Deterononm 1 - Labib An Kreol Seselwa

Bann Levennman lo Montanny Horeb

¹ La bann parol ki Moiz ti adres avek pep Izrael antye, ler zot ti ankor lot kote larivyer Zourden, dan dezer anfas Souf, ant Parann ek Tofel, Laban, Haserot ek Di-Zahab.

² I pran 11 zour pour sorti montanny Horeb ziska Kades Barnea, an pasan par rezyon montanny Seir.

³ Me 40 an, apre sorti Lezip, premye zour, onzyenm mwan, Moiz ti koz avek bann Izraelit sa ki SENYER ti'n ordonn li.

⁴ Moiz ti'n fek ganny laviktwar lo Sihonn, lerwa bann Amorit ki ti pe reste Hesbonn, ek Og, lerwa Basann, ki ti reste Astarot ek Edrei.

⁵ Ler i ti ankor lot kote larivyer Zourden, dan pei Moab, Moiz ti deside eksplik sa bann lalwa. La sa ki i ti dir zot:

Lord pour Kit Montanny Sinai

⁶ SENYER, nou Bondye ti koz avek nou dan montanny Horeb: Zot in reste ase lontan parmi sa bann montanny.

⁷ Repran zot semen e antre dan montanny kot bann Amorit e kot zot bann vwazen Kananeen, dan rezyon montanny Sepela, Negev ek rezyon lakot, dan pei bann Kananeen ek Liban, ziska gran larivyer Efrat.

⁸ La, mon met sa pei devan zot; ale e pran posesyon sa pei ki SENYER in promet zot bann zanset, Abrahanm, Izaak ek Zakob ek zot bann desandans apre zot.

Moiz I Nonm bann Ziz

⁹ Dan sa letan, mon ti dir zot: Mwan tousel, mon pa kapab diriz zot.

¹⁰ SENYER, zot Bondye in ogmant zot pep, e ozordi, zot in vin osi nonbre ki zetwal dan lesyel.

¹¹ Mon swete ki SENYER, Bondye zot zanset, ava ogmant zot mil fwa plis e ki i ava beni zot, parey in promet zot!

¹² Me ki mannyer mon pou kapab anmenn zot fardo ek pwa zot bann konplent mwan tousel?

¹³ Alor, swazir dan sakenn zot tribi, bann zonm saz, ki annan disernman, leksperyans, pour vin zot sef.

¹⁴ Zot ti reponn mwan: Sa plan ki ou'n propoze i bon.

¹⁵ Alor, mon ti pran zot bann sef tribi, bann zonm saz, eksperyanse e enstal zot koman zot sef: Sef 1,000, sef 100, sef 50, sef 10, ek bann zofisye ki pou ansarz sak tribi.

¹⁶ Alor, mon ti osi demann bann ziz: Ekout zot bann frer e ziz sakenn dapre lazistis, ki swa sitwayen oubyen rezidan etranze.

¹⁷ Zot pa devre fer preferans dan zot desizyon; ekout sa enn ki pti koman sa enn ki gran; pa per personn, akoz zizman i sorti kot Bondye. Bann ka ki tro difisil pour zot, anmenn kot mwan e mon ava ekoute.

¹⁸ Sanmenm sa ki mon ti ordonn zot fer.

Moiz I Anvoy Bann Espyon

¹⁹ Parey SENYER, nou Bondye ti'n ordonn nou, nou ti kit montanny Horeb e travers sa gran dezer terib ki zot ti war. Nou ti travers montanny bann Amorit, e nou ti ariv Kades Barnea.

²⁰ Mon ti dir zot ki zot in ariv lo montanny bann Amorit ki SENYER, nou Bondye pe al donn nou.

²¹ Gete! SENYER, ou Bondye in donn ou sa pei. Monte, al pran posesyon parey SENYER, Bondye ou bann zanset in promet zot; pa bezwen per, pran kouraz.

²² Zot ti vin kot mwan pour dir mwan: Annou anvoy bann zonm devan nou pour al eksplor pei. Zot ava retournen e donn nou en rapor pou konnen par ki semen nou pou monte e dan ki lavil nou pou pase.

