Deterononm 16 - Labib An Kreol Seselwa

Lafet Pak

¹ Dan mwan Abib, ou ava selebre lafet Pak an loner SENYER, ou Bondye, akoz ti dan mwan Abib ki SENYER, ou Bondye ti fer ou sorti Lezip pandan lannwit.

² Ou ava ofer sakrifis Pak an loner SENYER, ou Bondye, bann zannimo sorti dan ou troupo, dan landrwa kot SENYER ava'n swazir pour fer reste prezans son non.

³ Pandan lafet, ou pa pou manz nanryen ki'n kwi avek lelven. Pandan set zour, ou ava manz dipen san lelven, en dipen douler, akoz ou ti kit Lezip an tayan. Alor, sa i ava rapel ou tou dilon ou lavi, sa zour ki ou ti sorti Lezip.

⁴ Pandan set zour, pa pou annan okenn lelven dan pei antye. Okenn lavyann sa zannimo sakrifis ki ou'n touye aswar sa premye zour, pa devre ganny garde ziska lannmen bomaten.

⁵ Ou pa pou kapab ofer sakrifis Pak dan okenn bann lavil ki SENYER, ou Bondye pe al donn ou,

⁶ me zis dan landrwa kot SENYER, ou Bondye ava'n swazir pour fer son non reste. Ou ava ofer sakrifis Pak, aswar, soley kouse, zour ki ou ti kit Lezip.

⁷ Ou ava kwi sa zannimo e manz li la kot SENYER, ou Bondye ava'n swazir; lannmen bomaten, ou ava kapab retourn dan ou latant.

⁸ Pandan sis zour, ou ava manz dipen san lelven; son setyenm zour i ava annan en gran rasanbleman solannel an loner SENYER, ou Bondye. Ou pa devre travay sa zour.

Lafet Rekolt

⁹ Ou ava kont set semenn depi zour ki fosi in konmans koup tiz dible.

¹⁰ Apre, ou ava selebre lafet Rekolt an loner SENYER, ou Bondye. Lofrann volonter ki ou ava fer i ava an proporsyon avek bann benediksyon ki SENYER, ou Bondye ava'n donn ou.

¹¹ Avek ou bann garson, ou bann fiy, ou bann serviter, ou bann servant, bann levit ki reste dan ou bann lavil, bann etranze, bann orfelen ek bann vev ki viv parmi zot, ou ava fer lafet dan landrwa kot SENYER ava swazir pour fer reste prezans son non.

¹² Pa oubliye ki ou ti lesklav Lezip; obzerv e met an pratik sa bann regleman.

Lafet Latant

¹³ Kan ou ava rekolte dible ki'n ganny bate ek diven ki sorti dan ou preswar, ou ava selebre lafet Latant pandan set zour.

¹⁴ Pandan sa lafet, ou ava selebre, ou, avek ou bann garson, ou bann fiy, ou bann lesklav zonm oubyen fanm, ek bann levit, bann etranze, bann orfelen ek bann vev ki reste dan ou bann lavil.

¹⁵ Pandan set zour, ou ava selebre sa lafet an loner SENYER, ou Bondye, la kot SENYER ava swazir; SENYER, ou Bondye ava beni ou dan tou ou bann rekolt e dan tou sa ki ou ava antreprann. Alor ou ava vreman dan lazwa.

¹⁶ Trwa fwa par an, pour lokazyon lafet dipen san lelven, lafet Rekolt ek lafet Latant, tou bann zonm ava prezant zot devan SENYER, ou Bondye, la kot i ava swazir. Zot pa pou vin devan SENYER lanmen vid.

¹⁷ Sakenn ava donn mannyer i kapab, dapre benediksyon ki SENYER, ou Bondye in donn li.

Regleman pour bann Ziz

¹⁸ Ou ava nonm bann ziz ek bann mazistra dan sak tribi, dan tou zot bann lavil ki SENYER, ou Bondye pou donn ou. Zot ava ziz lepep dapre lazistis.

¹⁹ Ou pa devre fos lazistis; ou pa devre ziz dapre laparans. Ou pa devre aksepte gous, akoz gous i bous lizye en saz e i fos desizyon en zonm zis.

²⁰ Ou ava rod lazistis e zis lazistis. Konmsa, ou ava kapab viv e pran posesyon pei ki SENYER, ou Bondye pou donn ou.

²¹ Ou pa pou plas okenn ros sakre akote lotel an loner SENYER, ou Bondye,

²² ni konstri en pilye ros sakre. SENYER, ou Bondye i deteste en tel keksoz.