2 Samyel 1 - Labib An Kreol Seselwa

David I Aprann Lanmor Sail

¹ Apre lanmor Sail, David ki ti'n fini bat bann Amalesit, ti'n retourn Siklag depi de zour.

² Trwazyenm zour, en zonm, sorti dan kan Sail, ti ariv kot li avek lenz tou desire, e son latet kouver avek lapousyer. Arivan kot David, i ti tonm ater e prostern devan li.

³ David ti demann li, “Kote ou sorti?” I ti reponn, “Mon'n sove dan kan Izrael.”

⁴ David ti dir, “Rakont mwan sa ki'n arive.” I ti dir, “Larme Izrael in sove pandan batay. En kantite zonm in mor, Sail ek son garson Zonatan osi in mor.”

⁵ David ti demann avek sa zonm ki ti'n anmenn sa nouvel, “Ki mannyer ou fer pour konnen ki Sail ek son garson Zonatan in mor?”

⁶ Sa zonm ti reponn, “Mon ti lo montanny Gilboa; e mon ti war Sail zet son lekor lo son lans. I ti'n ganny kwense par bann solda lennmi lo seval.

⁷ I ti vire, e i ti war mwan. I ti apel mwan. Mon ti reponn: Wi?”

⁸ I ti demann mwan, “Ou ki ou?” Mon ti reponn, “Mon en Amalesit.”

⁹ Alor i ti dir mwan, “Vin isi e touy mwan. Mon pe soufer en kantite, menm si mon paret byen.”

¹⁰ Alor mon ti aprose, e mon ti touy li, akoz mon ti asire ki i pa ti pou viv apre son defet. Mon ti pran son kouronn ki ti lo son latet ek en brasle ki ti lo son lebra, e mon'n anmenn kot ou, mon senyer.

¹¹ David ek son bann zonm ki ti avek li ti desir zot lenz.

¹² Zot ti plere e zene ziska aswar pour Sail ek son garson Zonatan, e pour pep SENYER, pep Izrael, ki'n mor par lepe.

¹³ David ti demann sa zonm ki'n anmenn nouvel, “Kote ou sorti?” I ti dir, “Mwan, garson en Amalesit ki reste isi.”

¹⁴ David ti demann li, “Ou pa ti per pour ou donn lanmor sa ki SENYER in swazir koman lerwa?”

¹⁵ David ti apel enn son bann serviter e dir li: Touy li. Sa serviter ti pik sa Amalesit e touy li.

¹⁶ David ti dir li, “Ou responsab ou prop lanmor; par ou prop labous, ou'n akiz ou ler ou ti dir: Mwan ki'n touy lerwa ki SENYER in swazir.”

Kantik Dey David lo Sail ek Zonatan

¹⁷ David ti sant sa kantik lo Sail ek son garson Zonatan.

¹⁸ I ti demande ki zot ansenny sa kantik bann zabitan Zida. Sa in ganny ekri dan liv kantik: Zis.

¹⁹ Izrael! Ou bann gerye elit in ganny detri lo ou montanny! Akoz ou bann ero in tonbe?

²⁰ Pa anons sa dan pei Gat; pa pibliy sa nouvel dan bann semen Askelonn pour ki bann fiy Filisten, pa rezouir, e ki fiy bann non sirkonsi pa fet laviktwar.

²¹ Montanny Gilboa! Mon demande ki pa tonm ni laroze, ni lapli lo ou; ki ou plantasyon pa prodwir okenn legren! Lanmenm kot bann boukliye bann konbatan, ti ganny kouver avek laont. Boukliye Sail pa pou zanmen ganny frote ankor avek delwil.

²² Devan disan bann blese, devan lagres bann konbatan, fles Zonatan pa'n zanmen rekile, e lepe Sail pa'n zanmen retourn lanmen vid.

²³ Sail ek Zonatan ti kontan kanmarad ler zot ti vivan; lanmor pa'n separ zot. Zot ti pli rapid ki leg, pli for ki lyon.

²⁴ Bann fiy Izrael! Plere pour Sail. I ti donn zot zoli lenz, e orn zot rob avek lor.

²⁵ Akoz ou bann ero in tonbe? Zonatan in mor dan ou bann kolin!

²⁶ Zonatan mon frer! Akoz ou, mon dan gran douler! Ou ti mon meyer zanmi, ou lanmour pour mwan ti vreman gran, pli gran ki lanmour en fanm.

²⁷ Akoz ou bann ero in tonbe? Bann zarm lager in ganny detri!