1 Samyel 8 - Labib An Kreol Seselwa

Pep Izrael I Demann en Lerwa

¹ Ler Samyel ti'n vye, i ti nonm son de garson koman ziz pep Izrael.

² Son premye garson ti apel Zoel e dezyenm ti apel Abiya. Zot ti ziz dan lavil Berseba.

³ Bann garson Samyel pa ti swiv legzanp zot papa. Zot ti les zot ganny tante par larzan; zot ti aksepte gous, e pas fo zizman.

⁴ Alor, tou bann ansyen dan pep Izrael ti rasanble e al rankontre Samyel dan lavil Rama.

⁵ Zot ti dir li, “Samyel! Ou'n vye, e ou bann garson pa pe swiv ou legzanp. Alor, swazir en lerwa pour renny lo nou, parey tou lezot nasyon.”

⁶ Sa pa ti fer ditou plezir Samyel, ler zot ti dir, “Donn nou en lerwa pour renny lo nou.” Samyel ti priy SENYER.

⁷ SENYER ti dir li, “Ekout pep Izrael dan tou sa ki i ava dir ou. Annefe, pa ou ki zot rezete, me se mwan ki zot pe rezete; zot nepli oule mwan koman zot lerwa.

⁸ Pour tou sa ki mon'n fer pour zot depi ki mon'n tir zot dan Lezip ziska ozordi, zot pa'n zanmen aret abandonn mwan pour ador lezot bondye; la zot pe fer parey avek ou.

⁹ Alor, ekout zot, me averti zot byen e fer zot konn bann drwa sa lerwa ki pou renny lo zot.”

Drwa en Lerwa

¹⁰ Alor, Samyel ti raport avek lepep, tou sa ki SENYER ti dir avek sa bann ki ti'n demann en lerwa.

¹¹ I ti dir, “La bann drwa sa lerwa ki pou renny lo zot: I pou pran zot garson e fer zot okip son bann kales lager, fer zot vin bann kavalye e gard devan son kales.

¹² I pou nonm en bann koman sef 1,000 e sef 50. I pou pran en bann pour kiltiv son plantasyon, e rekolte son bann prodwi; en lot bann pou travay dan fabrikasyon zarm lager ek bann lekipman pour kales.

¹³ I pou osi pran zot fiy pour travay dan fabrikasyon parfen e koman kwizinyen e boulanze.

¹⁴ I pou pran meyer porsyon zot later ek zot plantasyon rezen, plantasyon dible, ek plantasyon zoliv e donn son bann zans dan son lantouraz.

¹⁵ I pou pran en dizyenm bann rekolt ek prodwi rezen, pour donn son bann zans dan son lantouraz.

¹⁶ I pou pran zot bann serviter ek zot bann servant, zot meyer bef ek bourik e fer zot travay pour li.

¹⁷ I pou pran en dizyenm zot troupo mouton; e zot, i pou fer vin son lesklav.

¹⁸ Alor, kan zot ava plennyen akoz zot lerwa ki zot menm zot in swazir. Me SENYER, pa pou reponn zot.”

¹⁹ Pep Izrael ti refize ekout Samyel. Zot ti dir, “Tanpi! Pourvi ki nou ganny en lerwa.

²⁰ Nou oule en lerwa pour nou, parey lezot nasyon. Nou lerwa ava vin nou ziz; i ava komann nou larme e al avek nou dan lager.”

²¹ Apre ki Samyel ti'n ekout sa ki pep Izrael ti dir, i ti raport tou devan SENYER.

²² SENYER ti dir Samyel, “Ekout zot demann, e donn zot en lerwa.” Apre, Samyel ti dir sa bann zonm, “Retourn se zot dan zot lavil.”