Deterononm 15 - Labib An Kreol Seselwa

Lannen pour Efas bann Det

¹ Tou le 7 an, ou ava efas bann det.

² La ki mannyer ou pou fer: Kan lannen pour efas bann det in ganny proklanmen, an loner SENYER, tou dimoun ki'n pret larzan avek son prosen, ava renons ranboursman. I pa devre obliz son vwazen ni son frer pey sa det.

³ Ou ava kapab fors en etranze ranbours ou. Me ou ava efas det nenport manm ou kominote ki dwa ou.

⁴ I pa devre annan okenn pov parmi zot. Annefe, SENYER pou sirman beni ou dan sa pei ki SENYER, ou Bondye pou donn ou koman patrimwann, pour ou pran posesyon.

⁵ Me fodre ki ou obei SENYER, ou Bondye e obzerv tou son bann komannman ki mon pe donn ou ozordi.

⁶ Kan SENYER, ou Bondye ava'n beni ou, parey in promet, ou ava pret larzan bokou nasyon; me ou, ou pa pou demann prete. Ou pou domin lo bokou nasyon, me okenn nasyon pa pou domin ou.

⁷ Si kot ou, i annan en dimoun ki dan bezwen, en manm ou kominote dan nenport lekel lavil dan sa pei ki SENYER, ou Bondye pou donn ou, pa ferm ou leker, ni ou lanmen devan ou prosen ki dan bezwen.

⁸ O kontrer, ou devre ouver ou lanmen e pret li sa ki i bezwen.

⁹ Fer atansyon ou pa gard dan ou leker bann move panse an dizan: Setyenm lannen, lannen pour efas bann det pe aprose. Pa get avek en move lizye ou prosen ki dan bezwen e refize donn li keksoz. Ou vwazen ava kriy ver SENYER kont ou e ou ava'n fer en pese.

¹⁰ Pret li avek granker san okenn regre, akoz pour sa, SENYER, ou Bondye ava beni ou dan tou ou travay e dan tou sa ki ou ava antreprann.

¹¹ Akoz pou touzour annan dimoun ki dan bezwen lo sa later, alor, mon ordonn ou: Ouver ou lanmen anver ou prosen pov e anver sa enn ki dan bezwen dan ou pei.

Fason pour Tret bann Lesklav

¹² Si enn parmi ou bann frer Ebre, zonm oubyen fanm i vann son lekor avek ou, i ava servi ou pandan 6 an. Setyenm lannen, ou ava les li ale lib.

¹³ Kan ou rann en lesklav son laliberte, ou pa pou fer li ale lanmen vid.

¹⁴ Ou ava donn li bann kado sorti parmi ou troupo, dan ou rezerv dible ek diven. Konmsa, ou ava'n donn li en pe sa bann prodwi ki SENYER, ou Bondye in donn ou.

¹⁵ Pa oubliye ki ou osi, ou ti lesklav Lezip e ki SENYER, ou Bondye ti sov ou. Pour sa rezon ki mon pe donn ou ozordi sa komannman.

¹⁶ Me si ou lesklav i dir ou: Mon pa oule kit ou, akoz i kontan ou, ou fanmir ek ou bann serviter e ki i santi li byen kot ou,

¹⁷ alor, ou ava pran en pwenson, e ou ava pers son zorey kont montan laport; i ava ou lesklav pour touzour. Ou ava azir parey, osi anver ou lesklav fanm.

¹⁸ Pa regrete pour donn li son laliberte e les li ale, akoz son servis pandan 6 an, i vo doub lapey en salarye; e SENYER, ou Bondye ava beni ou dan tou sa ki ou antreprann.

Premye Ne dan en Troupo

¹⁹ Ou ava konsakre pour SENYER, ou Bondye, tou zannimo mal premye ne parmi ou bann bef, mouton ek kabri. Parmi ou bann bef, ou pa pou fer son premye ne travay; ou pa pou koup lalenn premye ne parmi ou bann mouton.

²⁰ Toulezan, ou ava manz li avek ou fanmir ek ou bann serviter devan SENYER, ou Bondye, dan landrwa kot SENYER ava'n swazir.

²¹ Me si sa zannimo i annan en grav defo; si i bwete oubyen si i aveg, ou pa pou ofer li an sakrifis pour SENYER, ou Bondye.

²² Ou ava manz li dan ou lavil. Dimoun ki enpir koman dimoun ki pir, ava kapab manz li ansanm, parey zot manz en gazel oubyen en serf.

²³ Selman, ou pa pou manz son disan; ou ava les son disan koul ater, parey delo.