Deterononm 30 - Labib An Kreol Seselwa

Izrael Pou Retourn ver Bondye

¹ Kan tousala ava'n realize avek ou, bann benediksyon ek bann malediksyon ki mon'n met devan ou, ou ava reflesi la kot SENYER, ou Bondye in dispers ou parmi bann nasyon;

² si ou retourn ver SENYER, ou Bondye, ou, avek ou bann zanfan, e obei li avek ou leker, avek ou et antye, egzakteman parey mon pe ordonn ou ozordi,

³ alor, SENYER, ou Bondye ava retabli ou sityasyon. I ava annan konpasyon pour ou e rasanble ou ankor parmi tou bann pep kot SENYER, ou Bondye ti'n dispers ou.

⁴ Menm si ou pou ganny disperse atraver later antye, SENYER, ou Bondye pou rasanble ou e retourn avek ou depi kot ou ete.

⁵ SENYER, ou Bondye ava fer ou retourn dan pei ki ou bann zanset ti pran posesyon. I ava fer ou vin pli ris e pli nonbre ki ou bann zanset.

⁶ SENYER, ou Bondye pou osi sirkonsi ou leker ek leker ou bann desandan, pour ki ou kontan SENYER, ou Bondye avek tou ou leker, tou ou et, e ou ava kapab viv.

⁷ SENYER, ou Bondye ava anvoy tou sa bann malediksyon lo ou bann lennmi e lo bann ki'n fer ou soufer,

⁸ tandis ki ou, ou ava retourn ver SENYER; ou ava obei tou son bann komannman ki mon pe ordonn ou ozordi.

⁹ SENYER, ou Bondye ava fer ou prospere en kantite dan tou sa ki ou ava antreprann. Ou ava ganny en kantite zanfan; ou bann bef, mouton, kabri ava ogmante, ou later ava prodwir bon rekolt. Annefe, parey i ti kontan ou bann zanset, SENYER ava kontan ou e fer ou prospere,

¹⁰ si ou obei SENYER, ou Bondye e obzerv son bann komannman ek lalwa ki'n ganny ekri dan sa liv; si ou retourn ver SENYER, ou Bondye avek tou ou leker e tou ou et.

Parol Bondye I Pros

¹¹ Sertennman, sa bann komannman ki mon pe ordonn ou ozordi i pa tro difisil pour ou obei, ni tro difisil pour ou met an pratik.

¹² Sa bann komannman pa dan lesyel pour ki zot dir: Lekel ki pou mont dan lesyel pour al sers zot pour ki nou ava kapab antann zot e met zot an pratik?

¹³ Zot pa ni lwen lo lot kote lanmer pour ki ou devre dir: Lekel ki pou travers lot kote lanmer pour anmenn zot pour nou, pour ki nou ava kapab antann zot e met zot an pratik?

¹⁴ O kontrer, sa parol i tre pre avek ou; i dan ou labous, i dan ou leker pour ou met li an pratik.

Swazir Lavi

¹⁵ Gete! Ozordi, mon met devan ou lavi ek boner, lanmor ek maler.

¹⁶ La sa ki mon pe ordonn ou ozordi: Obei bann komannman SENYER, ou Bondye, kontan SENYER, ou Bondye; mars dan son semen; obzerv son bann komannman, regleman ek lalwa, pour ki ou vin nonbre. SENYER, ou Bondye ava beni ou dan sa pei kot ou pe al antre pour pran posesyon.

¹⁷ Me si ou leker i detournen, si ou pa ekoute, si ou les ou ganny antrennen pour prosternen devan lezot bondye e servi zot,

¹⁸ la, ozordi, mon deklare, zot pou disparet. Zot pa pou viv lontan dan sa pei kot ou pe al antre pour pran posesyon lot kote larivyer Zourden.

¹⁹ Ozordi, mon pran lesyel ek later koman temwen kont ou: La mon met devan ou lavi ek lanmor, benediksyon ek malediksyon. Swazir lavi, pour ki ou viv, ou, avek ou bann desandan.

²⁰ Kontan SENYER, ou Bondye, obei li e reste atase avek li, pour ki ou viv lontan e reste dan sa pei ki SENYER in fer serman pour donn ou bann zanset, Abrahanm, Izaak ek Zakob.