1 Zan 5 - Labib An Kreol Seselwa

Laviktwar lo Lemonn

¹ Sa enn ki krwar ki Zezi i Kris, i en zanfan Bondye. Sa enn ki kontan en papa, i osi kontan son bann zanfan.

² La koman nou konnen ki nou kontan bann zanfan Bondye: Kan nou kontan Bondye e obei son bann komannman.

³ Annefe, lanmour pour Bondye, se ki nou obei son komannman; e son bann komannman pa en fardo.

⁴ Annefe, tou bann zanfan Bondye, i ganny laviktwar lo lemonn. Par nou lafwa, nou'n ganny laviktwar lo lemonn.

⁵ Lekel sa enn ki ganny laviktwar lo lemonn? Sa enn ki krwar ki Zezi i Garson Bondye.

Temwannyaz Konsernan Zezi-Kri

⁶ Li menm Zezi-Kri ki'n vin avek delo ek disan. I pa'n vin zis avek delo, me i'n vin avek delo e avek disan. Lespri i rann temwannyaz ki sa i vre, akoz Lespri i laverite.

⁷ Annefe, i annan trwa ki rann temwannyaz:

⁸ Lespri, delo ek disan; e tou le trwa zot dakor.

⁹ Nou aksepte byen temwannyaz imen; me temwannyaz Bondye i annan plis pwa. San menm sa temwannyaz ki Bondye in donnen lo size son Garson.

¹⁰ Alor, sa enn ki krwar dan Garson Bondye, i posed sa temwannyaz dan li. Sa enn ki pa krwar Bondye, i fer Bondye pas pour manter, akoz i pa'n krwar temwannyaz ki Bondye in rann osize son Garson.

¹¹ La sa temwannyaz: Bondye in donn nou lavi eternel, e sa lavi i dan son Garson.

¹² Sa enn ki posed son Garson i annan lavi. Sa enn ki napa Garson Bondye, napa lavi.

Lavi Eternel

¹³ Mon'n ekri zot tousala, pour fer zot konnen ki zot ki krwar dan non Garson Bondye, zot annan lavi eternel.

¹⁴ Avek konfyans ki nou annan dan li, nou krwar ki si nou demann keksoz dapre son lavolonte, i pou ekout nou.

¹⁵ Alor, si nou konnen ki i ekout nou dan nenport kwa ki nou demande, nou konnen ki nou posed deza sa ki nou'n demande.

¹⁶ Si en dimoun i war son frer pe komet en pese ki pa anmenn lanmor, fodre ki i priye, e Bondye ava donn li lavi. Mon pe koz lo bann pese ki pa anmenn lanmor. I annan pese ki anmenn lanmor; pa pour en tel pese ki mon pe dir zot priye.

¹⁷ Tou move aksyon i en pese, me i annan pese ki pa anmenn lanmor.

¹⁸ Nou konnen ki en dimoun ki'n ne koman zanfan Bondye pa fer pese, akoz Bondye i protez sa enn ki i'n donn nesans, e dyab pa kapab tous li.

¹⁹ Nou konnen ki nou pour Bondye, e ki lemonn antye i anba pouvwar dyab.

²⁰ Nou konnen ki Garson Bondye in vini. I'n donn nou disernman pour konn sa enn ki vre Bondye. Nou, nou reste ini avek vre Bondye, gras a son Garson Zezi-Kri. Li menm vre Bondye; li menm lavi eternel.

²¹ Mon bann pti zanfan! Prezerv zot kont bann zidol.