2 Korentyen 3 - Labib An Kreol Seselwa

Serviter Nouvo Lalyans

¹ Eski nou pou vant nou lekor ankor en fwa? Oubyen, parey serten dimoun, eski nou bezwen bann let rekomandasyon pour zot, oubyen sorti kot zot?

² Zot menm ki nou let rekomandasyon ki'n ganny ekri lo nou leker, e ki tou dimoun i kapab konnen e lir.

³ An realite, zot en let ki'n ganny ekri par Zezi-Kri e ki'n ganny transmet par nou. I pa'n ganny ekri avek lank, me avek Lespri Bondye ki vivan. Sa let pa'n ganny grave lo bann tablet an pyer, me dan leker imen.

⁴ Sanmenm sa konfyans ki nou annan dan Bondye, par Kris.

⁵ Annefe, nou pa kapab pretann akonplir en tel tas par nou menm. Sa ki nou kapab fer i sorti kot Bondye.

⁶ Li menm ki'n fer nou vin bann serviter en nouvo lalyans ki pa depann lo en lalwa ekri, me lo Lespri Sen. Lalwa ekri i donn lanmor, me Lespri Sen li, i donn lavi.

⁷ Sa Lalwa ti ganny grave lo bann tablet an pyer e laglwar Bondye ti aparet. Bann Izraelit pa ti kapab get figir Moiz ki ti pe briye. Pourtan sa laglwar ti tanporer.

⁸ Byen plis alor, travay fer par Lespri Sen pou reflekte en laglwar bokou pli gran.

⁹ Annefe, si travay ki ti anmenn kondannasyon, ti reflekte laglwar, sa enn ki rann en dimoun zis, ava reflekte en laglwar bokou pli gran ankor.

¹⁰ Alor, nou kapab dir ki sa laglwar ki ti briye dan lepase, i nanryen an konparezon avek sa laglwar aktyel ki telman siperyer.

¹¹ Annefe, si sa ki ti tanporer ti annan en tel laglwar, alor, laglwar sa ki pour reste pour touzour, pou bokou pli gran.

¹² Akoz nou annan en tel lesperans, ki nou annan konfyans.

¹³ Nou pa fer parey Moiz ki ti met en vwal lo son figir, pour ki bann Izraelit pa war laglwar ki ti tanporer.

¹⁴ Me zot lentelizans ti bloke; konmela ankor, kan zot lir dan bann liv ansyen lalyans, sa menm vwal i reste. Zis Kris ki kapab tir sa vwal.

¹⁵ Wi! Ziska ozordi ankor, sak fwa ki zot lir bann liv Moiz, en vwal i kouver zot leker.

¹⁶ Sa vwal i tonbe zis kan en dimoun i tourn ver Senyer.

¹⁷ Annefe, Senyer se Lespri. La kot Lespri Senyer i ete, i annan laliberte.

¹⁸ Nou tou ki vwal i'n ganny tire lo nou figir, nou reflekte laglwar Senyer. Ensi, nou'n ganny transformen, pour viv parey Senyer. Nou sorti dan en laglwar pour al dan en laglwar bokou pli gran: Sa i travay Senyer ki li menm i Lespri.