Deterononm 13 - Labib An Kreol Seselwa

¹ Si i annan en profet oubyen en dimoun ki ganny vizyon parmi zot e i propoz ou en siny, oubyen en keksoz ekstraordiner;

² si i arive ki sa bann siny oubyen sa bann keksoz ekstraordiner i realize, e zot dir ou: Annou al swiv e servi lezot bondye ki ou pa'n konnen,

³ ou pa pou ekout bann parol sa profet oubyen sa vizyoner. Annefe, SENYER, ou Bondye pe teste ou. I oule konnen si vreman ou kontan SENYER, ou Bondye avek tou ou leker e avek ou et antye.

⁴ Ou ava swiv SENYER, ou Bondye; ou ava annan respe zis pour li. Ou ava gard son bann komannman, obei son lavwa, e reste atase avek li.

⁵ Sa bann profet oubyen vizyoner ava ganny touye akoz par zot bann parol, zot in pres revolt kont SENYER, ou Bondye ki ti tir ou dan pei Lezip e sov ou dan lesklavaz. Zot ti oule detourn ou lo semen ki SENYER, ou Bondye ti'n ordonn ou pour swiv. Ou devre fer disparet sa mal parmi zot.

⁶ I kapab arive ki ou frer, garson ou manman, swa ou prop garson, swa ou prop fiy, swa sa fanm ki pe dormi dan ou lebra, swa ou pli gran zanmi i envit ou pour al ador lezot bondye ki ni ou ni ou bann zanset pa'n zanmen konnen.

⁷ Zot kapab ankouraz ou ador sa bann bondye lezot pep otour ou, pre oubyen lwen avek ou, partou lo later.

⁸ Pa aksepte, ni ekout en tel dimoun. Pa montre okenn pitye, ni konpasyon, pa soutir li.

⁹ Ou devre touy li; ou ava premye dimoun pour egzekit li. Apre, lezot ava kontinyen saboul li avek ros.

¹⁰ Saboul li ziska ki i mor, akoz in esey antrenn ou lwen avek SENYER, ou Bondye ki ti tir ou dan pei Lezip e dan lesklavaz.

¹¹ Alor, pep Izrael ava tande e zot ava per. Zanmen zot ava komet en aksyon osi degoutan parmi zot.

¹² Si ou antann dir ler ou dan enn sa bann lavil, ki SENYER, ou Bondye in donn ou pour ou reste,

¹³ ki bann vwayou parmi zot in detourn bann zabitan lavil an dizan: Annou al ador lezot bondye, ki ou pa konnen,

¹⁴ ou ava pran lenformasyon e fer en lanket konplet. Si lanket i prouve ki en tel aksyon degoutan in ganny fer parmi zot,

¹⁵ ou ava masakre tou bann zabitan sa lavil, detri tou sa ki i annan dan sa lavil; ou ava menm masakre zot troupo.

¹⁶ Ou ava rasanble tou bann piyaz lager lo laplas piblik sa lavil. Apre, ou ava met dife e bril sa lavil avek son bann piyaz lager, koman en sakrifis brile pour SENYER, ou Bondye. Sa lavil ava reste en ta debri pour touzour, e zanmen i ava ganny rekonstri.

¹⁷ Pa gard okenn piyaz lager, sankwa SENYER pa ankoler kont ou. I ava pran pitye pour ou e dan son konpasyon, i ava fer ou vin nonbre parey i ti fer serman avek ou bann zanset.

¹⁸ SENYER ava fer sa, si ou obei lalwa SENYER, ou Bondye, e gard son bann komannman ki mon pe ordonn ou ozordi, e si ou fer sa ki drwat pour SENYER, ou Bondye.