Abdyas 1 - Labib An Kreol Seselwa

¹ Vizyon Abdyas. La sa ki Senyer BONDYE i dir lo size Edonm: Senyer BONDYE i anvoy son mesaze kot bann nasyon e nou'n antann son mesaz: Annou met nou pare! Annou al atak Edonm!

Senyer Pou Pini Edonm

² SENYER i dir avek Edonm: Mon pou afebli ou parmi bann nasyon. Tou dimoun pou mepriz ou.

³ Ou larogans ki pe tronp ou. Ou pe viv dan kavern ros, ou demer i anler lo montanny. Ou dir dan ou menm: Lekel ki kapab fer mwan desann.

⁴ Menm si ou fer ou demer anler parey en leg, menm si ou al viv parmi bann zetwal, mon pou fer ou desann.

⁵ Si voler oubyen kaser lakaz i pas kot ou aswar, ki mannyer ou pou kapab reste trankil? Pa zot pou pran tou sa ki zot kapab? Si bann zouvriye i vin rekolte rezen dan ou plantasyon, pa zot pou kit zis bann pti grap dan pye?

⁶ Ezai! Ou'n ganny depouye. Ou bann trezor kasyet i ganny dekouver.

⁷ Ou bann zanmi pou tronp ou, e ou pou ganny sase dan ou teritwar. Ou bann zanmi entim pou pran ou byen: Ou bann zanmi pros pou servi ou dipen pour trik ou. Zot nepli annan disernman.

⁸ SENYER i deklare: Sa menm zour mon pou fer disparet lasazes ek disernman dan pei Edonm.

⁹ Lavil Temann! Lafreyer pou sezi ou bann gerye, de sort ki tou bann zabitan dan rezyon montanny Ezai pou ganny touye.

¹⁰ Akoz ou depouy e touy ou frer Zakob, ou pou ganny kouver avek laont e ou pou ganny detri pour touzour.

¹¹ Sa zour ki ou ti reste alekar, lennmi ti pran tou larises. Bann etranze ti antre e tir osor pour Zerizalenm. Ou osi, ou ti fer parey zot.

¹² Edonm! Ou pa ti devre kontan zour maler ou frer, zour son maler. Ou pa ti devre rezoui lo move sor garson Zida, zour zot maler. Ou pa ti devre rezoui son detres.

¹³ Ou pa ti devre antre dan lavil mon pep zour katastrof ti tonm lo li. Ou pa ti devre kontan son maler, sirtou zour i ti dan detres.

¹⁴ Ou pa ti devre debout dan krwaze semen pour atak bann sirvivan ki ti pe sove. Ou pa ti devre livre bann sirvivan zour detres.

¹⁵ Annefe, zour SENYER i pros, en zour terib pour tou bann nasyon. Ou pou ganny trete parey ou'n tret lezot. Ou bann move aksyon pou retonm lo ou latet.

Laviktwar bann Izraelit

¹⁶ Annefe, parey ou'n bwar lo mon montanny sen, bann nasyon pa pou arete bwar, zot pou bwar ziska zot sou e disparet san les okenn latras.

¹⁷ Lo montanny Siyon bann sirvivan pou trouv en labri. Desandan Zakob pou repran posesyon zot pei.

¹⁸ Zakob pou parey en dife e desandan Zozef pou en laflanm. Ezai pou parey lapay ki pou ganny brile dan dife, san les okenn sirvivan. SENYER ki'n deklare.

¹⁹ Zabitan Negev pou pran posesyon montanny Ezai; zabitan laplenn pou pran pei bann Filisten. Zot pou pran posesyon Efraim ek Samari; Benzamen pou posed Galaad.

²⁰ Larme bann egzile Izrael pou pran pei bann Kananeen ziska Sarepta. Bann egzile Zerizalenm dan Sefarad pou pran posesyon bann lavil dan Negev.

²¹ Bann liberater i mont montanny Siyon pour ziz montanny Edonm; SENYER ki pou rennyen lo sa rwayonm.