Deterononm 21 - Labib An Kreol Seselwa

Ka Mert san Laprev

¹ Si dan sa pei ki SENYER, ou Bondye pou donn ou pour pran posesyon, en kadav i ganny dekouver dan lakanpanny, e personn pa konnen lekel ki'n touy sa dimoun,

² alor, ou bann ansyen ek ou bann ziz ava al mezire, pour war lekel lavil ki pli pros avek sa kadav.

³ Apre, bann ansyen sa lavil ki pli pros avek sa kadav, ava pran en zenn bef ki pa ankor servi pour travay, enn ki pa'n zanmen anmenn fardo lo son zepol.

⁴ Bann ansyen sa lavil ava anmenn sa zenn bef kot en larivyer ki zanmen sek, kot napa okenn plantasyon, kot nanryen pa'n ganny senmen. I ava kas likou sa zenn bef dan sa larivyer.

⁵ Apre, bann pret, bann garson Levi ava avans devan. Annefe, SENYER, ou Bondye in swazir zot pour son servis e pour pronons bann benediksyon lo non SENYER. Zot ki fer desizyon lo tou dispit ek domaz.

⁶ Tou bann ansyen sorti dan sa lavil ki pli pros avek sa kadav, ava lav zot lanmen lo sa zenn bef ki likou in ganny kase dan larivyer.

⁷ Zot ava deklare: Pa nou lanmen ki'n fer koule sa disan e nou pa konn nanryen dan sa zafer.

⁸ SENYER! Pardonn ou pep Izrael ki ou'n delivre; pa rann Izrael responsab disan en inosan. Apre, zot ava ganny pardonnen pour sa disan ki'n ganny verse.

⁹ Konmsa ki ou ava fer disparet disan en inosan parmi zot, an fezan fer sa ki byen devan SENYER.

Bann Prizonnyen Fanm dan Lager

¹⁰ Ler ou al lager kont ou bann lenn-mi e SENYER, ou Bondye i livre zot dan ou lanmen e ou fer zot prizonnyen,

¹¹ i posib ki ou war parmi sa bann prizonnyen en zoli fanm avek ki ou tonm anmoure e ki ou anvi marye avek li.

¹² Alor, ou ava anmenn li kot ou. I ava raz son latet, koup son zong,

¹³ e tir son lenz prizonnyen. Pandan en mwan, i ava reste kot ou e pler son papa ek son manman. Apre, ou ava kapab marye; ou ava vin son mari e i ava vin ou fanm.

¹⁴ Me si ou nepli anvi li, ou ava les li al kot i oule. Me ou pa pou vann li pour larzan, ni servi li koman en lesklav, akoz ou'n annan relasyon avek li.

Drwa Premye Ne

¹⁵ Sipoze en zonm i annan de fanm, i kontan enn, me i pa kontan lot. Si son premye garson i avek sa fanm ki i pa kontan.

¹⁶ Alor, zour i deside partaz son posesyon, i pou napa drwa donn par premye ne sa fanm ki i kontan, par preferans pour garson sa fanm ki i pa kontan, akoz sa garson ki premye ne.

¹⁷ I ava bezwen rekonnet sa garson ki i ti ganny avek sa fanm ki i pa kontan. Koman son premye ne, sa garson ava bezwen ganny doub par dan tou sa ki i posede. Annefe, sa garson i premye ne son virilite; li garson premye ne ki annan sa drwa.

Zanfan Dezobeisan

¹⁸ Si en zonm i annan en garson dezobeisan e rebel ki pa obei ni son papa ni son manman, ki pa ekout zot ler zot koriz li;

¹⁹ alor, son papa ek son manman ava pran li e anmenn li kot bann ansyen, devan laport son lavil.

²⁰ Zot ava dir bann ansyen sa lavil: Nou garson i dezobeisan e rebel. I pa oule ekout nou. I en vwayou e en soular.

²¹ Alor, tou bann zonm sa lavil ava saboul li avek ros ziska i mor. Konmsa, ou ava fer disparet lemal parmi zot. Izrael antye ava antann sa ki'n arive e zot ava per.

Lalwa lo Moralite

²² Kan en zonm i'n ganny rekonnet koupab pour en krim ki merit lanmor, i ganny met anpandan avek en pye dibwa.

²³ Me fodre pa ki son kadav i reste anpandan tou lannwit. Ou devre anter li menm zour, akoz en lekor ki reste anpandan, i anmenn malediksyon Bondye. Ou pa kapab rann enpir later ki SENYER, ou Bondye pou donn ou an posesyon.