Amos 2 - Labib An Kreol Seselwa

Kont bann Zabitan Moab

¹ La sa ki SENYER i deklare: Akoz sa kantite krim zabitan Moab, mon pa pour sanz mon desizyon: Akoz zot in bril bann lezo lerwa Edonm, ziska lasann,

² mon pou met dife dan pei Moab, e i pou bril tou bann pale dan Keriot. Bann zabitan Moab pou mor dan gran fraka lager avek tapaz tronpet.

³ Mon pou fer disparet son ziz, e detri tou son bann sef avek li. SENYER ki'n deklare. Kont bann Zabitan Zida

Kont bann Zabitan Zida

⁴ La sa ki SENYER i deklare: Akoz sa kantite krim Zida, mon pa pour sanz mon desizyon: Zot in rezet mon lansennyman, zot pa'n obei mon komannman. Zot in les zot ganny tronpe, parey zot zanset ki ti ganny egare par bann mansonz. Zot osi, zot in swiv sa bann mansonz.

⁵ Mon pou met dife dan Zida ki pou bril tou bann pale dan Zerizalenm. Zizman kont Izrael

Zizman kont Izrael

⁶ La sa ki SENYER i deklare: Akoz sa kantite krim Izrael, mon pa pour sanz mon desizyon: Zot in vann dimoun inosan, koman lesklav, pour larzan ki zot pa'n kapab rann. Zot in vann bann pov pour en per sandal.

⁷ Zot kraz bann malere dan lapousyer. Zot napa respe pour okenn drwa bann ki feb. En zonm i dormi avek menm fanm ki son papa; sa i en ensilt pour mon loner.

⁸ Kot bann lotel, zot dormi lo bann lenz ki zot in pran koman gaz avek bann malere. Dan tanp zot bondye, zot bwar diven ki zot in konfiske avek dimoun.

⁹ Pourtan, mon ti detri bann Amorit devan zot. Sa bann zabitan ti osi gran ki bann pye sed e osi solid ki bann pye senn. Mon ti detri tou zot fri ek zot bann rasin.

¹⁰ Mon ti fer ou sorti Lezip; mon ti kondwir ou atraver dezer pandan 40 an, pour ou pran posesyon pei bann Amorit.

¹¹ Mon ti apel serten parmi zot bann zanfan pour vin profet. Parmi zot bann zennzan, mon ti apel serten pour konsakre zot pour mwan, par en ve.

¹² Me ou'n fer zot bwar diven alor ki zot pa ti devre bwar, e anpes bann profet koz lo mon non.

¹³ Aprezan, mon pou kraz ou parey en saret ranpli avek dible ki kraz tou keksoz kot i pase.

¹⁴ Menm sa enn ki tay vit pa pou kapab sove; menm bann ki pli for pa pou kapab servi zot lafors; Bann pli bon gerye pa pou kapab sov zot lavi.

¹⁵ Bann tirer fles pa pou kapab reziste; sa pli bon atlet pa pou kapab sape; bann kavalye pa pou kapab sov zot lavi.

¹⁶ Sa zour la, menm bann pli brav gerye pou sove touni. SENYER ki deklare.