Deterononm 27 - Labib An Kreol Seselwa

Lalwa Bondye Grave lo Ros

¹ Apre, Moiz dan prezan bann ansyen dan Izrael ti donn lepep sa lord: Gard tou bann komannman ki mon pe ordonn zot ozordi.

² Zour zot ava travers larivyer Zourden pour al dan pei ki SENYER, ou Bondye pou donn ou, ou ava pran bann gro ros ki ou ava penn avek laso.

³ Kan ou ava travers larivyer Zourden pour antre dan pei ki SENYER, ou Bondye pe al donn ou, en pei kot dile ek dimyel i koule, parey SENYER Bondye ou bann zanset in promet ou, ou ava ekri lo sa bann gro ros, tou bann parol sa lalwa.

⁴ Alor, kan ou ava travers larivyer Zourden, ou ava plas lo montanny Ebal, sa bann ros ki mon pe ordonn ou ozordi pour mete, e ou ava penn zot avek laso.

⁵ La, ou ava konstri en lotel an loner SENYER, ou Bondye, en lotel avek ros ki okenn sizo pa'n touse.

⁶ Annefe, lotel ki ou ava konstri an loner SENYER, ou Bondye i devre ganny konstri avek bann ros brit. Apre, ou ava ofer lo sa lotel, en sakrifis konplet an loner SENYER, ou Bondye.

⁷ Ou ava osi ofer bann sakrifis lakominyon e manz bann lofrann e ou ava fer lafet devan SENYER, ou Bondye.

⁸ Ou ava grav lo sa bann ros, dan en fason byen kler, tou bann parol sa lalwa.

⁹ Apre, Moiz ek bann pret levit ti koz avek pep Izrael: Izrael! Gard silans. Ekoute. Ozordi menm, ou'n vin pep SENYER, ou Bondye.

¹⁰ Alor, ou ava obei SENYER, ou Bondye, e met an pratik son bann komannman ek son bann regleman ki mon pe ordonn ou ozordi.

Malediksyon akoz Dezobeisans

¹¹ Sa menm zour, Moiz ti donn lepep sa lord:

¹² Kan zot ava'n travers larivyer Zourden, sa bann dimoun swivan ava debout lo montanny Garizim pour pronons benediksyon lo lepep: Simeon, Levi, Zida, Isakar, Zozef ek Benzamen.

¹³ La sa bann ki ava debout lo montanny Ebal pour pronons malediksyon: Riben, Gad, Azer, Zabilon, Dann ek Neftali.

¹⁴ Apre, bann levit ava deklare tre for avek bann Izraelit:

¹⁵ Malediksyon lo sa enn ki fabrik en zidol oubyen ki fer en stati. Sa travay ki en artizan in fer, ki'n ganny plase dan en landrwa sekre, i en lobze degoutan devan SENYER. Lepep ava reponn: Amenn!

¹⁶ Malediksyon lo sa enn ki dezonor son papa oubyen son manman. Lepep ava dir: Amenn!

¹⁷ Malediksyon lo sa enn ki bouz taso balizaz en vwazen. Lepep ava dir: Amenn!

¹⁸ Malediksyon lo sa enn ki egar en aveg lo semen. Lepep ava dir: Amenn!

¹⁹ Malediksyon lo sa enn ki priv en etranze, en orfelen e en vev zot drwa. Lepep ava dir: Amenn!

²⁰ Malediksyon lo sa enn ki dormi avek fanm son papa, akoz in vyol drwa son papa. Lepep ava dir: Amenn!

²¹ Malediksyon lo sa enn ki dormi avek en zannimo. Lepep ava dir: Amenn!

²² Malediksyon lo sa enn ki dormi avek son ser, ki i fiy son papa oubyen fiy son manman. Lepep ava dir: Amenn!

²³ Malediksyon lo sa enn ki dormi avek son belmer. Lepep ava dir: Amenn!

²⁴ Malediksyon lo sa enn ki touy son prosen an sekre. Lepep ava dir: Amenn!

²⁵ Malediksyon lo sa enn ki aksepte gous pou fer koule disan inosan. Lepep ava dir: Amenn!

²⁶ Malediksyon lo sa enn ki pa gard bann parol sa lalwa i ki pa met zot an pratik. Lepep ava dir: Amenn!