2 Samyel 4 - Labib An Kreol Seselwa

Lanmor Isboset

¹ Kan Isboset, garson Sail ti tande ki Abner in mor Hebron, i ti dekouraze, e pep Izrael antye ti trakase.

² Garson Sail ti annan de zonm, sef larme ki al fer bann latak. Enn ti apel Baana, e lot ti apel Rekab. Zot ti garson Rimonn, en Benzamit ki sorti Berot ki ganny konsidere koman parti teritwar Benzamen,

³ depi ki bann zabitan Berot ti sove pour al reste Gitaim kot zot in reste ziska ozordi.

⁴ Garson Sail, Zonatan, ti annan en garson ki son lipye ti paralize. I ti annan zis senk an kan nouvel lanmor Sail ek Zonatan ti arive sorti Zizreel. Son nennenn ti pran li e sove, me dan son pe degaze, i ti tonbe e vin paralize. I ti apel Mefi-Boset.

⁵ Sa de garson Rimonn ki sorti Berot, Rekab ek Baana ti al kot Isboset e zot ti ariv laba pandan letan pli so dan lazournen, Isboset ti pe repoze.

⁶ Zot ti antre dan lakaz konmsi pour al pran dible, e zot ti pik Isboset dan son vant, e sove.

⁷ Donk, zot ti'n antre dan lakaz letan i ti pe dormi lo lili dan son lasanm. Zot ti koup son latet e anmenn avek zot. Zot ti vwayaz tou lannwit atraver Araba.

⁸ Zot ti anmenn latet Isboset kot David, Hebron, e dir lerwa, “La latet Isboset, garson Sail, ou lennmi, ki ti pe esey touy ou. Ozordi, SENYER in vanz pour mon senyer lerwa, kont Sail ek son desandan.”

⁹ David ti reponn Rekab ek Baana son frer, sa de garson Rimonn, sa Beerotit, “Mon fer serman devan SENYER ki vivan, ki'n sov mwan dan tou bann katastrof.

¹⁰ Sa dimoun ki'n vin anons mwan: Sail in mor, ti krwar i pe anons mwan en bon nouvel, me an rekonpans sa bon nouvel, mon ti fer atrap li e touy li laba.

¹¹ Ki pli gran rekonpans mon pou donn sa bann move dimoun ki'n touy en inosan dan son prop lakaz lo son lili, pa mon pou bezwen fer zot peye e debaras later avek zot?”

¹² David ti donn lord son bann zonm pou touy zot. Zot ti koup zot lanmen ek zot lipye, e pann zot dan bor en pwi Hebron. Apre, zot ti pran latet Isboset e anter dan latonm Abner Hebron.