Deterononm 19 - Labib An Kreol Seselwa

Lalwa Konsernan bann Lavil pour Refizye

¹ Kan SENYER, ou Bondye ava fer disparet bann nasyon dan ou pei ki SENYER, ou Bondye in donn ou. Kan ou ava'n pran posesyon zot byen e etabli dan zot bann lavil e dan zot lakaz,

² ou ava met apar trwa lavil dan pei ki SENYER, ou Bondye pou donn nou an posesyon.

³ Ou ava konstri bann semen e diviz an trwa parti, teritwar ki SENYER, ou Bondye pe al donn ou an posesyon. Konmsa, sa enn ki'n komet en mert ava kapab vin pran refiz dan enn sa bann lavil.

⁴ Dan sa ka, en dimoun ki'n komet en mert ava kapab al pran refiz laba, pour li sov son lavi: I'n touy en lot dimoun envolonterman, alor, ki i pa ti annan nanryen kont sa dimoun.

⁵ Sipoze en zonm i al avek son prosen dan lafore pour koup dibwa; ler i lev lars pour koup en pye dibwa, latet lars i sape dan son lanmans e al tap son prosen ki mor apre. Sa zonm ava kapab al pran refiz dan enn sa bann lavil e kontinyen viv.

⁶ Petet ki dan son gran lakoler, vanzer disan i pourswiv sa zonm. Fodre pa alor, ki i kapab rezwenn li e touy li akoz semen ziska sa lavil i long. Sa zonm pa ti merit lanmor. Annefe, i pa ti annan okenn laenn kont son viktim.

⁷ Pour sa rezon ki mon donn ou sa lord: Ou ava met apar trwa lavil.

⁸ Si, parey in fer serman avek ou bann zanset, SENYER, ou Bondye i agrandi ou teritwar, e i donn ou sa pei parey i'n promet ou bann zanset;

⁹ si ou byen obzerv tou son bann komannman ki mon ordonn ou ozordi; si ou kontan SENYER, ou Bondye e si ou touzour swiv son semen, alor ou ava azout trwa lezot lavil.

¹⁰ Konmsa, disan en inosan pa pou koule lo later ki SENYER, ou Bondye pou donn ou koman posesyon. Sinon, ou pou koupab pour fer koule disan inosan.

¹¹ Me si en zonm ki ay son prosen, in madre pour sot lo li e touy li. Si i al sov dan enn sa bann lavil,

¹² alor, bann ansyen dan sa lavil ava anvoy aret li laba. I ava ganny livre dan lanmen vanzer son disan pour li ganny egzekite.

¹³ Pa montre okenn pitye. Konmsa, ou ava anpes disan inosan koule dan Izrael, e viv ere.

Taso Balizaz

¹⁴ Ou pa pou deplas bann taso balizaz ou vwazen ki'n ganny poze par ou bann zanset, dan patrimwann ki ou pou gannyen dan pei ki SENYER, ou Bondye pou donn ou pour posesyon.

Regleman Konsernan Temwen

¹⁵ En sel temwen pa ase pour kondann en dimoun pour en krim, oubyen okenn lofans ki'n kapab ganny komet. Pour etabli en fe, fodre annan de, oubyen trwa temwen.

¹⁶ Si en fo temwen i vin akiz en dimoun pour en krim,

¹⁷ tou le de parti dan sa zafer ava prezant zot devan SENYER, devan bann pret ek bann ziz an fonksyon.

¹⁸ Bann ziz ava fer en lanket detaye. Si sa dimoun i en fo temwen, e ki i'n fer en fo deklarasyon kont son prosen,

¹⁹ ou ava tret li parey i ti anvi tret son prosen. Konmsa ki ou ava fer disparet lemal parmi zot.

²⁰ Tou lepep ava tande e zot ava per. En tel krim pa pou zanmen ganny komet ankor parmi zot.

²¹ Pa montre okenn pitye: En lavi pour en lavi, en lizye pour en lizye, en ledan pour en ledan, en lanmen pour en lanmen, en lipye pour en lipye.