Deterononm 24 - Labib An Kreol Seselwa

Lalwa lo Divors ek Maryaz

¹ Sipoze en zonm i pran en fanm e i marye avek li. Apre, sa fanm nepli fer li plezir, oubyen i'n dekouver keksoz ki pa satisfer li. Alor, i ava ekri en atestasyon divors ki i ava donn li dan son lanmen e fer li ale. Alor, sa fanm ava kit lakaz sa zonm.

² I ava kapab marye avek en lot zonm.

³ Sipoze sa dezyenm zonm osi pa kontan li e ki i donn li dan son lanmen en atestasyon divors, e fer li ale. Sipoze ki sa dezyenm zonm i mor.

⁴ Alor, son premye mari ki ti pous li, pa pou kapab repran li koman son fanm, akoz i'n rann li enpir. Annefe, sa i ava en keksoz degoutan devan SENYER. Ou pa kapab anmenn pese dan sa pei ki SENYER, ou Bondye pou donn ou pour posesyon.

Nouvo Marye

⁵ En zonm ki fek marye, pa pou antre dan larme, ni ganny oblize pran okenn responsabilite. I ava lib pour reste dan lakour pandan enn an, pour li viv ere avek son fanm marye.

⁶ Personn pa pou pran angaz ros ki servi pour kraz legren pour fer lafarin, ni menm sa ros ki lo la. Sa enn ki fer sa ava pe pran angaz lavi sa dimoun.

⁷ Si en zonm i ganny atrape pe pran pardfors en lot Izraelit pour fer li vin son lesklav oubyen pour vann li, i ava ganny touye. Konmsa ou ava fer disparet lemal parmi zot.

⁸ Fer atansyon! Dan ka en maladi ki parey lalep, obzerv byen tou regleman ki bann pret levit i donn ou, parey mon'n ordonn zot.

⁹ Pa oubliy sa ki SENYER, ou Bondye ti fer avek Mirianm letan zot ti pe kit Lezip.

Lalwa lo En Lobze Angaz

¹⁰ Si ou pret ou vwazen nenport kwa, ou pa pou antre dan son lakaz pour pran enn son keksoz pour met angaz.

¹¹ Ou ava reste deor, e espere ki sa dimoun ki ou'n pret keksoz, i anmenn ou sa lobze pour met an gaz.

¹² Si sa dimoun i pov, ou pa pou gard sa lobze ziska ou al dormi.

¹³ Ou ava rann li sa lobze ler soley i kouse. Konmsa i ava kapab dormi dan son lenz e i ava beni ou. Sa i ava en bonn aksyon devan SENYER, ou Bondye.

Lapey Dimoun Pov

¹⁴ Ou pa pou gard lapey en travayer pov e ki dan bezwen, ki swa Izraelit oubyen etranze ki pe reste dan ou pei, oubyen dan enn ou bann lavil.

¹⁵ Ou ava pey li son saler tou le zour avan soley kouse, akoz i pov e i bezwen sa larzan pour viv. Si i kriy kont ou ver SENYER, ou ava pe komet en pese.

Kondannasyon Anmor

¹⁶ Bann paran pa pou ganny touye dan plas zot zanfan, ni zanfan dan plas zot paran. En dimoun ava ganny touye zis pour son prop krim ki i'n komet.

Regleman Konsernan bann Pov

¹⁷ Ou pa pou priv en etranze ki reste kot ou oubyen en orfelen son drwa. Ou pa pou pran angaz lenz en vev.

¹⁸ Pa oubliye ki ou ti en lesklav Lezip e SENYER, ou Bondye ti delivre ou. Pour sa rezon, mon ordonn ou pour met sa komannman an pratik.

¹⁹ Kan ou fer larekolt e ki ou oubliye anmas en pake zepi, ou pa pou retournen pour al sers sa bann zepi. Zot ava reste pour sa etranze, sa orfelen ek sa vev. Konmsa, SENYER, ou Bondye ava beni ou dan tou sa ki ou ava antreprann.

²⁰ Kan ou sekwe bann zoliv dan pye, pa retournen pour rekolte sa ki reste lo pye. I ava pour sa etranze, sa orfelen ek sa vev.

²¹ Kan ou rekolte rezen dan ou plantasyon, pa retournen pour rekolte sa ki'n reste lo pye. I ava pour sa etranze, sa orfelen ek sa vev.

²² Pa oubliye ki ou ti lesklav Lezip. Alor, mon pe ordonn ou pour met an pratik sa bann komannman.