Danyel 11 - Labib An Kreol Seselwa

¹ Kanta mwan, pandan premye lannen renny Dariis, lerwa Med, mon ti avek li pour ed li e donn li sipor.

² Aprezan, sa ki mon pou anons ou i laverite. Ankor trwa lerwa pou leve dan Lapers. Katriyenm lerwa pou vin pli ris ki lezot avan. Par son larises, i pou vin for e i pou fer tou pour atak rwayonm Lagres.

³ Me en gerye pou vin lerwa. I pou gouvern avek gran lotorite e fer sa ki fer li plezir.

⁴ Letan in byen etabli li, son rwayonm pou ganny kase e divize ver kat kwen later; me pa son bann garson ki pou vin lerwa. Zot pa pou pwisan parey li. Son rwayonm pou ganny derasinen e ganny pase avek en lot.

⁵ Lerwa dan Sid, pou vin for, me enn son bann sef pou vin pli for ki li; i pou pran pouvwar.

⁶ Apre detrwa lannen, zot pou etabli en lalyans: Fiy lerwa Sid pou marye avek lerwa Nor, pour etabli sa lakor. Me i pa pou gard son pouvwar e son mari pa pou viv, ni son garson. I pou ganny touye avek son papa ek son mari, ansanm avek son lantouraz.

⁷ Enn parmi son desandans pou pran son plas. I pou monte avek en larme e penetre defans lerwa Nor. I pou atake e ganny laviktwar.

⁸ I pou menm anmenn Lezip tou zot bann bondye, zot bann stati an metal ek bann lobze valer annarzan e annor, koman piyaz lager. Pandan en pe lannen, i pou evite atak lerwa Nor.

⁹ Pourtan, lerwa Nor pou antre dan rwayonm lerwa Sid. Apre, i pou oblize retourn dan son teritwar.

¹⁰ Son bann garson pou sorti pour konba e rasanble en gran larme. Enn parmi zot, pou atake; parey an gro delo, pou balye e anmenn tou dan son semen. I pou retournen e kontinyen atake ziska son fortres.

¹¹ Lerwa Sid avek en gran lakoler, pou sorti kont lerwa Nor, ki pou rasanble en gran larme, me i pou ganny detri.

¹² Avek son laviktwar lo sa gran larme, leker lerwa Sid pou ranpli avek lorgey. I pou touy plizyer milye gerye, me son laviktwar pa pou dire.

¹³ Lerwa Nor pou retournen avek en pli gran larme ki sa enn avan. Apre en pe letan, detrwa lannen, i pou mont ankor en latak avek en gran larme e avek bokou lekipman lager.

¹⁴ Dan sa lepok, bokou dimoun pou revolte kont lerwa Sid. Bann zonm vyolan parmi ou pep pou revolte pour esey realiz sa vizyon, me zot pa pou reisi.

¹⁵ Lerwa Nor pou vini e enstal miray latak kont en lavil fortifye ki i pou pran. Lafors larme lerwa Sid avek son larme elit, pa pou kapab reziste, akoz zot pa pou ase for pour tenir kont latak.

¹⁶ Sa enn ki pou vin kont li pou fer sa ki fer li plezir; personn pa pou kapab opoz li. I pou enstal li dan sa pli zoli pei e i pou masakre tou sa ki dan son semen.

¹⁷ I pou deside anmenn lafors son rwayonm antye avek li, pour etablir en lalyans. I pou fer son fiy marye avek lerwa Sid, pour li detri sa pei, me i pa pou reisi.

¹⁸ Apre i pou tourn ver bann rezyon lakot e i pou kaptir bokou pei. Me en sef pou fer arete son larogans san ki i fer parey.

¹⁹ Apre, i pou retourn ver lavil fortifye dan son prop pei, me i pa pou reisi fer nanryen. I pou tonbe e personn pa pou war li ankor.

²⁰ Sa enn ki pou ranplas li, pou anvoy en diktater dan pli zoli pei dan rwayonm; me dan detrwa zour, i pou ganny detri, me pa par lakoler, ni par lager.

²¹ I pou ganny ranplase par en move zonm, san okenn pouvwar rwayal; i pou ariv trankilman, e i pou akapar rwayonm par bann mwayen malonnet.

²² Tou troup larme pou ganny detri devan li; sef lalyans osi.

²³ Par bann lalyans ki i'n fer, avek tronpri e avek led en pti group dimoun, i pou vin pwisan.

