Deterononm 28 - Labib An Kreol Seselwa

Benediksyon pour Lobeisans

¹ Si ou obei SENYER, ou Bondye, si ou obzerv fidelman tou son bann komannman ki mon pe al ordonn ou ozordi, SENYER, ou Bondye ava fer ou pli gran ki tou bann nasyon ki lo later.

² Si ou obei SENYER, ou Bondye, ou ava ganny tou sa bann benediksyon:

³ SENYER ava beni ou dan lavil; i ava beni ou dan lakanpanny.

⁴ SENYER ava beni ou bann zanfan, ou bann rekolt, ou troupo; i pou ogmant ou troupo bef ek ou troupo mouton.

⁵ SENYER ava beni ou pannyen ek ou petren.

⁶ SENYER ava beni ou ler ou arive; i ava beni ou ler ou ale.

⁷ SENYER ava donn ou laviktwar ler ou bann lennmi ava atak ou. Zot ava atak ou par en semen, me zot ava sove dan tou direksyon.

⁸ Benediksyon SENYER, ou Bondye ava avek ou bann provizyon ki ou'n anmase, e avek tou sa ki ou ava antreprann. I ava beni ou dan sa pei ki SENYER, ou Bondye pe donn ou.

⁹ SENYER ava etabli ou koman son pep sen, parey in fer serman avek ou, si ou gard bann komannman SENYER, ou Bondye e swiv son volonte.

¹⁰ Tou bann pep lo later ava war ki ou en pep konsakre pour SENYER e zot ava per ou.

¹¹ SENYER ava fer ou prospere. I ava donn ou bokou zanfan, ogmant ou bann troupo, ek prodwi ou later, dan sa pei ki SENYER in fer serman avek ou bann zanset pour donn ou.

¹² SENYER ava ouver son trezor dan lesyel pour ou. Dan son sezon, i ava donn ou later lapli e i ava beni tou sa ki ou ava antreprann. Ou ava pret larzan bokou nasyon, me ou pa pou zanmen demann prete.

¹³ SENYER ava fer ou vin premye, non pa dernyen; touzour anler, zanmen anba. Ou devre obei bann komannman SENYER, ou Bondye ki mon pe donn ou ozordi, e met zot an pratik,

¹⁴ san devye ni adrwat, ni agos, lo tou bann komannman ki mon pe ordonn ou ozordi, pour ou swiv e servi lezot bondye.

Konsekans Dezobeisans

¹⁵ Me si ou pa obei SENYER, ou Bondye, si ou pa byen obzerv tou son bann komannman ek regleman ki mon pe ordonn ou ozordi, alor, la bann malediksyon ki pou ariv ou e tonm lo ou:

¹⁶ Malediksyon pou lo ou dan lavil; malediksyon pou lo ou dan lakanpanny.

¹⁷ Malediksyon pou dan ou pannyen prodwi e dan ou petren.

¹⁸ Zanfan sorti dan ou vant pou ganny modi, prodwi ou later osi, porte ou bef, ou mouton ek ou kabri; tou pou ganny modi.

¹⁹ Malediksyon pou tonm lo ou ler ou arive; malediksyon pou tonm lo ou ler ou ale.

²⁰ SENYER pou anvoy kont ou malediksyon, lafreyer ek fristrasyon dan tou sa ki ou ava esey antreprann, ziska ki ou ava ganny detri e disparet konpletman, akoz ou bann move aksyon, akoz ou'n abandonn mwan.

²¹ SENYER pou anvoy maladi apre maladi lo ou, ki pou fer ou deperi, ziska ki ou ava disparet dan sa pei kot ou pe ale pour ou pran posesyon.

²² SENYER ava fer ou soufer deperisman, lafyev, lanflanmasyon, gro lasaler ek lasesres, gro divan so e maladi pou tonm lo ou bann plantasyon. Tousala ava pourswiv ou ziska ki ou ava disparet.

²³ Lesyel lo ou latet ava parey en twa an bronz e later anba ou lipye ava vin dir parey feray.

²⁴ Olye lapli lo ou later, SENYER pou fer tonm lapousyer. Zis lapousyer ki pou tonm lo ou depi lesyel, ziska ki ou ava ganny detri.

