Deterononm 25 - Labib An Kreol Seselwa

Pinisyon pour Krim

¹ Si de dimoun i al devan tribinal, pour rezoud en dispit, ziz ava deside lekel ki inosan, lekel ki koupab.

² Si sa enn ki koupab, i merit ganny fwete, ziz ava fer li bes ater devan li e i ava ganny fwete lakantite kou ki i merite dapre son fot.

³ I ava ganny 40 kou, me pa plis. Si i ganny plis ki 40 kou, i ava en dezoner pour li devan bann Izraelit.

Bef ki Pe Kraz Legren

⁴ Ou pa pou met en bayon lo mizo ou bef letan i pe kraz legren.

Devwar anver En Frer Defen

⁵ Si de frer pe viv ansanm, e enn i mor san les okenn garson, fanm sa zonm ki'n mor pa pou kapab marye an deor sa fanmir, avek en etranze. Son bofrer ava pran li e marye avek li. I ava'n fer son devwar koman bofrer anver li.

⁶ Premye zanfan ki zot ava gannyen ava port non sa frer defen. Konmsa, son non ava kontinyen dan Izrael.

⁷ Me si sa zonm i refize marye avek li, sa belser ava al war bann ansyen kot laport lavil. I ava dir zot: Mon bofrer pa oule gard non son frer dan Izrael. I refize akonpli son devwar bofrer anver mwan.

⁸ Bann ansyen sa lavil ava apel sa zonm. Zot ava koz avek li. Si i persiste e dir: Mon pa oule marye avek li,

⁹ alor, an prezans bann ansyen, son belser ava apros li, tir sandal sa zonm dan son lipye, kras dan son figir e deklare: Konmsa ou fer avek en zonm ki refize donn en desandans son frer.

¹⁰ Partou dan Izrael, son fanmir ava ganny apele: Lafanmir sa enn zot ti tir sandal.

Ka Lager ant Zonm

¹¹ Si de zonm pe lager e fanm enn ant sa de, pour li delivre son mari dan lanmen son ladverser, i anvoy son lanmen e atrap parti seksyel sa zonm,

¹² ou ava koup son lanmen san okenn pitye.

Lonnekte dan Komers

¹³ Ou pa pou annan de kalite pwa dan ou sak: Enn gro ek enn pti.

¹⁴ Ou pa pou annan de kalite mezir dan ou lakour: Gran ek pti.

¹⁵ Ou ava annan zis en pwa egzakt e onnet; ou ava annan zis en mezir egzakt e korek, pour ki ou viv lontan dan pei ki SENYER, ou Bondye pou donn ou.

¹⁶ Annefe, SENYER, ou Bondye i deteste dimoun ki azir an malonnet.

Lord pour Touy bann Amalesit

¹⁷ Pa oubliy sa ki bann Amalesit ti fer ou dan semen ler ou ti pe sorti Lezip:

¹⁸ Ki mannyer zot ti atak ou lo semen ler ou ti feb e fatige e zot ti detri tou bann ki ti pe trennen deryer; zot pa ti annan respe pour Bondye.

¹⁹ Alor, Kan SENYER, ou Bondye ava'n asir ou sekirite kont tou ou bann lennmi dan pei ki SENYER, ou Bondye pou donn ou pour patrimwann, ou ava detri tou bann Amalesit anba lesyel, e ki personn pa rapel zot ankor.