2 Korentyen 1 - Labib An Kreol Seselwa

¹ Sa let i sorti kot Pol, zapot Zezi-Kri, par lavolonte Bondye, ek nou frer Timote, pour Legliz Bondye ki dan provens Korent, e pour tou bann krwayan ki partou dan provens Lagres.

² Pour zot tou, mon demann lape ek lagras ki sorti kot Bondye nou Papa e Senyer Zezi-Kri.

Pol I Remersye Bondye

³ Nou loue Bondye e Papa nou Senyer Zezi-Kri, Papa ki ranpli avek labonte, Bondye ki touzour konsole.

⁴ Par sa konsolasyon ki nou menm nou gannyen avek li, nou ava kapab konsol tou bann ki pe soufer.

⁵ Annefe, parey nou pe partaz bokou soufrans Kris, par Kris nou ava resevwar en gran konsolasyon.

⁶ Si nou dan difikilte, se pour ki zot ganny ankouraze e sove. Si nou ganny ankouraze, se pour ki zot osi, zot ganny ankouraze e ganny lafors pour andir menm soufrans.

⁷ Nou lespwar dan zot i solid. Annefe, nou konnen ki koman zot annan par dan nou soufrans, zot osi annan par dan konsolasyon ki nou gannyen.

⁸ Annefe, nou pa oule ki zot reste dan linyorans, konsernan soufrans ki nou'n pas ladan dan provens Lazi. I ti pli for ki nou ti kapab siporte; ziska en tel pwen ki nou pa ti konnen menm si nou ti pou reste vivan.

⁹ Nou ti santi ki nou santans lanmor ti'n fini ganny prononse. Me sa ti montre nou pour pa plas nou konfyans dan nou menm, me dan Bondye ki kapab resisit dimoun ki'n mor.

¹⁰ Li menm ki'n delivre nou dan en tel danze lanmor e nou krwar ki i pou delivre nou ankor. Nou'n met nou lespwar dan li.

¹¹ Alor, zot osi, ed nou par zot lapriyer, pour ki sa lagras ki nou'n gannyen par lentersesyon bokou dimoun, ava osi en size remersiman pour plizyer dimoun.

Pol I Sanz Son bann Proze

¹² La sa ki fer nou fyer: Nou konsyans i dir nou ki nou kondwit dan lemonn, e sirtou anver zot, in avek senplisite ek senserite devan Bondye; non pa avek lasazes imen, me avek lagras Bondye.

¹³ Annefe, dan nou let, nou ekri zot zis sa ki zot lir e konpran. Mon espere ki zot ava konpran nou byen.

¹⁴ Annefe, zot i'n deza konpran en pe: Zour Zezi nou Senyer ava retournen, zot ava fyer akoz nou, parey nou, nou pou fyer akoz zot.

¹⁵ Se avek en tel konfyans ki mon ti oule vin kot zot dabor, pour ki zot ganny lagras ankor en dezyenm fwa.

¹⁶ Mon ti oule pas kot zot pour al an Masedwann, apre retourn kot zot. Zot ti ava'n fer sa ki neseser pour ed mwan kontiny mon vwayaz an Zide.

¹⁷ Eski kan mon ti form sa proze, mon pa ti serye? Oubyen, eski mon bann plan i en bann proze zonm, de sort ki i annan dan mwan, anmenmtan wi ek non?

¹⁸ Bondye i temwen: Sa ki mon'n anons zot i pa wi ek non.

¹⁹ Annefe, Garson Bondye, Zezi-Kri, ki Silven, Timote ek mwan menm nou'n anonse parmi zot, pa ti wi ek non. O kontrer, dan li, i'n touzour annan zis wi.

²⁰ Annefe, tou bann promes Bondye, zot trouv zot Wi dan Zezi-Kri. Pour sa rezon, par Zezi-Kri ki nou dir nou Amenn pour rann glwar Bondye.

²¹ Se Bondye li menm ki rann nou for avek zot, dan lavi avek Kris. Bondye li menm ki'n swazi nou.

²² Li menm ki'n mark nou avek son sele e ki'n met Lespri Sen dan nou leker koman en garanti.

²³ Lo mon kote, mon pran Bondye koman temwen lo mon lavi: Se pour eparny zot ki mon ti deside pa retourn Korent.

²⁴ I pa vedir ki nou ti oule komann zot lafwa. Annefe, zot pe reste solid dan lafwa; me nou oule plito kontribye pour rann zot ere.