1 Timote 2 - Labib An Kreol Seselwa

Rekomandasyon lo Lapriyer

¹ Premyerman, mon rekomande ki zot adres Bondye bann demann, lapriyer, siplikasyon ek remersiman an faver tou et imen:

² Pour bann lerwa ek tou dimoun ki okip en plas enportan, pour ki nou kapab viv en lavi trankil, anpe, atase avek Bondye e viv en lavi respektab avek dinyite.

³ Sanmenm sa ki bon e ki fer plezir Bondye nou Sover.

⁴ I oule ki tou dimoun i ganny sove e ariv konn laverite.

⁵ Annefe, i annan en sel Bondye e en sel medyater ant Bondye ek bann imen: En zonm, Zezi-Kri,

⁶ ki'n donn son lavi pour liber tou bann imen. Dan letan fikse, in anmenn laprev ki Bondye i oule ki tou bann imen i ganny sove.

⁷ Pour sa rezon, ki mon'n ganny anvoye koman en zapot e ansennyan kot bann non-Zwif, pour anons mesaz lafwa ek laverite. Mon pa pe koz manti, mon pe dir laverite.

Zonm ek Fanm dan Lasanble

⁸ Alor, mon demande ki bann zonm i priye partou; ki zot lev lanmen ver lesyel avek en leker pir, san okenn lakoler, ni dispit.

⁹ Mon osi swete ki bann fanm i abiy zot dan en fason desan, diny e senp. Pa bezwen ki zot orn zot seve avek bizou annor, oubyen perl ek labiyman byen ser.

¹⁰ O kontrer, ki zot ganny admire pour zot bann bon aksyon, ki apropriye delapar bann fanm ki annan respe pour Bondye.

¹¹ Bann fanm, zot devre aprann dan silans ek limilite.

¹² Mon pa donn permisyon bann fanm pour ansennyen, ni annan lotorite lo zonm; zot devre gard silans.

¹³ Annefe, Adan ti ganny kree premye, apre ki Ev in vini.

¹⁴ Pa Adan ki ti ganny tronpe, me fanm ki ti ganny tronpe e ganny trouve koupab pour dezobei lord Bondye.

¹⁵ Sepandan, bann fanm pou ganny sove par vin manman, a kondisyon ki zot persevere dan lafwa, lanmour, lasentete e viv senpleman.