Deterononm 12 - Labib An Kreol Seselwa

En Sel Landrwa pour Ladorasyon

¹ La bann lalwa ek bann regleman ki zot devre obzerve dan pei ki SENYER, Bondye zot zanset pou donn zot, pour pran posesyon pour tou zot lavi.

² Zot ava detri konpletman tou bann landrwa kot bann nasyon ki zot pe al sase, ti servi zot bondye, lo bann latet montanny, lo bann kolin e anba tou pye dibwa ki annan feyaz ver.

³ Kas zot bann lotel, kraz zot bann ros sakre, bril bann poto sakre Asera, kas bann stati zot bann bondye. Konmsa, zot ava fer disparet non sa bann bondye dan tou sa bann landrwa.

⁴ Zot pa pou ador SENYER, zot Bondye parey lezot nasyon.

⁵ Me zot ava rod sa landrwa ki SENYER, zot Bondye ava swazir parmi zot bann tribi, pour ki son non i reste prezan, partou kot zot ava ale.

⁶ La, zot ava prezant zot lofrann, zot sakrifis, zot ladim, zot bann donasyon, zot lofrann volonter, e bann premye ne zot troupo.

⁷ Zot ava manz la, dan prezans SENYER, zot Bondye, avek zot fanmir, avek zot bann serviter. Zot ava dan lazwa, akoz SENYER in beni zot dan tou sa ki zot in antreprann.

⁸ Zot pa pou azir parey nou pe fer isi ozordi, kot sakenn pe fer sa ki i anvi.

⁹ Annefe, zot pa ankor ariv dan sa landrwa repo e dan patrimwann ki SENYER, zot Bondye pou donn zot.

¹⁰ Kan zot ava travers larivyer Zourden e viv dan pei ki SENYER, zot Bondye pou donn zot, i ava gard zot anpe avek zot bann lennmi ki otour zot e zot ava viv an sekirite.

¹¹ Alor, zot ava anmenn kot SENYER, zot Bondye dan sa landrwa ki i ava'n swazir pour manifeste prezans son non, tou sa ki mon'n dir zot: Zot bann sakrifis konplet, zot bann sakrifis lape, zot bann ladim, zot bann donasyon, tou bann lofrann volonter ki zot ava ofer anver SENYER.

¹² Zot tou, zot ava rezouir devan SENYER, zot Bondye avek zot bann zanfan, zot bann fiy, zot bann serviter ek zot bann servant, avek bann levit ki reste dan zot lavil e ki napa okenn par dan zot patrimwann.

Presizyon lo bann Sakrifis

¹³ Fer atansyon ou pa ofer ou bann sakrifis konplet dan nenport ki landrwa, nenport ki kote,

¹⁴ me zis la kot SENYER ava swazir parmi enn ou bann tribi, la kot ou ava ofer ou bann sakrifis konplet. Se la osi kot ou ava fer tou sa ki mon ordonn ou.

¹⁵ Sepandan, kan ou ava anvi, ou ava kapab touy en zannimo e manz lavyann dan nenport bann lavil dapre bann benediksyon ki SENYER, ou Bondye in akord ou. Dimoun enpir e dimoun pir ava kapab manz sa lavyann, konmsi zot ti pe manz lavyann gazel oubyen serf.

¹⁶ Me ou pa pou kapab manz disan okenn zannimo; ou ava les li koul ater, parey delo.

¹⁷ Dan bann lavil kot ou pou reste, ou pa pou osi kapab manz par lofrann dible, diven ek delwil bann premye ne ou bann troupo, ni okenn ou bann lofrann pour en ve, oubyen lofrann volonter oubyen ou bann donasyon.

¹⁸ Ou ava manz sa bann keksoz dan prezans SENYER, ou Bondye, la kot SENYER, ou Bondye ava swazir, ou, avek ou bann garson ou bann fiy, ou bann serviter ek ou bann servant, avek bann levit ki reste dan ou bann lavil. Dan prezans SENYER, ou Bondye, zot ava zouir ansanm pour tou son bann travay.

¹⁹ Veye ki osi lontan ki ou pe viv dan ou pei, ou pa negliz bann levit.

²⁰ Kan, parey in promet ou, SENYER, ou Bondye ava'n agrandi ou teritwar, e ki ou ava dir: Mon anvi manz lavyann, zis akoz ou anvi, ou ava kapab manz li kantite fwa ki ou anvi.

²¹ Si landrwa kot SENYER, ou Bondye ava swazir pour etabli son non i tro lwen avek ou landrwa reste, e ki parey mon'n ordonn ou fer, ou touy en zannimo parmi ou bann troupo parey SENYER in donn ou, alor, ou ava kapab manz sa lavyann kot ou, e kan ou anvi.

²² Ou ava manz sa lavyann parey ou manz lavyann gazel oubyen serf; sa dimoun ki pir koman sa enn ki enpir, ava kapab manze.

²³ Selman, fer sir ou pa manz son disan, akoz disan i lavi e ou pa devre manz lavi avek lavyann.

²⁴ Ou pa devre manz sa disan; ou ava vers li lo later parey ou vers delo.

²⁵ Pa manz disan, pour ki zot ava ere, ou, ek tou ou bann zanfan apre ou. Zot ava'n fer sa ki byen devan SENYER.

²⁶ Me ou ava anmenn zis sa ki ou'n konsakre ek ou bann sakrifis volonter dan landrwa kot SENYER ava swazir.

²⁷ Ou ava prezant ou bann sakrifis konplet, bann lavyann ek disan, lo lotel SENYER, ou Bondye. Disan ou lezot sakrifis ava ganny verse akote lotel SENYER, ou Bondye, me ou ava kapab manz lavyann.

²⁸ Fer sir ou obei tou sa bann komannman ki mon ordonn ou ozordi. Konmsa, ou ava kapab viv ere, ou, avek ou bann zanfan pour touzour, akoz ou ava pe fer sa ki byen e drwat devan SENYER, ou Bondye.

Lavertisman kont Idolatri

²⁹ SENYER, ou Bondye ava detri devan ou, bann nasyon kot ou pe ale pour ou pran tou sa ki zot posede. Ou ava pran tou zot byen, e etabli ou dan zot pei.

³⁰ Fer atansyon ou pa les ou ganny tante pour imit zot, menm apre ki ou'n detri zot. Ou pa pou al rod lenformasyon lo zot bann bondye e dir: Ki mannyer sa bann nasyon ti ador zot bann bondye? Mwan osi, mon oule fer parey zot.

³¹ Ou pa pou azir konmsa anver SENYER, ou Bondye, akoz sa bann nasyon in fer toudsort keksoz degoutan pour zot bann bondye ki SENYER i deteste. Zot ti menm bril zot bann garson ek zot bann fiy an sakrifis, an loner zot bann bondye.

³² Ou ava byen met an pratik tou sa ki mon'n ordonn ou. Ou pa pou ni azoute, ni tir nanryen.