2 Samyel 17 - Labib An Kreol Seselwa

Housai I Kontredir Konsey Ahitofel

¹ Ahitofel ti dir Absalon, “Les mwan swazir 12,000 zonm e al atak David pandan lannwit menm.

² Mon ava profite letan i ankor fatige, e dekouraze, pour mwan fer li tranble, e fer lepep ki avek li sove. Alor mon ava touy zis lerwa tousel.

³ Annefe, kan sa enn ki ou pe pourswiv ava'n mor, lepep antye ava retourn avek ou e zot ava viv anpe.”

⁴ Sa konsey ti sanble byen bon pour Absalon ek tou bann ansyen dan Izrael.

⁵ Sepandan, Absalon ti dir, “Apel ankor Housai, sa Arkit, pour nou antann sa ki i annan pour dir.”

⁶ Housai ti vin kot Absalon, ki ti dir li, “La sa ki Ahitofel in konseye fer. Eski fodre nou met an pratik son proze ou non?”

⁷ Housai ti dir Absalon, “Sa fwa si, konsey ki Ahitofel in donnen pa bon.”

⁸ I ti azoute, “Ou konn tre byen ou papa ek son bann zonm: Zot bann gerye; zot ankoler parey en lours ki'n perdi son piti dan lakanpanny. Ou papa i en gerye; i pa pou pas lannwit avek lepep.

⁹ Mon asire ki konmela menm, i pe kasyet dan kek trou, oubyen dan en lot landrwa. Si i arive ki i annan ki ganny touye parmi nou, nouvel pou fannen e dimoun pou dir: Larme Absalon in ganny bate.

¹⁰ Alor, menm bann ki pli vayan, bann ki kouraze koman en lyon, pou dekouraze, akoz pep Izrael antye i konnen ki ou papa i en gerye, e ki bann vayan gerye ki avek li.

¹¹ Mon konseye alor, ki Izrael antye i rasanble pre avek ou, depi Dann ziska Berseba an kantite, parey gren disab ki annan obor lanmer, e ki ou menm personnelman diriz zot dan konba.

¹² Dan nenport landrwa kot i ete, nou pou ganny li, nou pou tonm lo li parey laroze i tonm lo zerb. Napa en sel ki pou sove, ni li, ni okenn son bann zonm.

¹³ Si i al kasyet dan en lavil, pep Izrael antye i anmenn lakord kot sa lavil, e trenn li dan larivyer ziska ki i pa reste en sel pti ros.”

¹⁴ Absalon ek tou Izraelit ki ti la, ti dir, “Konsey Housai i pli bon ki pour Ahitofel.” SENYER ti'n deside pour fer tonbe tou bon konsey Ahitofel, e konmsa anmenn maler lo Absalon.

David I Travers Larivyer Zourden

¹⁵ Housai ti dir avek bann pret Sadok ek Abiatar, “Ahitofel in donn Absalon ek bann ansyen tel e tel konsey; me mwan, mon'n donn tel e tel konsey.

¹⁶ Aprezan, anvoy deswit en rapor kot David, e dir li pa reste dan laplenn aswar, me al pli lwen posib. Atansyon ki i ekspoz son lavi ek lavi bann dimoun ki avek li.”

¹⁷ Zonatan ek Ahimas ti pe espere pre kot sours Blansiser. En servant ti pe al fer zot en rapor e zot menm, zot ti pe al fer en rapor avek lerwa David. Annefe, zot pa ti oze les dimoun war zot, ler zot ti pe antre dan lavil.

¹⁸ Me en zennonm ti war zot, e ti al dir Absalon. Deswit, tou le de ti ale, e zot ti ariv Bahourim kot en zonm ki ti annan en pwi dan son lakour, e zot ti desann ladan.

¹⁹ Fanm sa zonm ti tal en dra lo louvertir sa pwi, e fann lagrenn pile lo la, pour ki personn pa remarke.

²⁰ Bann serviter Absalon ti ariv kot sa fanm. Zot ti demann li, “Oli Ahimas ek Zonatan?” Sa fanm ti reponn, “Zot in travers lot kote larivyer.” Bann zonm ti rode, me ler zot pa ti trouv personn, zot ti retourn Zerizalenm.

²¹ Apre zot depar, Ahimas ek Zonatan ti sorti dan pwi, e al fer en rapor kot lerwa David. Zot ti dir David, “Travers larivyer deswit, Ahitofel in donn tel e tel konseye kont ou.”

²² David ek tou dimoun ki ti avek li, ti travers larivyer Zourden. Ler lizour ti fer, tou ti'n fini traverse; ti napa en sel ki ti'n reste deryer.

²³ Ler Ahitofel ti war ki zot pa ti'n aksepte son konsey, i ti sel son bourik, e al se li dan son lavil. I ti donn lord son fanmir, e al pann son lekor. Zot ti anter li dan latonm son papa.

David I Ariv Mahanaim

²⁴ David ti ariv Mahanaim. Alor, Absalon, avek troup Izraelit ki ti avek li, ti travers larivyer Zourden.

²⁵ Absalon ti nonm Amasa koman sef larme dan plas Zoab. Amasa ti garson Yitra, en Izraelit, ki i ti gannyen avek Abigail, fiy Nahas, ser Serouya, manman Zoab.

²⁶ Absalon ek larme Izrael ti etabli zot kan dan pei Galaad.

²⁷ Ler David ti ariv Mahanaim, Sobi, garson Nahas, ki sorti Raba, lavil bann Amonit, ek Makir, garson Amiel ki sorti Lo-Debar, ek Barzilai en Galaadit ki sorti Rogelim, ti zwenn avek li.

²⁸ Zot ti anmenn lili, basen, po anter, dible, lorz, lafarin, legren roti, fev, lantir, legren griye,

²⁹ dimyel, fromaz, bef ek mouton, fromaz bef. Zot ti anmenn tousala pour David ek son bann zonm pour zot manze, akoz zot ti'n dir dan zot menm: Sa bann zans in bezwen soufer lafen, lafatig ek laswaf dan dezer.