2 Samyel 12 - Labib An Kreol Seselwa

Natan I Reprimann David

¹ SENYER ti anvoy Natan kot David. Natan ti ariv kot David. I ti dir li, “Ti annan de zonm dan en menm lavil; enn ti ris, lot ti pov.

² Sa zonm ris ti annan bokou troupo bef ek mouton.

³ Sa zonm pov ti annan zis en pti mouton ki i ti'n aste. I ti sonny li, e in grandi se li ansanm avek son bann zanfan. I ti manz avek li, bwar dan son lakoup, dormi obor li. I ti koman en fiy pour li.

⁴ En zour, sa zonm ris ti ganny en viziter. Sa zonm pa ti anvi pran enn son zannimo parmi son troupo pour li prepar manze pour son viziter; alor, i ti pran sa sel pti mouton sa zonm pov, e prepar manze pour son viziter.”

⁵ Lakoler David ti monte kont sa zonm ris. I ti dir Natan, “Lo lavi SENYER, sa zonm ki'n fer sa i merit lanmor.

⁶ I devre ranplas sa mouton vole par kat lezot mouton, akoz i'n azir san okenn pitye.”

⁷ Alor, Natan ti dir David, “Ou menm sa zonm ki'n fer sa! La sa ki SENYER, Bondye pep Izrael i deklare: Mon'n konsakre ou koman lerwa pep Izrael; mon'n delivre ou dan lanmen Sail.

⁸ Mon'n livre ou tou lafanmir ou met Sail; mon'n met dan ou lebra tou son bann fanm, e mon'n donn ou lotorite lo pep Zida ek Izrael. Si sa pa ase, mon kapab donn ou plis ankor.

⁹ Akoz ou'n mepriz parol SENYER, e fer sa ki i pa kontan? Ou'n touy Iri sa Hitit par lepe; ou'n pran son fanm pour fer li vin ou fanm; ou'n aranze pour fer bann Amonit touy Iri par lepe.

¹⁰ Aprezan, lepe pa pou kit ou fanmir, akoz ou'n mepriz mwan, e ou'n pran fanm Iri, sa Hitit, pour fer li vin ou fanm.

¹¹ La sa ki SENYER i deklare: Mon pou anvoy maler lo ou, sorti dan ou prop fanmir; mon pou aras ou, ou bann fanm devan ou prop lizye, e mon pou donn avek enn ou fanmir pros ki ava dormi avek zot an plen zour.

¹² Sa ki ou ti fer an sekre, mon pou fer li ariv an plen zour devan ou pep antye.”

¹³ David ti reponn Natan, “Mon'n fer pese kont SENYER.” Natan ti reponn David, “SENYER osi in pardonn ou pese: Ou pa pou mor.

¹⁴ Me akoz ou'n mepriz SENYER dan sa zafer, sa zanfan ki'n ne pour ou, pou mor.”

¹⁵ Apre, Natan ti retourn se li. SENYER ti anvoy en maladi lo zanfan ki fanm Iri ti gannyen pour David.

Lanmor Zanfan Batseba

¹⁶ David ti sipliy Bondye an faver sa zanfan: I ti fer en zenn. Ler i ti retourn se li, i ti dormi ater tou lannwit.

¹⁷ Bann ansyen kot li ti ensiste ki i leve ater; me i pa ti aksepte, e i ti refize manze avek zot.

¹⁸ Set zour plitar, sa zanfan ti mor. Son bann serviter David ti per pour anons li ki sa zanfan in mor. Zot ti dir: Ler sa zanfan ti ankor vivan, nou ti koz avek li, me i pa ti ekout nou; aprezan, ki mannyer nou pou kapab dir li sa zanfan in mor? I pou mal reazir.

¹⁹ Ler David ti remarke ki bann serviter pe koz dousman antre zot, i ti konpran ki sa zanfan in mor. I ti demann son bann serviter, “Eski sa zanfan in mor?” Zot ti reponn, “Wi, in mor.”

²⁰ Alor David ti leve ater. I ti bennyen, parfim li, e sanz son lenz. Apre i ti al dan lakaz SENYER, e prosternen. Ler i ti retourn se li, i ti demann pour servi li en repa, e i ti manze.

²¹ Son bann serviter ti demann li, “Ki ou'n fer? Ler sa zanfan ti ankor vivan, ou ti zene, e plere pour li; aprezan ki i'n mor, ou leve, e ou manze.”

²² I ti reponn, “Ler sa zanfan ti ankor vivan, mon ti zene, e plere akoz mon ti dir dan mwan menm: Petet SENYER i ava pran pitye pour mwan, e sa zanfan ava viv.

²³ Aprezan ki i'n mor. Akfer mon bezwen zene? Eski mon kapab fer li reviv? Mwan ki pou al zwenn li; me pa li ki pou retourn kot mwan.”

Nesans Salomon

²⁴ David ti al konsol son fanm, Batseba, e i ti dormi avek li. Batseba ti ganny en garson ki David ti apel Salomon. SENYER ti kontan li.

²⁵ Par lentermedyer profet Natan, i ti apel sa zanfan Yedidya, akoz SENYER i kontan li.

David I Pran Raba

²⁶ Zoab ti latak kont Raba, lavil bann Amonit, e kaptir lavil rwayal.

²⁷ I ti anvoy bann mesaze kot David, pour dir li, “Mon'n atak Raba, e mon'n kaptir sa kwen kot i annan bann rezervwar delo.

²⁸ Ou aprezan, mobiliz leres larme, e vin anserkle lavil, e pran li. Si mon pran li mwan menm, mon non ava. Mon pa oule pran li mwan menm pour ki mon pa ganny okenn loner.”

²⁹ Alor, David ti mobiliz tou larme e al atak Raba, ki i ti kaptire.

³⁰ I ti pran kouronn lo latet son lerwa, en kouronn ki ti pez apepre 35 kilo, zot ti pran sa pyer presyez ki ti lo la, e plas lo latet David. Zot ti osi sezi en kantite depouy lager dan lavil, e anmenn avek zot.

³¹ Lepep ki ti la ti ganny anploye pour travay koman syer, kaser ros, kouper dibwa e fezer brik. I ti tret tou bann zabitan bann lavil Amonit konmsa. Apre, David ti rantre Zerizalenm avek son larme.