2 Samyel 8 - Labib An Kreol Seselwa

Laviktwar David lo Son Lennmi

¹ Apre sa, David ti ranport laviktwar lo bann Filisten, e vin zot met. I ti pran kontrol avek bann Filisten zot lavil kapital.

² I ti bat osi bann zabitan Moab ki i ti fer dormi ater, e mezir zot avek en bout lakord. I ti fer touy sak de premye mezir, e les viv trwazyenm. Bann Moabit ti vin anba dominasyon David, e zot ti forse pey taks.

³ David ti bat Adadezer, garson Rehob, lerwa Soba, ler i ti retabli son dominasyon tou dilon larivyer Efrat.

⁴ David ti pran prizonnyen 1700 zonm seval, 20,000 solda apye. I ti koup zaret tou bann seval, me i ti gard en santenn pour li.

⁵ Ler bann Siriyen Damas ti vin ed Adadezer lerwa Soba, David ti touy 22,000 Siriyen.

⁶ I ti etabli solda dan Lasiri dan lavil Damas, e soumet bann Siriyen anba son dominasyon e fer zot pey taks. SENYER ti donn David laviktwar partou kot i pase.

⁷ David ti pran bann boukliye annor ki ti pour bann zofisye Adadezer, e anmenn Zerizalenm.

⁸ Lerwa David, ti sezi en gran kantite bronz dan de lavil Adadezer, Beta ek Berotai.

⁹ Toi, lerwa Hamat, ti tande ki David ti'n bat larme Adadezer.

¹⁰ I ti anvoy son garson Yoranm kot lerwa David avek konpliman ek felisitasyon pour son laviktwar lo Adadezer. Toi ti osi dan lager avek Adadezer. Yoranm ti anmenn prezan larzan, lor ek bronz.

¹¹ Lerwa David, ti konsakre sa bann lobze pour SENYER, parey i ti'n deza konsakre tou larzan ek lor ki i ti'n sezi avek tou bann nasyon ki i'n ranport laviktwar,

¹² Siriyen, Moabit, Amonit, Filisten, Amalek ek tou bann lobze sezi avek Adadezer, garson Rehob, lerwa Soba.

¹³ David ti'n vin renonmen. Ler i ti retournen, i ti touy 18,000 zonm dan vale Disel.

¹⁴ I ti etabli son solda dan pei Edonm, atraver Edonm antye i ti plas bann solda, e tou bann zabitan Edonm ti soumet anba kontrol David. SENYER ti donn David laviktwar partou kot i ti ale.

¹⁵ Alor David ti etabli son renny lo pep Izrael antye; e i ti rann lazistis son preferans lo son pep antye.

¹⁶ Zoab, garson Serouya, ti sef larme, e Zozafat, garson Ahiloud, ti Arsivis,

¹⁷ Sadok, garson Ahitoub ek Ahimelek, garson Abiatar, ti pret, e Seraya ti sekreter;

¹⁸ Benaya, garson Yoyada ti konmann bann Keretit ek bann Peletit; e bann garson David ti pret.