2 Tesalonisyen 1 - Labib An Kreol Seselwa

¹ Sa let i sorti kot Pol, Silas ek Timote, pour Legliz Tesalonik, dan Bondye, nou Papa, e dan Senyer Zezi-Kri.

² Bondye, nou Papa ek nou Senyer Zezi-Kri ava donn zot lagras ek lape.

Zizman kan Kris pou Retournen

³ Mon bann frer ek ser! Nou devre touzour remersye Bondye pour zot. Sa i byen, akoz zot lafwa in bokou progrese e lanmour ki zot posede pour kanmarad pe touzour ogmante.

⁴ Pour sa rezon, dan bann Legliz, nou fyer akoz zot, pour zot perseverans ek zot lafwa, malgre bann persekisyon ek bann soufrans ki zot pas ladan.

⁵ Sa i prouve ki zizman Bondye i zis. I oule fer zot vin diny pour son Rwayonm pour lekel zot pe soufer.

⁶ Annefe, Bondye i zis. I pou fer soufer bann ki'n fer zot soufer.

⁷ Zot ki ti pe soufer, e nou osi, i pou donn nou repo. Sa pou arive, kan Senyer Zezi pou aparet dan lesyel avek son bann lanz pwisan.

⁸ I pou vin dan en laflanm dife, pour pini bann ki refiz konn Bondye ek bann ki pa obei Bonn Nouvel nou Senyer Zezi.

⁹ Zot pou sibir destriksyon eternel koman pinisyon, lwen avek prezans Senyer e avek laglwar son pwisans.

¹⁰ Sa zour, i pou vini pour li ganny onore e admire par tou bann ki pour li e ki krwar dan li. Zot osi, zot ava la, akoz zot in krwar dan mesaz ki nou'n anons zot.

¹¹ Pour sa rezon ki nou priy toultan pour zot. Nou demann Bondye pour rann zot diny pour sa lavi ki i ofer zot. Nou demande ki par son pwisans, i realiz tou zot dezir pour fer sa ki byen e rann zot lafwa aktif.

¹² Alor, non nou Senyer Zezi ava ganny glorifye par zot, e Senyer ava onor zot. Tousala i en don ki sorti kot nou Bondye, ek Senyer Zezi-Kri.