Deterononm 22 - Labib An Kreol Seselwa

Respe pour Propriyete Son Prosen

¹ Si ou remarke ki bef oubyen mouton ou prosen in egare; pa fer sanblan ou pa'n war. Ou ava retourn li kot son propriyeter.

² Si sa propriyeter pa reste pre kot ou, oubyen ou pa konn li, ou ava anmenn sa zannimo kot ou. I ava reste kot ou ziska ki son propriyeter i vin reklanmen. Alor, ou ava rann li son zannimo.

³ Ou ava azir parey pour bourik ou prosen. Ou ava azir parey pour lenz ou prosen e ou ava azir parey avek nenport lobze ki ou prosen in perdi e ki ou'n retrouve. Ou pa pou kapab fer sanblan ou pa'n war.

⁴ Ou pa pou fer sanblan ki ou pa'n war bourik ou prosen, bef ou vwazen ki'n tonbe lo semen. Ou ava ede pour lev li.

⁵ En fanm pa pou met lenz en zonm e en zonm pa pou met lenz en fanm; sa enn ki fer en keksoz parey, pe fer en aksyon degoutan anver SENYER, ou Bondye.

⁶ Si lo semen, ou war en nik zwazo lo en pye dibwa oubyen ater, e ki i annan bann pti zwazo oubyen dizef ladan, e ki zot manman pe kouv son bann dizef, oubyen asiz lo bann piti; ou pa pou pran sa manman son bann piti.

⁷ Ou ava les sa manman ale e ou ava pran zis bann pti zwazo. Konmsa ou ava ere e ou ava viv lontan.

⁸ Si ou konstri en nouvo lakaz, ou ava met en balistrad toultour son twa. Otreman, si en dimoun i tonbe sorti lo ou twa, ou riske responsab son lanmor.

⁹ Ou pa pou senm en lot lespes legren dan ou plantasyon rezen. Dan sa ka, tou prodwi sa legren avek prodwi ou plantasyon rezen i riske pa ganny aksepte devan SENYER.

¹⁰ Ou pa pou travay ou later avek en bourik ek en bef ansanm.

¹¹ Ou pa pou met lenz fer avek lalenn ansanm avek latwal linenn.

¹² Ou ava met en ponpon dan kat kwen sa lenz avek lekel ou kouver ou.

Lalwa lo Relasyon Seksyel

¹³ Si en zonm i marye avek en fanm, i dormi avek li, me apre i aret kontan li.

¹⁴ Si apre, i blanm li e gat son repitasyon an dizan: Mon'n marye avek sa fanm, me kan mon ti dormi avek li, mon pa ti trouv li vyerz.

¹⁵ Alor, papa ek manman sa zenn fanm ava anmenn laprev virzinite sa zenn fanm devan bann ansyen, devan laport lavil.

¹⁶ Papa sa zenn fanm ava dir bann ansyen: Mwan, mon ti'n donn sa zonm mon fiy pour li marye avek, me i nepli kontan li.

¹⁷ Aprezan, in pe akiz li, ki i pa'n war okenn laprev virzinite mon fiy. La laprev son virzinite. Apre, zot ava ouver sa lenz devan bann ansyen sa lavil.

¹⁸ Bann ansyen sa lavil ava sezi sa zonm e fwet li.

¹⁹ Akoz in gat repitasyon en vyerz dan Izrael, i ava ganny kondannen 200 pyes larzan ki i ava donn papa sa zenn fanm. I ava reste fanm sa zonm ki pa pou annan drwa divors li pandan tou son lavi.

²⁰ Me si sa lakizasyon i vre, e ki laprev virzinite sa zenn fanm pa'n ganny etabli,

²¹ sa zenn fanm ava ganny anmennen deor lakaz son papa e bann zonm lavil ava saboul li avek ros, akoz in komet en aksyon degoutan dan Izrael: I'n prostitye son lekor dan lakaz son papa. Konmsa, ou ava fer disparet sa ki mal parmi zot.

Lalwa Konsernan bann Ka Adilter

²² Si en zonm i ganny atrape pe dormi avek fanm en lot zonm, tou le de ava ganny touye: Sa zonm ki'n dormi avek sa fanm, e sa fanm osi. Konmsa, ou ava fer disparet lemal dan Izrael.

²³ Si en zonm i rankontre dan lavil, en zenn fiy vyerz ki'n fiyanse, e i al dormi avek li,

²⁴ ou ava anmenn tou le de devan laport sa lavil e saboul zot anmor avek ros: Sa zenn fiy, akoz i pa ti apel osekour dan lavil e sa zonm, akoz in dezonor fanm son prosen. Konmsa ou ava fer disparet lemal kot ou.

²⁵ Me si sa zonm i rankontre dan lakanpanny, en zenn fiy ki'n fiyanse e ki sa zonm i vyol li, alor, zis sa zonm ki'n dormi avek li, ki ava ganny met anmor.

²⁶ Ou pa pou fer nanryen sa zenn fiy, akoz i pa'n komet okenn lofans ki merit lanmor. Annefe, sa ka i parey ka en zonm ki atak son prosen ki i touye.

²⁷ Akoz in rankontre li dan lakanpanny, sa zenn fiyanse in kekfwa kriy osekour, me ti napa personn pour vin sov li.

²⁸ Si en zonm i rankontre en fiy vyerz ki pa fiyanse, e i vyol li; si zot ganny atrape,

²⁹ sa zonm ki'n dormi avek li ava pey papa sa zenn fiy 50 pyes larzan e sa fiy ava vin son fanm. Annefe, sa zonm in vyol li e i pa pou kapab divors li tan ki i vivan.

³⁰ En zonm pa pou marye avek fanm son papa, akoz i ava pe vyol bann drwa son papa.