Deterononm 32 - Labib An Kreol Seselwa

Kantik Moiz

¹ Lesyel! Ekout sa ki mon pe al dir. Later! Ekout byen parol ki sorti dan mon labous.

² Mon lansennyman i tonm parey lapli, e mon bann parol i koule parey gout laroze; parey grenas lo zerb, parey bann gout delo lo gazon.

³ Mon pou proklanm non SENYER, rekonnet ki nou Bondye i gran.

⁴ I en Ros protekter. Son bann aksyon i parfe e tou son bann semen i zis. I en Bondye fidel, zanmen enzis. I zis e drwat.

⁵ Zot in vin koronpi, zot ki ti ganny kree san defo, en zenerasyon dezenere e fourb.

⁶ Pep ensanse e fou! Konmsa ki ou remersye SENYER? Pa li ou papa ki'n kree ou, ki'n form ou e ki'n fer ou vin en pep?

⁷ Mazin letan pase; rapel bann lannen ki'n pase. Demann ou papa e i ava enform ou; demann ou bann zanset e zot ava rakont ou.

⁸ Kan Bondye Treo ti donn bann nasyon zot patrimwann, kan i ti separ bann imen, i ti fikse teritwar bann pep; i ti plas sak pep anba lotorite en et seles.

⁹ SENYER ti swazir son pep koman son par, desandan Zakob pour son patrimwann.

¹⁰ I ti trouv li dan en pei dezer, dan en teritwar abandonnen. I ti protez li, pran swen avek li, gard li parey son kannet lizye,

¹¹ parey en leg ki vey lo son nik, e anvole par lao son bann piti. I depliy son lezel, pran zot e anmenn zot anba son proteksyon.

¹² SENYER tousel ki ti son gid. Ti napa okenn bondye etranze avek li.

¹³ I ti plas li lo oter pei e fer li manz prodwi pei. I ti fer li manz dimyel sorti dan ros avek delwil sorti dan ros granit;

¹⁴ lakrenm sorti dan son troupo e dile sorti kot son bann mouton, avek lagres bann zenn mouton, bann toro ek bann kabri sorti Basann, ansanm avek dible meyer kalite. Ou ti bwar meyer diven sorti dan disan bann grap rezen.

¹⁵ Yesouroun ti vin gra e i ti rezenbe. Ou ti vin gra e boufi. I ti abandonn Bondye son kreater e mepriz Ros protekter son sover.

¹⁶ Zot ti rann li zalou avek bann bondye etranze. Zot ti provok li avek bann lobze degoutan.

¹⁷ Zot ti ofer sakrifis avek bann demon, pa anver Bondye, anver bann bondye ki zot pa'n zanmen konnen, anver bann bondye ki zot ti'n fek dekouver, ki zot bann zanset pa ti adore.

¹⁸ Ou ti oubliy sa Ros protekter ki ti met ou omonn. Ou ti oubliy sa Bondye ki ti donn ou lavi.

¹⁹ SENYER ti war sa e i ti vekse. I ti rezet son bann garson ek son bann fiy.

²⁰ I ti dir: Mon pou deles zot. Mon pou gete sa ki zot pou devenir, akoz zot en zenerasyon dezenere, en bann zanfan san fidelite.

²¹ Zot ti rann mwan zalou avek bann fo bondye; zot ti provok mwan avek zot bann zidol. Alor, mon pou rann zot zalou avek bann dimoun ki pa en pep, provok zot avek en nasyon fou.

²² Annefe, en dife in ganny alimen par mon lakoler ki pe brile ziska dan fon lemonn lanmor. I devor later ek tou sa ki i prodwir. I bril ziska fondasyon bann montanny.

²³ Mon pou fer tou kalite maler tonm lo zot, e tir tou mon bann fles kont zot.

²⁴ Lafen pou afebli zot, lafyev ek bann lepidemi pou devor zot. Mon pou anvoy kont zot bann bebet feros e venen bann bebet ki ranpe dan lapousyer.

²⁵ Dimoun pou ganny masakre dan lari. Dan bann lakaz, zennzan, zenn fiy, pti baba ki ankor pe tete, vyeyar avek seve blan zot tou, zot pou mor avek lafreyer.

²⁶ Mon ti'n mazinen detri zot konpletman e fer zot disparet parmi bann imen.

