Amos 7 - Labib An Kreol Seselwa

Premye Vizyon Profet Amos: Bann Sotrel

¹ La sa ki Senyer BONDYE ti montre mwan: I ti pe prepar en lesen sotrel. Sa ti zis ler zerb ti pe konmans repouse apre ki i ti'n ganny koupe pour lerwa.

² Kan bann sotrel ti'n fini manz tou zerb dan pei, mon ti kriye: Senyer BONDYE! Pardonn ou pep! Ki mannyer Zakob pou kapab sirviv? I telman pti!

³ Alor, SENYER ti regrete. I ti dir: Sa pa pou arive.

Dezyenm Vizyon: Dife

⁴ La sa ki Senyer BONDYE ti fer mwan war: Mon ti war li pare pour pini son pep par dife. Dife ti'n fini bril tou delo anba later, e i ti atak teritwar Izrael.

⁵ Alor, mon ti kriye: Senyer BONDYE, mon priy ou: Arete. Ki mannyer Zakob pou kapab sirviv? I telman pti!

⁶ Alor, SENYER ti sanz son lide. I ti dir: Sa osi pa pou arive.

Trwazyenm Vizyon: En Filaplon

⁷ SENYER ti donn mwan en lot vizyon: Mon ti war SENYER pe debout kot en miray avek en filaplon dan son lanmen.

⁸ SENYER ti poz mwan sa kestyon: Amos, ki ou war? Mon ti reponn, “En filaplon.” Alor, SENYER ti dir mwan, “Mon pe servi sa filaplon pour montre mon pep ki i parey en miray ki pa daplon. Mon pa pou eparny li.

⁹ Mon pou detri bann landrwa sakre desandan Izaak. Bann sanktyer Izrael pou ganny demoli. Mon pou servi lepe kont lafanmir rwayal Zeroboanm.”

Amos ek Amasya

¹⁰ Amasya ki ti pret dan lavil Betel, ti anvoy en rapor kot Zeroboanm, lerwa Izrael, pour dir: Amos pe fer konplo kont ou dan rwayonm Izrael. Son bann parol pou detri pei.

¹¹ La sa ki Amos in dir: “Zeroboanm pou mor dan lager, e pep Izrael pou ganny deporte lwen avek zot pei.”

¹² Amasya ti reponn Amos, “Sorti isi, ale! Profet! Sov dan pei Zida. Laba, ou ava kapab ganny ou lavi e profetize.

¹³ Aret fer profet isi Betel. Isi i sanktyer lerwa, tanp rwayal.”

¹⁴ Amos ti reponn Amasya, “Mon pa ni profet, ni desandan en profet. Mon fer elvaz bef e mon kiltiv pye sikomor.

¹⁵ Me SENYER ti pran mwan deryer mon troupo e i ti dir mwan: Al anons mon parol avek mon pep Izrael.”

¹⁶ “Aprezan, ekout parol SENYER. Ou dir: Aret profetiz kont Izrael, aret pres kont lafanmir Izaak.

¹⁷ Alor, la sa ki SENYER i deklare: Ou fanm pou vin en prostitye dan lavil; ou bann zanfan pou mor dan lager; ou later pou ganny arpante e partaze. Ou menm, ou pou mor dan en pei etranze e pep Izrael pou ganny deporte lwen avek zot pei.”