²⁵ SENYER pou donn laviktwar ou bann lennmi; ou ava atak zot lo en kote e ou ava sov par set kote. Ou ava vin en size ki fer per tou bann rwayonm lo later.

²⁶ Ou bann kadav ava nouri tou bann zwazo dan lezer e tou bann zannimo lo later; napa personn ki pou fer zot per.

²⁷ SENYER pou anvoy lo ou, bann ilser parey Lezip: Labse, lagal, ek lagratel ki pa pou geri.

²⁸ SENYER pou fer ou vin fou, aveg e ou pou derezonnen.

²⁹ Lizour ou pou tate, parey bann aveg dan fernwanr, me ou pa pou kapab trouv ou semen. Dimoun pou kontinyelman eksplwat ou e vol ou; personn pa pou vin ed ou.

³⁰ Ou ava marye avek en fanm, me en lot zonm ki pou dormi avek li. Ou ava konstri en lakaz, me ou pa pou reste ladan. Ou ava plant en plantasyon rezen me ou pa pou gout son fri.

³¹ Ou bef pou ganny egorze devan ou lizye, me ou pa pou gout son lavyann. Ou bourik pou ganny vole devan ou e personn pa pou rann ou. Ou bann mouton ava ganny donnen avek ou bann lennmi san ki personn ava vin ed ou.

³² Devan ou lizye, ou bann garson, ou bann fiy ava ganny donnen avek en lot pep. Tou le zour, ou ava rod zot avek ou lizye gran ouver; me ou pa pou kapab fer nanryen.

³³ En pep ki ou pa konnen ava manz prodwi ou later e tou prodwi ou travay; ou pou kontinyelman ganny eksplwate, kraze.

³⁴ Sa bann move keksoz ki pou pas devan ou, ava fer ou fou.

³⁵ SENYER pou fer ou zenou ek ou lazanm kouver avek boubou enkirab. Zot pou fannen depi ou lipye, ziska ou latet.

³⁶ SENYER ava anmenn ou avek ou lerwa ki ou ava'n swazir, kot en nasyon ki ni ou ni ou bann zanset pa'n konnen. La, ou ava servi lezot bondye an bwa e an ros.

³⁷ Tou bann pep kot SENYER pou anmenn ou, ava etonnen avek sa ki ariv avek ou; zot pou riy ou e gognard ou.

Move Rekolt

³⁸ Ou ava senm bokou lagrenn dan plantasyon, me ou pa pou rekolte bokou, akoz sotrel pou devor tou.

³⁹ Ou ava plant rezen e kiltiv li, me ou pa pou gout son diven; ou pa pou rekolte son fri, akoz lever pou manz tou.

⁴⁰ Ou teritwar ava ranpli avek bann pye zoliv, me ou pa pou ganny delwil pour pas lo ou, akoz bann fri pou koule e tonbe.

⁴¹ Ou pou ganny bann garson ek bann fiy, me zot pa pou reste avek ou, akoz zot pou ganny anmennen annegzil.

⁴² Bann zensek pou anvai tou ou bann pye dibwa ek tou bann fri ki ou later ava prodwir.

Plis Malediksyon akoz Dezobeisans

⁴³ Bann etranze ki pe reste kot ou, ava vin pli ris e pli pwisan; me ou, ou pou vin pli pov e perdi ou pouvwar.

⁴⁴ Zot ava pret ou larzan, me ou pa pou annan nanryen pour pret zot. Zot ava latet, ou ava vin lake.

⁴⁵ Tou sa bann malediksyon pou tonm lo ou. Zot pou tonm lo ou ziska ou ganny detri, akoz ou pa'n obei SENYER, ou Bondye an gardan bann komannman ek bann lalwa ki i'n ordonn ou.

⁴⁶ Sa bann komannman ava touzour en siny ek en laprev kont ou, e kont ou bann desandan.

⁴⁷ Akoz ou pa'n servi SENYER, ou Bondye avek lazwa e avek tou ou leker, alor ki ou ti annan tou annabondans,

⁴⁸ ou pou servi bann lennmi ki SENYER pou anvoy kont ou dan lafen, laswaf; ou pou touni e mank tou keksoz. I pou met en bar feray lo ou likou ziska ki i fini detri ou.

