Amos 3 - Labib An Kreol Seselwa

Bann Temwen kont Izrael

¹ Pep Izrael! Ekout parol ki SENYER i prononse kont ou, lo tou bann fanmir ki mon'n fer monte, sorti Lezip:

² Parmi tou bann nasyon ki peple later, ou ki mon'n swazir. Pour sa rezon, mon pou fer ou rann kont tou ou bann krim.

Misyon Profet

³ Eski de zonm i mars ansanm, si zot pa'n tonm dakor avan?

⁴ Eski en lyon i kriye dan lafore si i pa ankor atrap nanryen pour manze? Eski en zenn lyon i gronnyen dan son trou si i pa'n atrap nanryen?

⁵ Eski en zwazo i tonm dan en latrap si napa nanryen pour atir li? Eski en latrap i sote si napa nanryen ki'n pri ladan?

⁶ Eski tronpet i sonnen dan lavil san fer enkyet bann zabitan? Eski en maler i arive dan en lavil si SENYER pa'n anvoye?

⁷ Annefe, Senyer BONDYE pa fer nanryen, san revel son plan avek son bann serviter, bann profet!

⁸ Kan en lyon i kriye, lekel ki pa pou per? Kan Senyer BONDYE in koze lekel ki oze pa anons son mesaz?

Zizman Bondye kont Samari

⁹ Al anons dan bann pale Asdod e dan bann pale Lezip: Rasanble zot lo bann montanny Samari, zot ava war bann gran dezord ek vyolans ki pe ganny komet se li.

¹⁰ SENYER i deklare: Bann zabitan Samari pa konn viv dan en fason onnet; zot ranpli zot pale avek vyolans ek bann lobze vole.

¹¹ Pour sa rezon, la sa ki Senyer BONDYE i deklare: En lennmi pou anserkle pei. I pou detri ou bann fortifikasyon e depouy ou bann pale.

¹² La sa ki SENYER i deklare: Parey en berze i aras dan lagel en lyon de lapat oubyen zis en bout zorey en mouton, konmsa menm, ki pep Izrael ki viv dan Samari, pou ganny sove, pandan ki i akroupi dan zot sofa, oubyen lo zot kousen dan lili.

Zizman kont Samari

¹³ La sa ki Senyer BONDYE, Bondye liniver i deklare: Ekoute, e anons sa bann lavertisman bann desandan Zakob:

¹⁴ Zour mon pou pini pep Izrael pour son bann krim, mon pou detri tou bann lotel ki dan Betel. Tou bann kwen lotel pou ganny kase e pou tonm ater.

¹⁵ Mon pou detri zot bann rezidans liver ek zot bann pale lete. Mon pou detri tou sa bann pale ki'n ganny dekore avek livwar. Tou sa bann gran lakaz pou disparet. SENYER ki deklare.