2 Samyel 22 - Labib An Kreol Seselwa

¹ Zour ki SENYER ti delivre David dan lanmen tou son bann lennmi e dan lanmen Sail, David ti pronons bann parol sa kantik pour SENYER.

² I ti dir: SENYER i mon ros protekter, mon fortres, mon liberater.

³ I mon Bondye, mon ros protekter, kot mon an sekirite; mon boukliye, mon korn ki delivre mwan mon sitadel, mon refiz. Ou mon Sover ki protez mwan kont vyolans.

⁴ Mon apel SENYER; mon loue li, i delivre mwan kont mon bann lennmi.

⁵ Kouran lanmor ti'n antortiy mwan, gro laroul destriksyon ti ranpli mwan avek lafreyer;

⁶ lasenn lemonn lanmor ti'n antour mwan, bann latrap lanmor ti la devan mwan.

⁷ Dan mon detres, mon envok SENYER, mon envok mon Bondye: Depi son tanp i antann mwan, mon bann apel osekour ti ariv dan son zorey.

⁸ Later ti tranble e ganny sekwe; bann fondasyon lesyel ti tranble; zot ti tranble akoz SENYER ti ankoler.

⁹ Lafimen ti pe sorti dan son nennen, e labrez ek laflanm ti sorti dan son labous; bann labrez anflanmen ti sorti.

¹⁰ I ti deroul lesyel e i ti desann ek en nyaz epe anba son lipye.

¹¹ I ti mont lo en seriben e i ti anvole, i ti plannen lo lezel divan.

¹² Fernwanr ti antour li, koman gro delo atraver bann nyaz epe.

¹³ Devan li bann labrez ki bann zekler ti'n alimen, ti briye.

¹⁴ Dan lesyel, lavwa SENYER ti rezonnen parey loraz.

¹⁵ I ti lans son bann dart e dispers bann lennmi. I ti anvoy bann zekler e zot ti taye.

¹⁶ SENYER! Devan ou bann menas, devan tanpet ou lakoler, fon lanmer ti aparet e fondasyon later ti ganny ekspoze.

¹⁷ Alor, depi lao dan lesyel, SENYER ti anvoy lanmen e atrap mwan. I ti tir mwan dan sa gran kouran delo.

¹⁸ I ti delivre mwan dan lanmen mon bann lennmi ki pwisan, e kont sa bann ki ay mwan, akoz zot ti tro for pour mwan.

¹⁹ Zot ti atak mwan zour mon ti dan maler; me SENYER in vin sekour mwan.

²⁰ In tir mwan dan danze, in liber mwan; in sov mwan, akoz i kontan mwan.

²¹ SENYER i rekonpans mwan dapre mon lazistis; i beni mwan akoz mon lanmen i prop.

²² Mon'n met an pratik komannman SENYER. Mon'n reste fidel anver mon Bondye.

²³ Mon'n gard tou son bann lalwa. Mon pa'n dezobei son bann regleman.

²⁴ Mon san repros devan li. Mon'n evit fer okenn pese.

²⁵ SENYER in war dibyen ki mon'n fer e in rekonpans mwan, akoz mon lanmen i prop devan li.

²⁶ Ou fidel anver sa enn ki fidel. Ou bon anver sa enn ki bon.

²⁷ Ou pir avek sa enn ki pir; sever avek sa enn ki rize.

²⁸ Ou delivre dimoun ki senp. Ou fer bann orgeye bes zot lizye.

²⁹ SENYER! Mon Bondye! Ou ki alim mon lalanp. Ou ki mon lalimyer ler mon dan fernwanr.

³⁰ Avek ou led, mon kapab kraz en larme; avek mon Bondye, mon kapab sot en miray.

³¹ Bondye i en gid parfe. Bann promes SENYER i vre; i en proteksyon pour tou sa ki vin pran refiz kot li.

³² Lekel ki Bondye apar SENYER? Lekel ki nou Ros protekter apar Bondye?

³³ Bondye ki ranpli mwan avek lafors e i met mwan lo bon semen.

³⁴ I fer mwan taye parey en serf e met mwan debout lo montanny.

³⁵ I antrenn mwan pour konba; i ed mwan redi en fles an bronz.

³⁶ Ou donn mwan ou boukliye laviktwar. Par ou lanmen drwat ou soutenir mwan. Ou led in rann mwan for.

³⁷ Ou donn plis lespas mon lipye, e ou anpes mwan tonbe.

³⁸ Mon pourswiv mon bann lennmi e mon atrap zot. Mon pa retournen ziska ki mon'n fini avek zot.

³⁹ Mon aplati zot, zot pa kapab leve. Mon met zot anba mon lipye.

⁴⁰ Ou ranpli mwan avek lafors pour konba. Ou fer mon bann lennmi pliye devan mwan.

⁴¹ Ou fer mon bann lennmi sove devan mwan. Mon detri mon bann ladverser.

⁴² Zot kriye, me personn pa vin sov zot. Zot kriy ver SENYER, me i pa reponn zot.

⁴³ Mon kraz zot parey lapousyer ki pe anvole dan divan. Mon mars lo zot parey labou lo semen.

⁴⁴ Ou delivre mwan kont soulevman lepep. Ou fer mwan sef bann nasyon. En pep ki mon pa konnen in vin mon serviter.

⁴⁵ De ki zot antann mon lavwa, zot obei. Bann etranze i vin flat mwan.

⁴⁶ Bann etranze i perdi kouraz. Zot sorti an tranblan dan zot landrwa kasyet.

⁴⁷ SENYER i vivan! Mon loue mon Ros protekter. Mon egzalte Bondye mon Sover.

⁴⁸ I donn mwan laviktwar lo mon bann lennmi e fer bann pep soumet anba mwan.

⁴⁹ I delivre mwan kont mon bann lennmi. I donn mwan laviktwar lo sa bann ki atak mwan. I sov mwan kont dimoun ki fer vyolans.

⁵⁰ Pour tousala, mon pou loue ou parmi bann nasyon e sant an loner ou non.

⁵¹ SENYER i donn son lerwa bokou laviktwar. I montre son fidelite pour sa enn ki i'n konsakre, pour David ek son desandans pour touzour.