou kapab antre e viv ere dan sa pei ki SENYER in fer serman avek ou bann zanset pour li donn zot.

¹⁹ SENYER pou sas lwen, tou zot bann lennmi, parey in promet.

²⁰ Plitar, kan zot bann zanfan ava demann zot: Akfer sa bann lalwa, regleman ek desizyon ki SENYER, nou Bondye in ordonn zot?

²¹ Zot ava dir: Nou ti bann lesklav Faraon Lezip; me par son pwisans, SENYER in tir nou Lezip.

²² Devan nou lizye, SENYER in fer bann gran siny ek mervey kont Lezip, kont Faraon ek tou son bann zofisye.

²³ In fer nou sorti laba, pour fer nou antre isi dan sa pei ki i ti'n promet par en serman avek nou bann zanset pour li donn nou.

²⁴ Alor, SENYER ti ordonn nou pour obzerv tou sa bann regleman. Nou pou touzour ere, si nou annan respe pour SENYER, nou Bondye; i pou gard nou vivan parey i pe fer ozordi.

²⁵ Nou ava ganny konsidere zis, si nou met an pratik tou bann komannman ki SENYER, nou Bondye in ordonn nou.