Deterononm 26 - Labib An Kreol Seselwa

Bann Premye Fri Rekolt

¹ Kan ou ava'n ariv dan pei ki SENYER, ou Bondye pou donn ou pour patrimwann; kan ou ava'n pran posesyon sa pei e enstal ou,

² ou ava pran en pe bann premye fri ki later in prodwir, ki ou'n rekolte dan sa later ki SENYER, ou Bondye pou donn ou. Ou ava met sa bann fri dan en korbey. Ou ava al la kot SENYER, ou Bondye ava swazir koman en landrwa pour li reste.

³ Ou ava al kot sa pret ki an servis. Ou ava dir li: Ozordi, mon deklare devan SENYER, ou Bondye, ki mon'n ariv dan sa pei ki SENYER ti fer serman avek nou zanset pour donn nou.

⁴ Sa pret ava pran sa korbey dan ou lanmen e depoz li ater devan lotel SENYER, ou Bondye.

⁵ La sa ki ou ava deklare devan SENYER, ou Bondye: Mon zanset ti en nomad Arameen. I ti desann Lezip kot i ti reste koman en etranze. Ti napa bokou zot. Me la, in vin en gran nasyon, pwisan e nonbre.

⁶ Bann Ezipsyen ti maltret nou e eksplwat nou. Zot ti fors nou travay koman lesklav.

⁷ Alor nou ti kriy ver SENYER, Bondye nou bann zanset. SENYER ti antann nou lavwa; i ti war nou lafliksyon, nou lapenn ek nou lanmizer.

⁸ Par son pwisans ek son lafors, SENYER ti fer nou sorti Lezip, dan en gran fraka avek bann siny ek bann mervey.

⁹ I ti kondwir nou isi e donn nou sa pei, en pei kot dile ek dimyel i koule.

¹⁰ Alor, ozordi mon pe anmenn bann premye fri sa later ki ou SENYER in donn mwan. Ou ava depoz sa korbey devan SENYER, ou Bondye e prostern devan SENYER, ou Bondye.

¹¹ Apre, ou, avek bann levit ek bann etranze ki reste kot ou, zot ava selebre pour tou bann byenfe ki SENYER, ou Bondye in donn ou ek ou fanmir.

Ladim pour Senyer

¹² Trwazyenm lannen ki lannen ladim, ou ava pran par rezerve lo ou bann rekolt ki ou ava donn bann Levit, bann etranze, bann orfelen ek bann vev. Zot ava manze ziska ki zot ava rasazye dan bann lavil.

¹³ Alor, ou ava dir devan SENYER, ou Bondye: Anreg avek tou ou bann komannman ki ou ti ordonn mwan, mon'n pran tou sa par konsakre ki ti kot mwan e mon'n donn bann Levit, bann etranze ki reste isi, bann orfelen, bann vev. Mon pa'n ni dezobei, ni oubliy en sel ou bann komannman.

¹⁴ Mon pa'n manz okenn par ler mon ti an dey; mon pa'n tir okenn par ler mon ti enpir; mon pa'n ofer okenn par pour en lanmor. Mon'n obei SENYER mon Bondye; mon'n azir parey i ti ordonn mwan.

¹⁵ Depi ou demer ki sen, depi lesyel, regarde e beni Izrael ou pep ek later ki ou'n donn nou, parey ou ti fer serman avek nou bann zanset, sa pei kot dile ek dimyel i koule.

Pep Bondye

¹⁶ Ozordi, SENYER, ou Bondye pe ordonn ou pour met an pratik tou sa bann regleman ek lalwa. Alor, obzerv zot byen avek tou ou leker e ou et antye.

¹⁷ Ozordi, SENYER in fer ou sa promes: I ava ou Bondye, si ou swiv son semen, si ou obei tou son bann regleman, son bann komannman ek tou son bann lalwa.

¹⁸ Ozordi, SENYER in fer ou promet pour ou vin son pep parey i ti dir ou; ou ava obzerv tou son bann komannman.

¹⁹ Konmsa, i ava fer ou vin pli gran nasyon ki i'n kree, dan ou repitasyon e dan ou loner. Konmsa, ou ava en pep sen pour SENYER, ou Bondye, parey in promet.