Danyel 12 - Labib An Kreol Seselwa

Letan Lafen

¹ Dan sa letan, sa gran sef, Mikael, sa enn ki defann ou pep, pou leve. Sa letan pou en letan langwas, ki pa'n zanmen arive depi ki bann nasyon i egziste. Dan sa letan, ou pep pou ganny eparnyen; sa enn ki son non in ganny ekri dan liv, pou ganny eparnyen.

² Bokou parmi bann ki pe dormi dan lapousyer later, pou leve: Serten pour lavi eternel; lezot pour laont e pour maler eternel.

³ Bann ki annan disernman, pou briye parey lalimyer dan lesyel; bann ki'n diriz lepep ver lazistis, pou briye parey bann zetwal pour touzour e touzour.

⁴ Me ou, Danyel, gard sekre sa bann parol e kaste sa liv ziska letan lafen. Dan sa lepok, bokou pou esey konpran e zot konnesans pou ogmante.

⁵ Apre, mwan, Danyel, mon ti war de lezot zonm ki ti pe debout lo bor larivyer; enn ti lo en kote e lot, ti lo lot kote.

⁶ Enn ant zot ti dir avek sa zonm dan lenz linenn, ki ti par lao larivyer, “Konbyen letan ankor pour lafen sa bann keksoz ekstraordiner arive?”

⁷ Sa zonm abiye dan lenz linenn, ki ti par lao larivyer, ti lev son de lanmen ver lesyel. Mon ti antann li fer en serman par sa Enn ki vivan pour touzour. I ti dir, “Pour en lannen, de lannen e lanmwatye lannen. Kan lafors sa pep sen ava'n konpletman fini, tou sa bann keksoz pou ganny akonpli.”

⁸ Mon ti tande, me mon pa ti kapab konpran. Alor mon ti dir, “Mon senyer, ki mannyer tousala pou fini?”

⁹ I ti dir mwan, “Kontinyen, Danyel, akoz sa bann parol pou reste sekre, kaste, ziska letan lafen.

¹⁰ Bokou pou ganny pirifye, lave e netwaye; me bann malfeter pou kontinyen persiste dan sa ki mal. Okenn bann malfeter pa pou konpran, me sa enn ki annan disernman ava konpran.

¹¹ Depi letan ki sakrifis tou le zour i ganny aboli, pour ki sa pratik degoutan i ganny etabli, pou annan 1,290 zour.

¹² Byennere sa bann ki persevere e ariv ziska 1,335 zour.

¹³ Me ou, kontiny ou semen ziska lafen. Ou ava pran ou repo e ou ava leve pour resevwar ou rekonpans dan letan lafen.”