²⁷ Me mon ti per provokasyon lennmi. Zot bann ladverser ava riske mal konpran e dir: Nou lanmen ki pwisan pa SENYER ki'n fer tousala.

²⁸ Izrael i en nasyon ki pa konpran. Zot napa okenn disernman.

²⁹ Si zot ti saz, zot ti ava'n konpran sa; zot ti ava'n disern zot lavenir.

³⁰ Ki mannyer en zonm tousel i kapab atak mil, de zonm pa kapab fer taye dis mil, si zot Ros protekter pa ti'n vann zot e SENYER pa ti'n livre zot dan pouvwar lennmi?

³¹ Me zot protekter pa parey nou Ros protekter; menm nou bann lennmi i rekonnet.

³² Zot boutir rezen i sorti dan en plan ki sorti Sodonm dan plantasyon rezen Gomor; zot rezen i bann rezen anpwazonnen, zot bann grap i anmer.

³³ Zot diven i venen dragon, pwazon vyolan bann serpan.

³⁴ Sa en sekre ki mon'n kasyet, ki'n sele parmi mon bann trezor.

³⁵ Mwan ki fer vanzans, mwan ki donn rekonpans zour zot lipye ava glise, akoz zour zot maler pa pe tarde, zot desten pe ariv an vites.

³⁶ Annefe, SENYER pour ziz son pep; i pou pran pitye pour son bann serviter, akoz i pou war ki zot lafors in fini e ki nepli annan ni lesklav ni zonm lib.

³⁷ Alor i ava dir: Oli zot bann bondye kot zot ganny labri?

³⁸ Oli sa ki ti manz lagres zot bann sakrifis e bwar diven zot bann lofrann? Zot devre leve e vin sekour zot, oubyen vin protez zot.

³⁹ Aprezan, gete! Mwan menm mwan, zis mwan ki la; napa en lot bondye apar mwan. Mwan ki donn lanmor e ki donn lavi. Mwan ki blese e ki geri. Personn pa kapab delivre sa enn ki dan mon lanmen.

⁴⁰ Mon lev mon lanmen ver lesyel e mon deklare: Osi vre ki mon vivan pour touzour,

⁴¹ si mon fit mon lepe klate e mon lanmen i pronons zizman, mon pou vanz mon bann ladverser e pey an retour sa bann ki ay mwan.

⁴² Mon pou fer mon bann fles soule avek disan e mon lepe pou devor zot laser avek disan bann blese ek bann prizonnyen, bann lennmi avek seve long.

⁴³ Bann nasyon! Aklanm son pep, akoz SENYER pou vanz disan son bann serviter e son vanzans pou tonm lo son bann ladverser. I ava fer peye sa bann ki ay li e pirifye later son pep.

⁴⁴ Moiz avek Zozye, garson Noun, ti vin repet tou bann parol sa kantik devan lepep.

Dernyen Lord Moiz

⁴⁵ Ler Moiz ti'n fini ansenny tou sa bann parol pep Izrael antye,

⁴⁶ i ti dir zot: Reflesi lo tou sa bann parol ki mon pe donnen an temwannyaz kont zot ozordi; ordonn ou bann zanfan pour gard zot, pour ki zot ava byen met an pratik tou bann parol sa lalwa.

⁴⁷ Annefe, sa pa bann parol vid, me i zot lavi; par sa bann parol, zot ava viv lontan dan pei ki zot pe al pran posesyon, apre ki zot ava'n travers larivyer Zourden.

Lanmor Moiz I Ganny Anonse

⁴⁸ Sa menm zour, SENYER ti koz avek Moiz. I ti dir li:

⁴⁹ Mont lo montanny Abarim, lo montanny Nebo ki dan pei Moab, anfas avek Zeriko, e get pei Kanaan ki mon pou donn bann Izraelit pour zot patrimwann.

⁵⁰ Ou pou mor la, lo sa montanny kot ou'n monte. Ou pou al rezwenn ou bann zanset, parey ou frer Aaron ki ti mor lo montanny Hor, kot i ti al rezwenn son bann zanset.

⁵¹ Annefe, tou le de, zot ti dezobei mwan devan bann Izraelit pre avek sours Meriba ki Kades dan dezer Sin, ler zot pa ti rekonnet mon sentete parmi bann Izraelit.

⁵² Ou ava kapab war sa pei devan ou; me ou pa pou antre dan sa pei ki mon pe al donn bann Izraelit.