2 Samyel 15 - Labib An Kreol Seselwa

Absalon I Revolte kont David

¹ Apre sa, Absalon ti fer mannyer ganny en kales, detrwa seval ek en troup 50 zonm pour tay devan son kales.

² Byen granmaten i ti leve e plas li obor semen devan laport lavil. Sak fwa ki en dimoun ki annan problenm e pe al kot lerwa pour ganny zizman, Absalon ti apel li e demann li, “Ki lavil ou sorti?” Ler sa dimoun ti'n reponn: Mon sorti dan tel tribi Izrael,

³ Absalon ti dir li, “Ou zafer i bon, e ou dan ou drwa, me personn kot lerwa pa pou ekout ou.”

⁴ I ti azoute, “Si mwan ki ti ziz dan sa pei, tou dimoun ki annan en problenm ti ava vin kot mwan e mon ti ava ziz byen son zafer.”

⁵ Kan en dimoun ti aprose pour prosternen devan li, i ti atrap son lanmen e anbras li.

⁶ Absalon ti fer sa avek tou dimoun ki ti al kot lerwa pour zizman son zafer. Absalon ti ganny leker bann Izraelit par en fason malonnet.

⁷ Apre 4 an, Absalon ti dir lerwa, “Permet mwan al Hebron pour al ranpli mon ve ki mon'n fer devan SENYER,

⁸ akoz mwan ou serviter, mon'n fer en ve letan mon ti ankor reste Gesour, an Siri. Mon ti dir: Si SENYER i fer mwan retourn Zerizalenm, mon pou servi SENYER.”

⁹ Lerwa ti dir li, “Al anpe.” Alor, Absalon ti al Hebron.

¹⁰ Absalon ti anvoy son bann espyon dan tou bann tribi Izrael pour dir, “Ler zot ava antann son tronpet, zot ava kriye: Absalon in vin lerwa dan Hebron!”

¹¹ Ti annan 200 zonm avek li ki ti'n ganny envite sorti Zerizalenm. Zot ti byen entansyonnen, zot pa ti konn nanryen dan sa ki ti pe pase.

¹² Pandan ki Absalon ti pe ofer bann sakrifis, i ti anvoy sers Ahitofel, konseye David, dan lavil Gilon. Konmsa bann ki ti pou Absalon ti ogmante e konplo ti vin pli for.

David I Sove Zerizalenm

¹³ Nouvel ti ariv kot David: Pep Izrael in ralye avek Absalon.

¹⁴ Alor, David ti dir avek tou son lantouraz ki ti avek li Zerizalenm, “Annou sove, napa okenn fason sape avek Absalon. Depes zot; annou ale, sinon i pa pou tarde pour ariv isi e fer en gro maler tonm lo lavil, e masakre bann zabitan lavil.”

¹⁵ Son lantouraz ti dir li, “Nou ava fer tou sa ki lerwa in deside.”

¹⁶ Lerwa ti sorti, e tou son lantouraz ti swiv li. I ti kit deryer 10 son bann menazer pour vey pale.

¹⁷ Lerwa ti sorti; lepep ki ti swiv li; zot ti aret kot dernyen lakaz.

¹⁸ Tou son bann zonm, bann Keretit, bann Peletit ek bann Gatit, anviron 600 zonm sorti Gat, zot tou, zot ti defile devan lerwa.

¹⁹ Lerwa ti dir Itai, ki sorti Gat, “Akoz ou osi ou vin avek nou? Retournen e reste avek ou lerwa, akoz ou en etranze, e ou'n ganny deporte dan ou pei.

²⁰ Ou'n ariv kot nou yer, e ozordi mon pe antrenn ou avek nou koman en eran, kan mwan menm mon pa konnen kote nou pe ale. Retournen e anmenn ou bann frer avek ou. Mon demande ki SENYER i montre son labonte ek fidelite anver ou.”

²¹ Itai ti reponn lerwa, “Lo lavi SENYER, e lo ou lavi, mon rwa, mon senyer! Kot ou pou ete, pou mor, oubyen pour viv, mwan, ou serviter mon pou lanmenm.”

²² Alor David ti dir Itai, “Bon pase!” Itai ki sorti Gat avek son bann zonm ek tou zot fanmir ki ti avek li ti pase.

²³ Tou dimoun ti plere, e kriye ler lepep ti pe defile. Lerwa ti travers larivyer Sedron, e lepep ti avans dan direksyon dezer.

²⁴ Sadok osi ti la avek tou bann levit ki ti pe anmenn Kof Lalyans Bondye. Zot ti depoz Kof Lalyans Bondye ziska ki tou lepep ti'n fini sorti dan lavil.

²⁵ Lerwa ti dir Sadok, “Retourn Kof Bondye dan lavil. Si SENYER i montre mwan son labonte, i ava fer mwan retournen, e i ava fer mwan revwar Kof ek son landrwa sakre.

²⁶ Me si i dir: Mon nepli dakor avek ou, les li fer avek mwan sa ki ava fer li plezir.”

²⁷ Lerwa ti dir ankor avek pret Sadok, “Retourn dan lavil anpe avek ou garson Ahimas, Abiatar ek son garson Zonatan.

²⁸ Mwan, mon pou reste dan laplenn dezer, ziska ki mon ganny nouvel sorti kot zot.”

²⁹ Alor, Sadok ek Abiatar ti retourn avek Kof Bondye Zerizalenm, e zot ti reste laba.

David I Anvoy Housai Espyonn Absalon

³⁰ David ti monte dan direksyon montanny Olivye. I ti monte an pleran, latet kouver; i ti pe mars pyeni; tou sa ki ti avek li ti osi kouver latet, e zot ti monte an pleran.

³¹ Zot ti raport avek David, “Ahitofel i osi avek Absalon parmi bann ki ti fer konplo.” David ti priye, “SENYER tourn bann konsey Ahitofel an ridikil.”

³² Ler David ti ariv lo latet montanny kot zot ador Bondye, Housai, en Arkit, ti prezant devan li, son lenz desire, e latet kouver avek lapousyer.

³³ David ti dir li, “Pa vin avek mwan, ou pou en lanbara pour mwan.

³⁴ Plito, retourn dan lavil, e al dir Absalon: Mazeste! Mon ofer ou mon servis. Lontan mon ti serviter ou papa, e la aprezan mon vin ou serviter. Konmsa, ou ava kapab ed mwan e met lobstak kont bann konsey Ahitofel.

³⁵ Ou pou annan pret Sadok ek Abiatar dan ou kote. Ou ava raport avek bann pret Sadok ek Abiatar, tou lenformasyon ki ou ava gannyen dan pale lerwa.

³⁶ Ahimas, garson Sadok ek Zonatan, garson Abiatar tou le de i avek zot. Atraver zot ki ou pou pas mwan tou nouvel ki ou gannyen.”

³⁷ Alor, Housai, zanmi David, ti retourn dan lavil, zis ler Absalon ti pe antre Zerizalenm.