Deterononm 29 - Labib An Kreol Seselwa

¹ La bann parol lalyans ki SENYER ti ordonn Moiz pour fer avek bann Izraelit dan pei Moab. Sa i an plis ki sa lalyans ki i ti fer avek zot lo montanny Horeb.

Senyer I Renouvle Lalyans avek Izrael

² Moiz ti konvok pep Izrael antye. I ti dir zot: Zot in war avek zot lizye tou sa ki SENYER in fer Faraon, son bann serviter ek son pei antye.

³ Zot in war bann gran leprev ki i'n anvoye, bann siny ek bann gran mervey ki i'n fer.

⁴ Me ziska ozordi, SENYER pa'n donn zot en lespri disernman pour konpran, ni lizye pour war, ni zorey pour tande.

⁵ Pandan 40 an, mon'n kondwir zot dan dezer. Lenz ki ti lo zot pa'n ize e sandal dan zot lipye pa'n ize.

⁶ Zot pa'n manz dipen, zot pa'n bwar diven ni okenn labwason for, pour ki zot konnen ki mwan menm SENYER, zot Bondye.

⁷ Kan zot ti ariv isi dan sa landrwa Sihonn, lerwa Hesbonn, ek Og, lerwa Basann ti atak nou. Me nou ti bat zot.

⁸ Nou ti pran zot pei ki nou ti donn bann Ribenit, bann Gadit ek demi tribi Manase koman zot patrimwann.

⁹ Alor, met byen an pratik bann parol sa lalyans, pour zot reisi dan tou sa ki zot antreprann.

¹⁰ Ozordi, zot tou, zot in rasanble devan SENYER, zot Bondye, dan prezans bann sef sak tribi, zot bann ansyen ek zot bann zofisye, tou bann zonm dan Izrael.

¹¹ Zot bann zanfan, zot bann fanm, zot osi prezan. Dan zot kan i annan osi bann etranze, bann ki koup dibwa pour ou ek bann ki al sers delo pour ou.

¹² Ozordi, SENYER, ou Bondye pe antre dan en lalyans avek ou, ki SENYER, ou Bondye ti fer par en serman, ki SENYER, ou Bondye pe al fer avek ou, pour ki

¹³ i etabli ou ozordi koman son pep e li menm i ava vin ou Bondye. Sa, i ti promet par en serman ki i ti fer avek ou bann zanset Abrahanm, Izaak ek Zakob.

¹⁴ Mon pe fer sa lalyans par en serman, pa zis avek zot ki ozordi pe debout devan nou e devan SENYER, nou Bondye,

¹⁵ me osi avek bann ki pa la parmi nou ozordi.

¹⁶ Zot konnen ki mannyer nou lavi ti ete Lezip e ki mannyer nou'n travers teritwar bann nasyon.

¹⁷ Zot in war zot bann lobze degoutan, zot bann stati an bwa, an ros, annarzan, annor.

¹⁸ I pa sipoze annan parmi zot en zonm, en fanm, en fanmir, en tribi, ki son leker in detourn kont SENYER, nou Bondye, pour al servi bann bondye sa bann nasyon. I pa devre annan parmi zot, rasin en plant ki prodwir en pwazon anmer.

¹⁹ Zot tou ki'n antann bann parol sa serman, pa felisit zot lekor par dir dan zot leker: Nou an sekirite menm si nou persiste dan nou move konportman, konmsi later ki'n ganny aroze, nepli swaf.

²⁰ SENYER pa pou pardonn zot, akoz lakoler ek zalouzi SENYER pou monte kont zot. Tou bann malediksyon ki'n ganny ekri dan sa liv ava tonm lo zot e SENYER ava efas zot non anba lesyel.

²¹ SENYER ava separ zot avek tou lezot tribi Izrael, dapre bann malediksyon lalyans ki'n ganny ekri dan sa liv lalwa, e pour zot maler.

²² Bann zenerasyon fitir, zot bann zanfan ki ava vin apre zot, ek etranze ki sorti dan en pei lwen, kan zot ava war fleo dan sa pei ek bann maladi ki SENYER in tap li avek, zot ava dir:

²³ Son pei antye in ganny brile par souf ek disel, napa nanryen ki pouse, okenn boutir, okenn vezetasyon; parey dan destriksyon ki ti ariv avek Sodonm ek Gomor, Adma ek Zeboim ki SENYER ti detri dan son gran lakoler.

²⁴ Alor, tou bann nasyon ava demande: Akoz SENYER in fer sa avek sa pei? Kwa ki'n fer monte en si gran lakoler?

²⁵ Zot ava reponn: Sa ti akoz zot ti'n abandonn lalyans ki SENYER, Bondye zot zanset ti fer avek zot, ler i ti tir zot Lezip.

²⁶ Zot ti vire e al servi lezot bondye e ador zot; bann bondye ki zot pa ti konnen e ki SENYER pa'n zanmen donn zot pour patrimwann.

²⁷ Alor, lakoler SENYER ti alimen kont sa pei e anmenn tou bann malediksyon ki'n ganny ekri dan sa liv.

²⁸ Dan son gran lakoler e avek endinyasyon, SENYER ti derasin zot lo zot later e zet zot dan en lot pei, parey sa ki pe arive ozordi.

²⁹ Zis SENYER, nou Bondye ki konn bann keksoz sekre. Sa ki'n ganny revele i pour nou e pour nou bann zanfan pour touzour, pour ki nou met an pratik tou bann parol sa lalwa.