²³ Mon ti war ki sa ti en bon plan. Alor, mon ti swazir 12 zonm parmi zot, enn par tribi.

²⁴ Zot ti al dan direksyon montanny. Ler zot ti ariv dan Vale Eskol, zot ti eksplor pei.

²⁵ Zot ti pran prodwi sa pei e anmenn kot nou. Zot ti donn nou en rapor. Zot ti dir: Sa pei ki SENYER, nou Bondye pou donn nou i bon.

²⁶ Me zot ti refize antre dan sa pei e zot ti revolte kont lord SENYER, zot Bondye.

²⁷ Zot in proteste dan zot latant. Zot ti dir: SENYER i ay nou; in fer nou sorti dan pei Lezip pour livre nou dan lanmen bann Amorit pour zot detri nou.

²⁸ Kote nou pe ale? Nou bann frer in dekouraz nou. Zot ti dir nou ki sa pep i pli for e pli gran ki nou; bann lavil i gran e bann fortifikasyon i monte ziska lesyel; ki zot in menm war bann desandan zean.

²⁹ Mon ti dir zot: Pa tranble, pa per zot.

³⁰ SENYER, zot Bondye ki pe mars devan zot. Li menm ki pou konbat dan zot plas, parey i ti fer devan zot, Lezip.

³¹ Dan dezer osi, ou ti war ki mannyer SENYER, ou Bondye ti soutenir ou, parey ler en papa i pran son zanfan dan lebra, tou dilon zot vwayaz, ziska ki zot in ariv isi.

³² Malgre sa, zot pa ti met zot konfyans dan SENYER, zot Bondye

³³ ki ti pe mars devan zot, pour trouv en plas pour zot kanpe. Aswar, i ti dan kolonn dife, lizour i ti dan nyaz pour montre zot semen ki zot devre pran.

Bondye I Pini Izrael

³⁴ Kan SENYER ti antann sa ki zot ti dir, i ti ankoler e i ti fer sa serman:

³⁵ Personn, pa enn dan sa zenerasyon pervers pou war sa bon pei ki mon'n promet donn zot bann zanset,

³⁶ eksepte Kaleb, garson Yefoune. Li, i pou war sa pei. Mon pou donn li ek son bann desandan sa pei kot in met son lipye, akoz son fidelite anver SENYER.

³⁷ SENYER ti menm ankoler kont mwan akoz zot. I ti dir: Ou osi, ou pa pou antre.

³⁸ Zozye garson Noun ou asistan ki pou antre. Donn li kouraz akoz i pou fer Izrael antre e pran posesyon sa pei.

³⁹ Me zot bann zanfan ki pa ankor konn diferans ant sa ki byen ek sa ki mal, ki zot ti krwar lennmi pou pran prizonnyen, pou antre dan sa pei. Mon pou donn zot sa pei; zot ki pou pran posesyon.

⁴⁰ Kanta zot, fer demi tour e retourn dan dezer, dan direksyon lanmer Rouz.

⁴¹ Alor, zot ti reponn mwan: Nou'n fer pese kont SENYER! Nou pare pour monte e al konbat, parey SENYER, nou Bondye ti'n ordonn nou. Alor, zot tou, zot ti pran zot zarm pour lager. Zot ti krwar ki i fasil mont dan montanny.

⁴² SENYER ti dir mwan: Dir zot pa monte pour al lager; mon pa pou avek zot. Konmsa, zot pa ava ganny bate par zot lennmi.

⁴³ Mon ti koz avek zot; me zot pa ti oule ekoute. Zot ti revolte kont lord SENYER e zot ti ganny lodas mont dan montanny.

⁴⁴ Bann Amorit ki ti viv dan sa bann montanny ti atak zot e fer zot fannen parey mous dimyel, depi Seir, ziska Horma.

⁴⁵ Kan zot ti retournen, zot ti plere devan SENYER. Me SENYER pa ti ni ekout zot lavwa ni pran ka avek zot.

⁴⁶ Alor, zot ti reste Kades, pandan en long letan.