2 Korentyen 9 - Labib An Kreol Seselwa

Led an Faver bann Frer

¹ I pa neseser ki mon ekri zot konsernan led pour bann krwayan ki dan Zide.

² Annefe, mon konn zot bonn volonte, e mon'n dir devan bann Masedonyen koman mon fyer akoz zot. Mon'n dir zot ki Lagres in pare depi lannen pase. Zot devouman in ankouraz laplipar parmi zot.

³ Me mon pe anvoy bann frer pour ki sa leloz ki nou'n fer lo zot lo sa size, pa fini la: Parey mon'n dir zot, mon oule ki zot vreman pare.

⁴ Fodre pa ki kan sa bann Masedonyen ki akonpanny mwan i vini, zot war ki zot pa pare. Sa i ava fer nou onte, nou ki annan telman lasirans lo zot size; san kont laont ki pou tonm osi lo zot!

⁵ Pour sa rezon ki mon'n war li neseser demann sa bann frer pour vin kot zot avan mwan, pour prepar sa bann don zenere ki zot in deza promet. Konmsa, sa don ava pare kan mon ava arive e i ava prouve ki zot pa pe donn kontreker, me avek bonker.

⁶ Annefe, pa oubliye: Sa enn ki senm en pti gin, pou rekolte zis en pti gin; sa enn ki senm bokou, pou rekolte bokou.

⁷ Fodre ki sakenn i donn dapre sa ki i'n deside, pa avek regre oubyen par lobligasyon. Annefe, Bondye i kontan sa enn ki donn avek lazwa.

⁸ Bondye i annan pouvwar donn zot annabondans, toudsort bon keksoz. Konmsa, zot ava touzour annan sa ki neseser pour zot, e donn annabondans pour fer bokou dibyen.

⁹ Parey Lekritir i deklare: I'n distribye annabondans, i'n fer lomonn avek bann pov, son lazistis i reste pour touzour.

¹⁰ Bondye ki fourni senmer avek lagrenn, e ki donn dipen ki nouri li, ava fourni zot avek bann lagrenn ki zot bezwen. I ava fer zot pouse e ogmant zot rekolt, fri zot zenerozite.

¹¹ I ava gard zot touzour ase ris, pour ki zot ava toultan zenere. Alor, bokou ava remersye Bondye pour bann don ki zot gannyen par nou lentermedyer.

¹² Annefe, sa don ki zot pou fer, i pa zis pour bezwen bann krwayan, me i okazyonn en kantite lapriyer rekonesans anver Bondye.

¹³ Bokou dimoun ki pou apresye valer sa don, pou rann glwar Bondye pour zot lobeisans ki temwanny zot fidelite anver Bonn Nouvel Kris. Sa don ava osi rann glwar Bondye pour zot zenerozite dan partaz sa ki zot annan avek sa bann frer e avek tou lezot ankor.

¹⁴ Akoz sa lagras ekstraordiner ki Bondye in akord zot, sa bann frer ava priy pour zot avek bokou lafeksyon.

¹⁵ Annou loue Bondye pour son don enkonparab!