²⁴ Trankilman, i pou enstal li dan landrwa pli ris dan provens. I pou fer sa ki ni son bann zanset, ni zanset son bann zanset, pa'n zanmen fer. I pou partaz bann piyaz lager, bann byen ek larises. I pou fer plan pour atak bann lavil fortifye, me zis pandan en serten letan.

²⁵ I pou servi son lafors ek son determinasyon, e avek led en gran larme, pour atak lerwa Sid. Lerwa Sid pou sorti pour lager avek en gran larme e tre for, me i pa pou kapab tenir, akoz bann konplo kont li.

²⁶ Dimoun dan son prop lantouraz, ki manz avek li, pou detri li; son larme pou ganny detri konpletman e bokou dimoun pou mor.

²⁷ Sa de lerwa pou asiz devan menm latab. Me akoz zot leker ti ranpli avek mesanste, zot pou anbet kanmarad par bann mansonz. Me zot pa pou reisi akoz en letan in ganny fikse pour lafen.

²⁸ Lerwa Nor pou retourn dan son pei avek bokou larises; son leker pou tourn kont lalyans sen. I pou realiz son bann proze e retourn dan son prop pei.

²⁹ Kan son letan i arive, lerwa Nor pou retourn kont rwayonm Sid, me keksoz pa pou pas parey avan.

³⁰ Bann bato sorti Sip pou atak li; i pou dekouraze e retournen. Dan son lakoler, i pou tourn kont lalyans sakre e tonm dakor avek sa bann ki'n abandonn lalyans sakre.

³¹ Bann troup anba son komann, pou antre e rann enpir sanktyer ek son fortifikasyon. Zot pou fer arete bann sakrifis ofer sak zour e etabli en pratik degoutan.

³² Par bann parol mansonz, i pou fer abandonn lalyans, me bann ki lwayal anver Bondye pou kontinyen azir avek kouraz.

³³ Bann parmi lepep ki annan disernman, pou enstri bokou dimoun. Me pandan en pe letan, i annan ki pou tonbe: Serten pou mor par lepe, serten pou ganny brile dan laflanm, serten pou soufer dan prizon e zot byen pou ganny konfiske.

³⁴ Pandan sa letan lasoufrans, zot pou ganny en pe led, me bokou pou zwenn avek zot par fourbri.

³⁵ Parmi bann ki annan disernman, i annan ki pou tonbe, pour ki zot ganny netwaye, pirifye e lave ziska letan lafen, akoz sa pou ariv dan en letan ki'n ganny fikse.

³⁶ Sa lerwa pou fer sa ki i anvi. I pou ranpli avek lorgey e i pou plas li par lao tou bondye. I pou koz parol blasfenm kont Bondye ki par lao tou bondye. I pou reisi ziska ki lakoler Bondye i aparet. Bondye pou realiz sa ki i'n deside.

³⁷ I pou napa respe ni pour bann bondye son bann zanset, ni bondye prefere bann fanm. Sa lerwa pa pou montre okenn respe pour bondye, akoz i pou plas li par lao zot tou.

³⁸ I pou onor sa bondye ki defann bann lavil fortifye; en bondye ki son bann zanset pa'n konnen. I pou onor li avek lor, larzan, bann pyer presyez ek bann lobze valer.

³⁹ I pou atak bann landrwa fortifye avek led en bondye etranze. Sa enn ki aksepte li, i pou donn zot plas sef lo bokou dimoun. I pou rekonpans zot avek bann porsyon later.

⁴⁰ Kan letan lafen pou arive, lerwa Sid pou atak li. Me, lerwa Nor pou atak li avek kales lager, bann kavalye e avek bokou bato. I pou penetre dan bokou pei e travers zot frontyer parey en lavalas.

⁴¹ I pou antre dan sa pli zoli pei; i pou fer bokou viktim. Me Edonm, Moab ek bann sef Amonit pou reisi sape.

⁴² I pou anvai bann pei; menm Lezip pa pou ganny eparnyen.

⁴³ I pou sezi bann trezor: Lor ek larzan ek tou bann larises Lezip. Bann Libyen ek bann Etyopyen pou soumet devan li.

⁴⁴ Me rapor sorti dan Les, dan Nor, pou fer li per; i pou sorti dan en gran lakoler pour li detri e ekstermin bokou dimoun.

⁴⁵ I pou enstal son bann latant rwayal ant lanmer ek sa zoli montanny, montanny sen. I pou trouv son lafen san ki personn i vin sekour li.