⁴⁹ SENYER ava anvoy kont ou en nasyon ki sorti lwen, dan lot bout later, ki ou pa pou konpran son langaz, e ki pou tonm lo ou parey en leg.

⁵⁰ I ava en nasyon avek en figir dir ki pa pou annan okenn respe anver bann vyeyar, ni pran pitye pour bann ki pli zenn.

⁵¹ Sa nasyon ava manz prodwi ou bann troupo, prodwi ou later, ziska ki ou ganny detri. I ava les ou san semans, diven, delwil, ni zenn bef, ni zenn mouton, ni zenn kabri, ziska ki i'n fer ou disparet.

⁵² Dan ou pei antye, i pou anserkle ou partou dan ou bann lavil, ziska ki bann gran miray fortifye kot ou ti krwar ou an sekirite, i tonbe. I ava anserkle ou dan bann lavil, partou dan pei ki SENYER, ou Bondye in donn ou.

⁵³ Pandan sa letan ki ou'n ganny anserkle, e dan sa leta detres ki lennmi pou met ou ladan, ou pou manz ou prop zanfan, laser ou bann garson ek ou bann fiy ki SENYER, ou Bondye in donn ou.

⁵⁴ Menm sa zonm ki pli delika e sansib parmi zot, pou mefye son prop frer, son fanm ki i'n ser dan son lebra, menm son bann zanfan ki reste.

⁵⁵ I pa pour partaz avek zot, laser son bann garson ki i pe manze, akoz dan sa leta detres kot son lennmi in met li dan tou bann lavil, pa reste li nanryen pour manze.

⁵⁶ Sa fanm pli delika e pli elegan parmi zot ki ti telman delika, ki pa ti oze poz son lipye ater, pou fer parey: I pou mefye son mari avek ki i dormi, son garson, son fiy ki i'n met omonn; i ava menm manz

⁵⁷ sa ki'n sorti dan son vant an sekre, akoz sa detres ek sa dezespwar, la kot lennmi in anserkle ou dan ou bann lavil.

Dezobeisans I Anmenn Destriksyon

⁵⁸ Si ou pa obzerv fidelman tou bann parol sa lalwa ki'n ganny ekri dan sa liv, si ou pa onor non glorye e merveye SENYER, ou Bondye,

⁵⁹ alor, SENYER ava anvoy lo ou ek ou desandan bann gran fleo, bann maladi grav ki napa gerizon.

⁶⁰ I ava anvoy lo ou tou bann lepidemi Lezip ki ti fer ou per e kont ki napa okenn gerizon.

⁶¹ SENYER pou anvoy lo ou, menm bann fleo ek bann maladi ki pa'n ganny ekri dan sa liv lalwa. Zot ava tonm lo ou ziska ou ava ganny detri.

⁶² Otrefwa, ou ti en nasyon nonbre parey bann zetwal dan lesyel. Me akoz ou pa'n obei SENYER, ou Bondye, i pou reste zis en pti pwannyen zot.

⁶³ SENYER ti kontan fer ou prospere e vin nonbre. Li menm SENYER pou kontan anmenn ou dan larin ek destriksyon; ou pou ganny derasinen dan sa pei ki ou pe al pran posesyon.

⁶⁴ SENYER ava dispers ou parmi tou bann pep partou lo later. Ou ava servi lezot bondye fer avek dibwa ek ros, ki ni ou ni ou bann zanset pa'n zanmen konnen.

⁶⁵ Ou pa pou ganny latrankilite parmi sa bann nasyon; ou pa pou ganny okenn landrwa pour poz ou lipye. La, SENYER ava rann ou enkyet, tris e ou ava tonm dan dezespwar.

⁶⁶ Ou lavi pou touzour an danze. Lizour koman aswar, ou pou viv dan lafreyer e enkyet pour ou legzistans.

⁶⁷ Akoz sa lafreyer ki ou leker pou resanti e akoz sa ki ou lizye pou war, bomaten ou pou dir: Si selman aswar ti'n fer! Aswar ou pou dir: Si selman lizour ti'n fer!

⁶⁸ SENYER ava fer ou retourn Lezip par bato. I pou fer ou pran sa semen ki mon ti promet ou pa pou revwar. Laba, ou ava vann ou lekor avek ou bann lennmi koman bann lesklav zonm koman fanm. Me personn pa pou oule aste ou.