2 Timote 1 - Labib An Kreol Seselwa

¹ Sa let i sorti kot Pol, zapot Zezi-Kri par lavolonte Bondye ki'n ganny anvoye pour anons promes lavi ki nou posede dan Zezi-Kri.

² Pour Timote, mon zanfan byenneme: Mon demann Bondye nou Papa, e Zezi-Kri nou Senyer i donn ou lagras, pardon ek lape.

Rekonesans ek Lankourazman

³ Mon remersye Bondye ki mon servi avek en konsyans pir, parey mon bann zanset ti fer. Mon remersye li sak fwa ki mon mazin ou dan mon lapriyer, aswar koman lizour.

⁴ Mon rapel ou bann larm e mon annan en gran dezir war ou, pour ki mon leker ava ranpli avek lazwa.

⁵ Mon rapel ou lafwa senser, sa lafwa ki ou gran manman Lois ek ou manman Enis ti posede avan ou, e ki aprezan, mon sir, ou osi, ou posede.

⁶ Pour sa rezon, mon rapel ou: Gard vivan sa don ki Bondye ti donn ou kan mon ti enpoz lanmen lo ou.

⁷ Annefe, Bondye pa'n donn ou en lespri lafreyer; o kontrer, en lespri ki ranpli nou avek lafors, lanmour ek disiplin.

⁸ Pa bezwen onte pour temwanny an faver nou Senyer, ni an mon faver, mwan ki son prizonnyen. O kontrer, aksepte pour soufer avek mwan pour Bonn Nouvel an kontan lo pwisans Bondye.

⁹ Li menm ki'n sov nou e ki'n apel nou pour vin son pep, pa akoz nou bann bon aksyon, me akoz son prop plan ek son lagras. Depi touzour, i'n akord nou sa lagras par Zezi-Kri.

¹⁰ Me aprezan, i'n manifeste sa lagras par laparisyon nou Sover, Zezi-Kri, ki'n detri pouvwar lanmor e ki par Bonn Nouvel, in revel nou lavi imortel.

¹¹ Bondye in swazir mwan koman en zapot e en ansennyan pour anons Bonn Nouvel.

¹² Pour sanmenm sa rezon ki mon pe soufer. Me mon pa onte, akoz mon konnen dan ki mon'n met mon konfyans. Mon osi sir ki i kapab gard sa ki i'n konfye mwan ziska sa Zour.

¹³ Pran koman en model, bann parol laverite ki mon'n ansenny ou. Reste ferm dan lafwa ek lanmour ki nou posede dan lakominyon avek Zezi-Kri.

¹⁴ Avek led Lespri Sen ki reste dan ou, gard byen bann lenstriksyon ki ou'n ganny konfye.

¹⁵ Parey ou konnen, tou bann ki reste dan provens Lazi in abandonn mwan, an kontan Fizel ek Hermozenn.

¹⁶ Mon demann Bondye montre son labonte pour lafanmir Onezifor akoz i'n souvan rekonfort mwan. I pa'n onte akoz mon dan prizon.

¹⁷ O kontrer, kan i ti ariv Ronm, i ti rod mwan avek enpasyans, ziska ki i ti trouv mwan.

¹⁸ Mon demande ki zour zizman, Senyer ava akord li konpasyon ki sorti kot Bondye. Ou osi konnen, sa kantite servis ki i'n rann mwan kan mon ti Efez.