1 Timote 6 - Labib An Kreol Seselwa

¹ Tou bann lesklav, zot devre annan respe pour zot met. Konmsa, personn pa ava ensilte non Bondye ek nou lansennyman.

² Bann lesklav ki zot met i krwayan, fodre pa ki zot mank respe anver li, anba preteks ki zot frer. O kontrer, zot devre servi sa bann met pli byen ankor, akoz sa ki pe benefisye zot servis, zot bann krwayan ki Bondye i kontan. La sa ki ou devre ansennyen e rekomande:

Bann Fo Lansennyman

³ Si en dimoun i ansenny en lot doktrin; si i pa dakor avek bann vre parol nou Senyer Zezi-Kri ek lansennyman nou lafwa,

⁴ sa dimoun i gonfle avek lorgey e i pa konn nanryen. I ganny maladi diskisyon ek dispit lo size bann mo. Sa i lakoz zalouzi, dispit, kalonmni, move soupson,

⁵ e bann diskisyon ki pa zanmen fini ant dimoun ki lespri in fose e ki'n perdi tou nosyon laverite. Zot krwar ki lafwa dan Bondye i en mwayen pour vin ris.

⁶ Sertennman ki lafwa dan Bondye i en gran sours larises pour sa enn ki kontant li avek sa ki i annan.

⁷ Annefe, nou pa'n vin avek nanryen ki sorti dan sa lemonn e nou pa pou kapab anmenn nanryen avek nou.

⁸ Alor, si nou annan manze ek lenz, sa i ase.

⁹ Me bann ki oule vin ris, zot tonm dan tantasyon e dan pyez en kantite dezir fou e visye, ki plonz dimoun dan larin e provok zot maler.

¹⁰ Annefe, lanmour larzan i rasin tou kalite maler. Serten dimoun in telman anvi larzan ki zot in egare lwen avek lafwa e zot in met zot lekor dan en kantite tourman.

Rekomandasyon Personnel

¹¹ Pour ou ki en zonm Bondye, evit tousala. Atas ou avek lazistis, lafwa dan Kris, lanmour, pasyans ek ladouser.

¹² Konbat sa bon konba pour lafwa. Sezi lavi eternel pour lekel Bondye in apel ou kan ou ti fer sa zoli deklarasyon lo ou lafwa, dan prezans en kantite temwen.

¹³ Mon demann ou devan Bondye ki donn lavi, e devan Zezi-Kri ki ti donn temwannyaz son lafwa devan Pons Pilat:

¹⁴ Obei bann komannman e reste konpletman pir e san repros, ziska ler nou Senyer Zezi-Kri ava retournen.

¹⁵ Son retour pou realize dan letan fikse par Bondye, sel Souvren, Lerwa tou lerwa e Senyer tou senyer.

¹⁶ I sa sel Bondye imortel. I reste dan lalimyer ki personn pa kapab aprose. Personn pa'n zanmen war li, ni kapab war li. I merit tou loner ek pwisans eternelman. Amenn.

Konsey pour bann Ris

¹⁷ Pour bann ki posed larises dan sa monn, rekomann zot pa fer vantar. Dir zot pa met zot lesperans dan sa bann larises enserten, me dan Bondye ki donn nou tou keksoz annabondans pour nou zouir.

¹⁸ Konsey zot pour fer sa ki byen; zot devre ris an bonn aksyon. Zot devre montre zot zenere e touzour pare pour partaz avek lezot.

¹⁹ Alor, zot ava anmas en bon trezor solid pour lavenir, ki ava fer zot ganny vre lavi.

Salitasyon Final

²⁰ Mon ser Timote! Gard byen sa ki ou'n ganny konfye. Evit bann konversasyon vid e kontrer avek lafwa, ek bann fo largiman ki zot apel konnesans.

²¹ Annefe, i annan serten ki, afors proklanm bann tel konnesans, zot in fini par elwanny zot avek lafwa. Lagras Bondye ava avek zot.